ខេត្តកំពត ៖ ករណីទី១-មានហេតុការគ្រោះថ្នាក់ចរាចរមួយបានកើតឡើងនៅលើកំណត់ផ្លូវជាតិលេខ៣កំពត-ខេត្តព្រះស៊ីហនុ ត្រង់ចំណុចភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត បង្កឡើងរវាងម៉ូតូនឹងរថយន្ត បើកបរក្នុងទិសដៅបញ្ច្រាសគ្នា ចន្លោះគីឡូម៉ែត្រលេខ១៧២-១៧៣ ស្ថិតក្នុងចំណុចភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។ សមត្ថកិច្ចនគរបាលចរាចរខេត្តបានឲ្យដឹងថា ក្នុងហេតុការណ៍គ្រោះថ្នាក់ចរាចរខាងលើបង្កឡើងដោយរថយន្តម៉ាកលុចស៊ីស R X-៣០០ ពណ៌ទឹកមាស ពាក់ស្លាកលេខ ២J-៦៤៤៨ បើកបរក្នុងទិសដៅពីកើតទៅលិច អ្នកបើកបរមិនស្គាល់អត្តសញ្ញាណ ក្រោយពេលកើតហេតុបានរត់គេចខ្លួនបាត់។
ម៉ូតូរងគ្រោះម៉ាកសេ១២៥ ស៊េរី២០១៥ ពណ៌ខ្មៅ ពាក់ស្លាកលេខ កំពត ១T-២៩៧៣ បើកបរដោយឈ្មោះ សិត ធី ភេទប្រុស អាយុ៤៧ឆ្នាំ រស់នៅភូមិខ្ជាយលើ ឃុំស្រែជាខាងត្បូង ស្រុកដងទង់ ខេត្តកំពត ក្នុងទិសដៅពីលិចទៅកើត បានរងរបួសបាក់ចង្កេះ និងអ្នករួមដំណើរ២នាក់ ទី១/ឈ្មោះ ពៅ ស្រីពេជ្រ ភេទស្រី អាយុ៤៨ឆ្នាំ (ជាប្រពន្ធ) រងរបួសបាក់ជើងម្ខាង ទី២/ឈ្មោះ សុត សីម ភេទប្រុស អាយុ៤២ឆ្នាំ បានរងរបួសបាក់ជើង អ្នកទាំង៣រស់នៅភូមិឃុំជាមួយគ្នាខាងលើ ត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តកំពត។
រថយន្ត និងម៉ូតូជនរងគ្រោះត្រូវបានសមត្ថកិច្ចនាំទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលខេត្ត រង់ចាំដោះស្រាយនៅពេលក្រោយ។ ករណីទី២៖ មានហេតុការណ៍គ្រោះថ្នាក់ចរាចរមួយកើតឡើងនៅលើកំណាត់ផ្លូវ ចូលទៅរមណីដ្ឋានទឹកឈូ ត្រង់ចំណុចមុខផ្ទះលោក ងួនស៊ីម មេបញ្ជាការផ្នែកសឹងរងក្រុងកំពត ស្ថិតក្នុងភូមិអូរតូច សង្កាត់អណ្តូងខ្មែរ ក្រុងកំពត កាលពីវេលាម៉ោង៧ និង២៥នាទី យប់ថ្ងៃទី៤ ខែធ្នូ ឆ្នាំ២០១៨ បង្កឡើងរវាងម៉ូតូនឹងម៉ូតូ។
សមត្ថកិច្ចចរាចរក្រុងបានឲ្យដឹងថា មុនពេលកើតហេតុមានម៉ូតូមួយគ្រឿងម៉ាកសេ១២៥ ពណ៌ខ្មៅ ពាក់ស្លាកលេខ កំពត ១M- ៥៥៣៦ បើកបរដោយឈ្មោះ សែម វណ្ណឌី ភេទប្រុស អាយុ២៨ឆ្នាំ រស់នៅភូមិតាដឹប សង្កាត់អណ្តូងខ្មែរ ក្រុងកំពត បានបើកម៉ូតូចេញពីផ្ទះលក់ចាប់ហួយឆ្លងផ្លូវក្នុងទិសដៅពីលិចទៅកើតកាត់ទទឹងផ្លូវ លុះដល់ចំណុចលើផ្លូវ ក៏បានបុកម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ព្រះស៊ីហនុ ១E-៦៥២១ ដែលរត់ផ្លូវត្រង់បើកបរដោយឈ្មោះ អ៊ូច ទេពវុទ្ឋី ភេទប្រុស អាយុ៥៨ឆ្នាំ រស់នៅភូមិទ្វីខាងជើង សង្កាត់អណ្តូងខ្មែរ ក្រុងកំពតក្នុងទិសដៅពីជើងទៅត្បូង។ បណ្តាលឲ្យរងរបួសធ្ងន់ហើយត្រូវបានដឹកទៅសង្គ្រោះនៅមន្ទីរពេទ្យបង្អែកភ្លាមៗដែរ ម៉ូតូសមត្ថកិច្ចបាននាំទៅរក្សាទុកនៅអធិការដ្ឋានក្រុងរង់ចាំដោះស្រាយពេលក្រោយ៕
ចែករំលែកព័តមាននេះ