ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានបង្ហាញដល់បណ្តាញសារព័ត៌មាន និងសារធារណជនឱ្យដឹងថា កាលពីពេលថ្មីៗកន្លងមកនេះ មានសារព័ត៌មានតាមអនឡាញមួយចំនួនតូច បានបង្ហោះរូបភាពក្រុមបុរស…
ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានបង្ហាញដល់បណ្តាញសារព័ត៌មាន និងសារធារណជនឱ្យដឹងថា កាលពីពេលថ្មីៗកន្លងមកនេះ មានសារព័ត៌មានតាមអនឡាញមួយចំនួនតូច បានបង្ហោះរូបភាពក្រុមបុរស ដែលមានសាក់រូបពេញខ្លួនជាច្រើននាក់ ខ្លះកាន់កាំបិត ខ្លះកាន់អាវុធផ្សេងៗទៀត ប្រៀបដូចជាក្រុមអ្នកលេងគួរឱ្យខ្លាចថា គឺជាក្រុមជនជាតិចិនរស់នៅកម្ពុជា ។
លោកថ្លែងថា មិនមែនចិននៅកម្ពុជាទេ តាមពិតក្រុមទាំងនេះ គឺជាជនជាតិវៀតណាម ហើយម្ចាស់គណនីហ្វេសប៊ុកឈ្មោះ GIA DINH VUI TINH ដែលជារឿយៗបានបង្ហោះរូបក្រុមនេះ ដើម្បីបង្អួតសាក់ ដាក់បណ្តាញសង្គមហ្វេសប៊ុក មិនមែនជាក្រុមអ្នកលេងនោះទេ ។ ប៉ុន្តែជាអកុសលត្រូវសារព័ត៌មានតាមអនឡាញមួយក្តាប់តូច បានព្យាយាមបំពុលសង្គមខ្មែរយើង ឱ្យអាប់អួរមិនស្រាកស្រាន្ត ។
លោកឧត្តមសេនីយ៍ស្នងការនគរបាលខេត្តបានអំពាវនាវដល់សារធាណជន មេត្តាយកចិត្តទុកដាក់ពិនិត្យឱ្យបានច្បាស់លាស់ មុននិងវាយតម្តៃទៅលើរូបភាពទាំងនោះ និងសូមឱ្យបងប្អូនជនរួមជាតិមេត្តាមានស្មារតីខ្ពស់ក្នុងការលើកតម្កើងថែរក្សាកិត្តិយស មុខមាត់ និងសេចក្តីថ្លៃថ្នូររបស់ប្រទេសជាតិទាំងមូល ។
តាមការកត់សម្គាល់ ការសាក់លើរាងកាយ វាជាចំណង់ចំណូលចិត្តរបស់បុគ្គល…ជាតិសាសន៍ណា ក៏ដូចជាតិសាសន៍ណាដែរ ។ លើការនិយមស្ថិតនៅលើចរិតរបស់ខ្លួនគេ ។ ជាតិសាសន៍ខ្មែរយើង ខ្លះសាក់ទៅតាមជំនឿផ្សេងៗ… សាក់សម្តែងឫទ្ធិ ជឿមន្តអាគម កាប់មិនមុត ដុតមិនឆេះ…ឃើញខ្លះសាក់ពេញខ្លួន សម្តែងថាមានមន្តអាគម…ជាអ្នកខ្លាំងអាចធ្វើឱ្យគេខ្លបខ្លាច ក៏មានដែរ ។ ខ្លះសាក់បញ្ចេញមន្តស្នេហ៍ ខ្លះសាក់លើក្បាលពោះ គឺគេសាក់តាមការស្រឡាញ់ ។ កុំឃើញរូបសាក់ទាំងអស់លើរាងកាយ ហើយចោទថា ជាអ្នកកោងកាច ជាអ្នកលេង ប្រាកដជាការវាយតម្លៃនោះវាអសីលធម៌ពេក ។
បញ្ហាទាក់ទងទៅនឹងជនជាតិចិនពេលនេះកំពុងក្លាយជាការលាបពណ៌ពីសំណាក់ក្រុមអ្នកមិនសប្បាយចិត្តចំពោះកំណើនយ៉ាងគំហុកនៅកម្ពុជា ដោយពួកគេបានលើកយកតែទង្វើអវិជ្ជមានមួយចំនួនមកបំប៉ោង និងធ្វើការស្តីបន្ទោសទៅដល់រាជរដ្ឋាភិបាលថា បណ្តែតបណ្តោយឱ្យក្រុមជនជាតិចិនប្រព្រឹត្តិនូវទង្វើល្មើសច្បាប់នានា បង្កភាពអនាធិបតេយ្យ ធ្វើឱ្យសន្តិសុខសណ្តាប់ធ្នាប់ និងសង្គមខ្មែរច្របូកច្របល់ ។ ទោះបីជាបែបណាក្តី មតិមួយជ្រុងនោះមិនបានបង្ហាញពីសញ្ញាវិជ្ជមានទាក់ទងនឹងជនជាតិចិននោះទេ ។
ជាការពិតខ្មែរ ម្ចាស់ស្រុកដែលឈរលើស្មារតីទទួលខុសត្រូវ សូមមានសុភវិនិច្ឆ័យឱ្យបានត្រឹមត្រូវពីបញ្ហានេះផងដែរ ។ ជាតិសាសន៍ណាក៏ មានល្អមានអាក្រក់ដែរ សូម្បីតែខ្មែរយើងក៏មានល្អ មានអាក្រក់ដូចគ្នា ។ ដូច្នេះសួរថា តើបញ្ហាដែលបង្កដោយជនជាតិចិនកន្លងមកកំពុងធ្វើឱ្យសង្គមខ្មែរជួបនូវផលលំបាកធ្ងន់ធ្ងរហួសហេតុពេកមែនឬ ?
ការពិតរឿងរ៉ាវមួយចំនួន ដែលបានកើតឡើងនោះ វាអាស្រ័យលើការគ្រប់គ្រងរបស់សមត្ថកិច្ច និងអាជ្ញា ធររបស់យើងតែប៉ុណ្ណោះថា តើមានសមត្ថភាពកម្រិតណា យកច្បាប់មកអនុវត្តន៍បានកម្រិតណា ក្នុងការគ្រប់គ្រងជនបរទេសទាំងនេះ ?
អគ្គស្នងការដ្ឋាននគរបាលជាតិបដិសេធទាំងស្រុងចំពោះវីដេអូកាប់ចាក់គ្នាបង្ហោះតាមហ្វេសប៊ុកដែលថាកើតឡើងនៅភ្នំពេញ គឺជាវីដេអូកាត់ត អ្នកនាំពាក្យអគ្គស្នងការដ្ឋាននគរបាលជាតិ បានបដិសេធចោលទាំងស្រុងនូវវីដេអូឃ្លីបមួយ ដែលបានបង្ហោះចែកចាយគ្នាក្នុងបណ្ដាញសង្គមបង្ហាញពីរូបភាពឃោរឃៅកាប់ចាក់គ្នា ហើយដែលគេអះអាងថាកើតនៅរាជធានីភ្នំពេញ ដោយក្រុមជនជាតិចិន ។
អ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា «វីដេអូដែលបង្ហោះតាមបណ្តាញសង្គមនេះ មិនមែនជាការពិតដូចមាននៅក្នុងវីដេអូឃ្លីបនេះឡើយ ។ តាមការពិនិត្យរបស់សមត្ថកិច្ចនៃក្រុមជំនាញបានបញ្ជាក់ថា វីដេអូនេះមានការកាត់តរូបភាពក្នុងចេតនាបំពុលបរិយាកាសសង្គម បង្កឲ្យមានការភ័ន្តច្រឡំ និងបង្កើតឲ្យមានការរើសអើងពូជសាសន៍(ជនជាតិចិន)ក្នុងប្រទេសកម្ពុជា» ។
អ្នកនាំពាក្យអគ្គស្នងការដ្ឋាននគរបាលជាតិ បានសង្កត់ធ្ងន់ថា រឿងនេះមិនមែនកើតឡើងក្នុងប្រទេសកម្ពុជាឡើយ ។ ចំណែកសំឡេងដែលបានថតក្នុងសាច់រឿងនោះគឺជាសំឡេងថតបញ្ចូលធ្វើឲ្យមានការយល់ច្រឡំ ក្នុងបំណងចង់បំពុលបរិយាកាសសន្តិសុខ ៕
ចែករំលែកព័តមាននេះ