ខេត្តកណ្ដាល ៖ បុរសម្នាក់បានទៅអង្គុយដោតឌុយភ្លើងម៉ូទ័របូមទឹក ដើម្បីឲ្យក្មួយប្រុស និងប្រពន្ធបាញ់ លាងសម្អាតរោងមាន់ ហើយក៏ស្រាប់តែលែងក្រោករហូត។ ខណៈនោះប្រពន្ធបានស្រែកសួរ និងហៅជាច្រើដង ក៏មិនឮឆ្លើយតបទៀត ដោយមានការសង្ស័យប្រពន្ធបានដើរទៅមើលឃើញគាត់ស្លាប់ ដោយខ្សែភ្លើងឆក់បាត់ ទៅហើយ គឺស្លាប់ទាំងអង្គុយតែម្ដង។ ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាម៉ោង ៥ និង២០នាទីល្ងាច ថ្ងៃទី៥ ខែធ្នូ ឆ្នាំ២០១៨ នៅចំណុចក្នុងរោងចិញ្ចឹមមាន់ ដែលមានទីតាំងស្ថិតនៅក្នុងភូមិខ្នារ ឃុំទួលព្រិច ស្រុកអង្គស្នួល ខេត្តកណ្តាល។
បុរសរងគ្រោះម្នាក់នោះឈ្មោះ ផន ផាន អាយុ៤៦ឆ្នាំ ជនជាតិខ្មែរ មុខរបរចិញ្ចឹមមាន់ មានទីលំនៅក្នុងភូមិកើតហេតុខាងលើ មានប្រពន្ធឈ្មោះ ស្រស់ សារ៉ុម អាយុ៤៩ឆ្នាំ ជនជាតិខ្មែរ មុខរបរចិញ្ចឹមមាន់ និងមានកូនបីនាក់ ស្រីម្នាក់ និងប្រុស២នាក់នៅក្នុងបន្ទុកគ្រួសារ។ តាមប្រភព័ត៌មាន បានឲ្យដឹងថា នៅមុនពេលកើតហេតុរូបគាត់រួមជាមួយប្ដី និងក្មួយម្នាក់បាននាំគ្នាលាងសម្អាតរោងមាន់ ហើយខណៈនោះប្តីរបស់គាត់ជាអ្នកដើរទៅដោតឌុយភ្លើងម៉ូទ័រដើម្បីបូមទឹកឲ្យរូបគាត់ និងក្មួយបាញ់លាងរោងមាន់ ខាងលើ។ ខណៈនោះម៉ូទ័របានដំណើរការអាចបាញ់ទឹកបានហើយ ប៉ុន្តែបែរជាមិនឃើញប្ដីគាត់ក្រោកដើរចេញ ពីម៉ូទ័រនោះសោះគឺនៅអង្គុយមួយកន្លែងដោយអត់កម្រើកសូម្បីបន្តិចឡើយ។
ស្ត្រីរូបនេះបានបន្តថា ខណៈនោះគាត់ក៏ស្រែកហៅ និងសួរទៅប្ដីថា «មិចហើយឯង» ប៉ុន្តែគាត់មិនបានទៅមើលប្ដីទេ បន្ទាប់មកក៏បាន គាត់ និងក្មួយបាននាំគ្នាលាងរោងមាន់យ៉ាងញាប់ដៃញាប់ជើង។ លុះមួយសន្ទុះក្រោយមកគាត់បានក្រឡេកមើល ទៅប្តីម្ដងទៀតក៏ឃើញនៅតែអង្គុយកន្លែងដដែលមិនទាន់ក្រោយចេញទៀត។ ពេលនោះដោយមានការសង្ស័យ គាត់បានដើរសំដៅទៅរកប្តីស្រែកសួរជាលើកទី២ទៀតថា «មិចហើយឯង» ប៉ុន្តែប្ដីនៅតែមិនឆ្លើយតបដដែលទៀត។ ទើបគាត់ចូលទៅទាញប្តីគាត់ស្រាប់តែត្រូវចរន្តអគ្គីសនីឆក់ដែរ ទើបដឹងថា ប្ដីបានស្លាប់ដោយសារចរន្តអគ្គិសនី ឆក់បាត់ទៅហើយ។
ដែលជាហេតុបង្កឲ្យគាត់មានការតក់ស្លុតយ៉ាងខ្លាំងរួចបានស្រែកហៅ សាច់ញាតិ និងអ្នកភូមិឲ្យជួយព្រមទាំងរាយការណ៍ជូនអាជ្ញាធរ និងនគរបាលប៉ុស្តិ៍ទួលព្រិច។ នគរបាលបានឲ្យដឹងថា ក្រោយទទួលបានដំណឹងនោះកម្លាំងនគរបាលផ្នែកពិនិត្យ និងវិភាគកន្លែងកើតហេតុ នៃអធិការដ្ឋាននគរបាល ស្រុកអង្គស្នួល បានចុះទៅកាន់កន្លែងកើតហេតុ។ ដោយពេលនោះក៏មានចូលរួមពីលោក ក្រុមប្រឹក្សាឃុំ លោកគ្រូពេទ្យ លោកមេភូមិ និងនគរបាលប៉ុស្តិ៍ ព្រមទាំងប្រពន្ធ និងបងប្អូនជនរងគ្រោះ។ បានធ្វើការពិនិត្យ លើសាកសពជនរងគ្រោះហើយបានឃើញមានមានស្នាម រលាត់ស្បែក លើដើមទ្រូងខាងស្ដាំ និងប្រអប់ដៃខាងស្តាំ ព្រមទាំងកំភួនដៃខាងឆ្វេង ដោយសារចរន្តអគ្គីសនីឆក់។បន្ទាប់មកសមត្ថកិច្ចបានប្រគល់សពជូនក្រុមគ្រួសារយក ទៅធ្វើបុណ្យតាមប្រពៃណី៕
ចែករំលែកព័តមាននេះ