ខេត្តបាត់ដំបង ៖ អាជ្ញាធរខេត្ត និងសមត្ថកិច្ចដែលអះអាងថា នឹងបញ្ជាឲ្យមន្ត្រីមូលដ្ឋានចុះទៅសួរនាំអំពីផ្លូវច្បាប់នៃការបើកឱ្យមានល្បែងស៊ីសងយ៉ាងវក់វី ជ្រោកក្រោមកន្ទុយកាស៊ីណូនៅជាប់ព្រំដែនខ្មែរ-ថៃ ក្នុងស្រុកសំពៅលូននោះ រហូតមកដល់ពេលនេះ នៅតែស្ងាត់ឈឹងដដែល មិនទទូលបានលទ្ធផលឡើយ ដែលនាំឲ្យមានការសង្ស័យថា សមត្ថកិច្ចដែលមានអំណាចមួយចំនួន អាចស្ថិតនៅពីក្រោយនៃបនល្បែងទាំងនេះ ហើយការអះអាងរបស់សមត្ថកិច្ចដែលថា នឹងចុះស្រាវជ្រាវសួរនាំអំពីផ្លូវច្បាប់នោះ គឺគ្រាន់តែ
ជាការផ្ដល់ដំណឹងបែប «ប្រជាភិថុត »តែប៉ុណ្ណោះ ។
មន្ត្រីម្នាក់បានបង្ហើបឱ្យដឹងថា អាជ្ញាធរខេត្តក៏ដូចជាស្នងការដ្ឋានខេត្ត ឬស្ថាប័នដទៃទៀតដែរ គឺគ្មានផែនការចុះស្រាវជ្រាវរកច្បាប់ទម្លាប់នៃបនល្បែងជ្រោកក្រោមស្លាកកាស៊ីណូ «ប៉ារីស» នៅស្រុកសំពៅលូន
នេះទេ ។ នេះគ្រាន់តែជាការផ្ដល់ដំណឹងបែប «ប្រជាភិថុត ឬភូតកុហក់» តែប៉ុណ្ណោះ ។ រហូតមកដល់ពេលនេះ ទីតាំងល្បែងនេះ នៅតែបើកទ្វារចំហរទទូលអតិថិជនយ៉ាងគគ្រឹកគគ្រេងរាល់ថ្ងៃដដែល ដោយគ្មាន
ការរំខានពីអាជ្ញាធរ ឬសមត្ថកិច្ចឡើយ ។ ប៉ុន្តែស្ថិតក្នុងក្រោមការយាមកាមយ៉ាងតឹងតែងពីឆ្មាំសន្តិសុខស្រី-ប្រុស សូម្បីថតរូបពីខាងក្រៅ ក៏ត្រូវឆ្មាំទ្វារចេញមករារាំងយ៉ាងខ្លាំងក្លាផងដែរ ។
មន្ត្រីរូបនេះ បានប្រាប់ថា កាស៊ីណូ«PARIS» នេះមានច្រកចូល២កន្លែង ។ ច្រកខាងមុខ ដែលមានរៀបចំស្អាតមានយីហោត្រឹមត្រូវ គឺបើកទទួលភ្ញៀវដែលចូលលេងល្បែងក្នុងកាស៊ីណូជាធម្មតា រីឯច្រកមួយកន្លែងទៀត គេបើកនៅចំហៀងផ្នែកខាងក្រោយ សម្រាប់ទទូលភ្ញៀវចូលលេងល្បែងខុសច្បាប់ ។ មន្ត្រីដដែលបានបញ្ជាក់ថា ភ្ញៀវជនជាតិខ្មែរ ដែលចូលលេងល្បែងខុសច្បាប់ នៅកន្ទុយកាស៊ីណូនេះ មានឆ្មាំទ្វារប្រុស-ស្រីយាមកាមយ៉ាងតឹងតែង ។
ក្រុមឆ្មាំទាំងនេះ ជាអ្នកត្រូតពិនិត្យរាល់ការចេញ-ចូលរបស់ភ្ញៀវ និងចាំរារាំងដល់អ្នកសារព័ត៌មានដែលព្យាយាមថតរូបភាពពីខាងក្រៅ ។ ល្បែងដែលជ្រោកក្រោមស្លាកកាស៊ីណូនេះ មានសង្វៀនជល់មាន់ ល្បែងអាប៉ោង បៀរ និងមានល្បែងហ្គេមបាញ់ត្រីផងដែរ ។ ប្រភពបានប្រាប់ថា អ្នកដែលចូលលេងល្បែងនេះ ស្ទើរ៩០% ជាប្រជាកសិករខ្មែរ ។ ពេលនេះ ពួកគេកំពុងសម្រុកយ៉ាងខ្លាំង ខណៈពេលនេះ ជារដូវប្រមូលកសិផលលក់បានប្រាក់ផង។
មិនតែប៉ុណ្ណោះ បើតាមប្រភពមួយចំនួនទៀត ក៏បានបង្ហើបឲ្យដឹងដែរថា កាស៊ីណូនេះ ក៏កំពុងបើកដៃឲ្យក្រុមអ្នកលេងល្បែង ប្រើប្រាស់ប្រាក់រៀលសម្រាប់ទូទាត់ក្នុងការភ្នាល់ល្បែងទៀតផង ដែលទង្វើនេះគឺជាការបំពាននឹងច្បាប់របស់រដ្ឋ ដែលហាមដាច់ខាតមិនអនុញាតឲ្យតាមបណ្ដាកាស៊ីណូនានា ប្រើប្រាសប្រាក់រៀល ដើម្បីទូទាត់ក្នុងការប្រព្រឹត្តល្បែងស៊ីសងឡើយ ។ ប៉ុន្តែព័ត៌មាននេះ មិនទាន់មានមូលដ្ឋានជាក់លាក់នៅឡើយទេ ព្រោះស្ថិតក្នុងការស៊ើបអង្កេតនៅឡើយ។
កាលពីចុងខែវិច្ឆិកាកន្លងទៅនេះ លោកឧត្តមសេនីយត្រី ជេត វណ្ណនី ស្នងការរងខេត្ត បានប្រាប់កោះសន្តិភាពថា ក្រោយពីបែកធ្លាយនូវបនល្បែងជ្រោកក្រោមស្លាកកាស៊ីណូខាងលើនេះ លោកស្នងការខេត្តបានចេញបញ្ជាឲ្យសមត្ថកិច្ចមូលដ្ឋានចុះស្រាវជ្រាវសួរនាំអំពីច្បាប់ទម្លាប់។ ប៉ុន្តែរហូតមកដល់ពេលនេះ ហាក់គ្មានការស៊ើបអង្កេតណាមួយត្រូវបានធ្វើឡើងឡើយ។
ផ្ទុយទៅវិញ បនល្បែងទាំងនោះនៅតែបើកទ្វារដំណើរការយ៉ាងរលូន ដោយមិនរំខានដល់អាជ្ញាធរឬលោកស្នងការខេត្តឡើយ។ ជាមួយគ្នានេះមតិនានា ក៏បានលើកឡើងដែរថា បនល្បែងដែលជ្រោកក្រោមស្លាកកាស៊ីណូខាងលើនេះគ្មានឈ្មោះនៅក្នុងអាជ្ញាប័ណ្ណរបស់កាស៊ីណូទេ។ ល្បែងទាំងនេះគ្រាន់តែបន្លំខ្លួន សម្ងំជ្រោកក្រោមកន្ទុយកាស៊ីណូតែប៉ុណ្ណោះ។ មានមន្ត្រីខិលខូចមួយចំនួនក៏កំពុងធ្វើជាបង្អែក នៃបទល្មើសនេះដែរ ។
លោកឧត្តមសេនីយត្រី ជេត វណ្ណនី មិនបានបកស្រាយយ៉ាងណាទៀតទេ ជុំវិញបនល្បែងស៊ីសងគ្មានច្បាប់ ជ្រោកក្រោមស្លាកកាស៊ីណូ«PARIS» នេះ។ លោកគ្រាន់តែបញ្ជាក់ជាថ្មីថា «មិនទាន់មានការសួរនាំអ្វីនៅឡើយទេ»។ ប៉ុន្តែលោកបានប្រាប់ថា «បើតាមព័ត៏មានខ្លះៗ បនល្បែង នេះទំនងគ្មានច្បាប់មែន»។
ដោយឡែក ពាក់ព័ន្ធនឹងកាស៊ីណូនេះ កំពុងធ្វើចរាចរណ៍ប្រាក់រៀលបំពានច្បាប់នោះ លោកជេត វណ្ណនី បានមានប្រសាសន៍ដែរថា «ខ្ញុំក៏បានទទួលព័ត៌មាននេះដែរ តែពេលនេះ ខ្ញុំកំពុងរកវិធីសាស្ត្រ ដើម្បីធ្វើការងារនេះហើយ» ប៉ុន្តែលោកមិនបាននិយាយអំពីវិធានការបង្ក្រាបបនល្បែងខុសច្បាប់នេះទេ ។
លោកឧត្តមសេនីយទោ អ៊ុច សុខុន ស្នងការខេត្តបាត់ដំបង ធ្លាប់ពឹងពាក់ឲ្យអ្នកសារព័ត៏មាន ជួយទម្លុះទម្លាយនូវរាល់បទល្មើសទាំងឡាយ ឬភាពអសកម្មនានារបស់សមត្ថកិច្ច ដើម្បីឲ្យលោកបានដឹងនិងមានវិធានការ ។ លោកឧត្តមសេនីយ៍បានផ្ដល់បទសម្ភាសន៍បែបនេះ តាំងពីអំឡុងដើមឆ្នាំ២០១៨ ក្រោយពេលលោកទើបចូលកាន់ដំណែងជាស្នងការខេត្ត ទើបតែបានប៉ុន្មានខែប៉ុណ្ណោះ ។
លោកស្នងការខេត្តបានអំពាវបែបនេះ ដោយសារតែកាលណោះ មានការបែកធ្លាយថា មានមន្ត្រីខិលខូចមួយចំនួនបានឃុបឃិតលួចបើកល្បែងស៊ីសង រួចធ្វើរបាយការណ៍ភូតកុហក់ថា គ្មានល្បែងស៊ីសង ឬគ្មានបទល្មើសអ្វីទេ ។ មិនតែប៉ុណ្ណោះ មានមន្ត្រីកំហូចខ្លះយកឈ្មោះលោកទៅប្រើប្រាស ដើម្បីជាប្រយោជន៏ទៀតផង ដែលលោកមិនបានដឹងខ្លួនសោះ ។
លោកឧត្តសេនីយទោ អ៊ុច សុខុន បានមានប្រសាសន៍ដូច្នេះថា «ខ្ញុំមកដល់បាត់ដំបងនេះ តែ២នាក់តៃកុងឡានខ្ញុំទេ គ្មានសាច់ញាតិនៅទីនេះ ហើយក៏គ្មានអូសមនុស្សផ្សេងមកតាមដែរ ។ ដូច្នេះ បើមានដូចសារព័ត៌មានមួយចំនួនចុះផ្សាយថា មានមន្ត្រីខិលខូចយកឈ្មោះខ្ញុំទៅប្រើ ដើម្បីប្រព្រឹត្តបទល្មើស សូមជួយប្រាប់ខ្ញុំផង..»។
ផ្ទុយទៅវិញ រហូតមកដល់ពេលនេះ បើតាមការកត់សម្គាល់ គឺនៅតែមានមន្ត្រីខិលខូចមួយចំនួនលួចបើកល្បែងស៊ីសង ឬធ្វើជាខ្នងបង្អែកនៃបទល្មើលនេះដដែល ។ មិនតែប៉ុណ្ណោះ មន្ត្រីជំនាញមួយចំនួន ថែមទាំងព្យាយាមជួយបិតបាំង និងរាយការណ៍ភូតកុហក់ថ្នាក់ដឹកនាំទៀតផង រីឯលោកស្នងការខេត្ត ហាក់មិនមានចំណាត់ការទៅលើមន្ត្រីកំហូចទាំងនោះ ជាដុំកំភូនអ្វីដែរ ដែលធ្វើឲ្យមន្ត្រីទាំងនោះរឹតតែបានដៃ ឃុំឃិតលួចប្រព្រឹត្តបទល្មើសដដែល។
ទោះយ៉ាងណាពេលនេះ គេនៅចាំតាមដានមើលថា តើលោកស្នងការខេត្ត និងមានចំណាត់ការបែបនេះ ជុំវិញបនល្បែងស៊ីសងគ្មានច្បាប់ ជ្រោកក្រោមស្លាកកាស៊ីណូ ស្រុកសំពៅលូន ដែលកំពុងអូសទាញប្រជាកសិករខ្មែរ ឱ្យសម្រុកចូលលេងយ៉ាងគគ្រឹកគគ្រេងរាល់ថ្ងៃនេះ ។ ព្រោះបើតាមប្រភពព័ត៌មានបានទម្លាយឲ្យដឹងថា បច្ចុប្បន្ន អាជ្ញាធរ និងសមត្ថកិច្ចនៅក្នុងស្រុកសំពៅលូននេះ កំពុងព្យាយាមបិតបាំង និងជួយការពារសម្បើមដៃណាស់ជាថ្នូរនឹងប្រាក់សំណូកប្រចាំខែ ៕
ចែករំលែកព័តមាននេះ