រាជធានីភ្នំពេញ ៖ ផ្ទះមួយល្វែងនៅក្នុងបុរីចំការមនត្រូវបានអណ្តាតភ្លើងឆាបឆេះទាំងម្ចាស់ផ្ទះដេកលង់លក់បណ្តាលអោយមនុស្សប្រុសស្រី២នាក់រងរបួសធ្ងន់ ហេតុការណ៍នេះបានបង្កអោយមានការភ្ញាក់ផ្អើលឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៥ ខែធ្នូ ឆ្នាំ២០១៨ ក្នុងបុរីចំការមន ផ្ទះលេខ G17 សង្កាត់ទន្លេបាសាក់…
រាជធានីភ្នំពេញ ៖ ផ្ទះមួយល្វែងនៅក្នុងបុរីចំការមនត្រូវបានអណ្តាតភ្លើងឆាបឆេះទាំងម្ចាស់ផ្ទះដេកលង់លក់បណ្តាលអោយមនុស្សប្រុសស្រី២នាក់រងរបួសធ្ងន់ ហេតុការណ៍នេះបានបង្កអោយមានការភ្ញាក់ផ្អើលឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៥ ខែធ្នូ ឆ្នាំ២០១៨ ក្នុងបុរីចំការមន ផ្ទះលេខ G17 សង្កាត់ទន្លេបាសាក់ ខណ្ឌចំការមន ។ ជនរងគ្រោះរួមនឹងម្ចាស់ផ្ទះមិនបានអោយស្គាល់អត្តសញ្ញាណនោះទេ ។
បើតាមប្រភពពីប្រជាពលរដ្ឋដែលរស់នៅជិតខាងបានអោយដឹងថា មុនពេលកើតហេតុពួកគាត់បានចូលគេងដូចសព្វដង លុះដល់ម៉ោងកើតហេតុពួកគាត់មានអារម្មណ៍ឆ្ងៀមផ្សែងពេលនោះដែរពួកបានចេញមកមើលក៏ស្រាប់តែឃើញមានផ្សែងហុយខ្មួលខ្មាញចេញពីផ្ទះកើតហេតុខាង លើតែមិនដឹងថា ហុយចេញពីជាន់ណានោះទេ ពីព្រោះផ្ទះនោះមានកំពស់បីជាន់ហើយក៏មិនដឹងថា មានមនុស្សរស់នៅប៉ុន្មាននាក់ដែរ ។
ពេលដែលមានផ្សែងហុយខ្មួលខ្មាញកាន់តែខ្លាំងព្រមទាំងមានអណ្តាតភ្លើងសន្ធោសន្ធៅហើយមនុស្សរស់នៅក្នុងផ្ទះអត់មានអ្នកដឹងខ្លួនទេ ពីព្រោះដេកលង់លក់អស់ទើបពួកគាត់ជាអ្នកជិតខាងបាននាំគ្នាស្រែកផ្អើលឆោឡោដល់សន្តិសុខដែលយាមនៅក្នុងបុរីយកបំពង់ពន្លត់អគី្គភ័យទៅបាញ់អស់ច្រើនបំពង់ តែមិនអាចទប់ស្កាត់បានទេធ្វើអោយអណ្តាតភ្លើងឆេះរាលដាលរហូតដល់ជាន់ទី២ ទើបពួកគាត់បានរាយការណ៍ទៅប្រាប់សមត្ថកិច្ចព្រមទាំងរថយន្តពន្លត់អគី្គភ័យមកជួយអន្តរាគមន៍ ។
ខណៈពេលរថយន្តពន្លត់អគី្គភ័យព្រមទាំងសមត្ថកិច្ច មន្ត្រីកងរាជអាវុធហត្ថខណ្ឌចំការមន ចុះទៅកន្លែងកើតហេតុបែរជាខាងសន្តិសុខដែលយាមនៅទីនោះរាងរាំងមិនអោយចូលទេទុករហូតទាល់តែភ្លើងឆេះរាលដាលខ្លាំងឡើងៗទើបព្រមឲ្យរថយន្តពន្លត់អគ្គីភ័យ និងសមត្ថកិច្ចចូលទៅជួយអន្តរាគមន៍បាញ់ទឹកហើយសមត្ថកិច្ចកំពុងតែរុករកម្ចាស់ផ្ទះស្រាប់តែមានបុរសម្នាក់ដោយសារតែក្តៅខ្លាំងពេកពិបាកដកដង្ហើមបានសម្រេចចិត្តលោតពីលើផ្ទះជាន់ទី២មកទាំងខ្លួនប្រាណឆេះរោលរលាកពេញខ្លួនប្រាណបណ្តាលឲ្យរងរបួសធ្ងន់ធ្ងរ ។ ចំណែកស្ត្រីម្នាក់ទៀតត្រូវបានរថយន្តសង្គ្រោះដឹកយកទៅព្យាបាលភ្លាមៗពេលដែលសមត្ថកិច្ចចូលទៅជួយអន្តរាគមន៍ភ្លាមៗ ។
ចំពោះការសន្និដ្ឋានរបស់សមត្ថកិច្ចគឺជំហានដំបូងគឺមកពីឆ្លងចរន្តអគ្គីសនី ហើយចំពោះករណីអ្វីផ្សេងទៀតសមត្ថកិច្ចកំពុងតែធ្វើការស្រាវជ្រាវ ហើយទំហំនៃការខូចខាតគឺឆេះសម្ភារទាំងស្រុងនៅក្នុងផ្ទះតែម្តង ព្រមទាំងធ្វើអោយមនុស្សប្រុសស្រី២នាក់រងរបួសធ្ងន់ ។
ជាចុងក្រោយសមត្ថកិច្ចបានសំណូមពរដល់ម្ចាស់បុរីក៏ដូចជាសន្តិសុខដែលយាមនៅទីនោះសូមមេត្តាជួយសហការជាមួយនឹងកម្លាំងសមត្ថកិច្ចផងចៀសវាងមានរឿងបែបនេះកើតឡើងទៀត ៕
ចែករំលែកព័តមាននេះ