រាជធានីភ្នំពេញ ៖ សមាជិកក្រុមចោរប្លន់កាំភ្លើងអាកាទី១៣ បានត្រូវចាប់ខ្លួនហើយបើតាមមន្ដ្រីប៉ូលិសថា នៅមានបក្សពួកច្រើននាក់ទៀតដែលសមត្ថកិច្ចកំពុងបន្ដតាមចាប់ខ្លួនដោយមិនដកដៃឡើយ ។ ក្រុមចោរនេះបានបែកសំបុកបន្ទាប់ពីមានការប៉ុនប៉ងប្លន់ថៅកែទឹកកកនិងអ្នកលក់មាសនៅផ្សារត្រែងត្រយឹង ស្រុកភ្នំស្រួច ខេត្ដកំពង់ស្ពឺ ហើយត្រូវបានសមត្ថកិច្ចក្រសួង និងខេត្ដសហការគ្នាចាប់ខ្លួន។សមាជិកម្នាក់នេះចាត់ទុកជាជនទី១៣ ដែលត្រូវបានចាប់ខ្លួននៅខេត្ដបាត់ដំបង ហើយក៏ស្ថិតក្នុងចំណោមបក្សពួកជាង២០នាក់ ។ ចំពោះមេខ្លោងក្រុមចោរនេះត្រូវបាញ់ឱ្យរបួសជើង និងបានចាប់ខ្លួនរួមជាមួយសមាជិកសរុប១៣នាក់ ហើយគិតត្រឹមពេលនេះ ។ ជនសង្ស័យដែលត្រូវចាប់ខ្លួនលើកទី ១៣នេះឈ្មោះស៊ិន ស៊ាន ហៅអាន ហៅឪអាអាត មានទីលំនៅក្នុងភូមិថ្មី ឃុំតាគ្រាម ស្រុកបាណន់ ខេត្ដបាត់ដំបង មុខរបរមិនពិតប្រាកដ ។ តាមចំលើយរបស់ជននេះ គឺធ្លាប់ប្លន់នៅខេត្ដតាកែវ១លើក កំពត២លើក បាត់ដំបង២លើក ដោយប្រើកាំភ្លើងអាកា និងមានមេខ្លោងឈ្មោះហេង ស ដែលត្រូវសមត្ថកិច្ចបាញ់បាក់ជើងក្នុងកិច្ចប្រតិបត្ដិការ។
ការតាមប្រមាញ់ជនទី១៣នៃក្រុមដែលមានគំរោងប្លន់ថៅកែទឹកកកនៅផ្សារត្រែងត្រយឹង គឺដឹកនាំដោយលោកឧត្ដមសេនីយ៍ត្រី ឡឹក វណ្ណៈ អនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ និងលោកវរសេនីយ៍ទោជេត វន្នី ។ ក្រោយពីចាប់ខ្លួនជនសង្ស័យត្រូវបាននាំពីខេត្ដបាត់ដំបងមកកាន់ក្រសួងមហាផ្ទៃ និងបានប្រគល់ឱ្យទៅស្នងការដ្ឋាននគរបាលខេត្ដតាកែវកសាងសំណុំរឿងបញ្ជូនទៅតុលាការ ។ គួររំលឹកថាកាលពីវេលាម៉ោង៧យប់ ថ្ងៃទី១២ មេសា ២០១០ ចោរ១ក្រុមមាន គ្នា១២នាក់ ប្រដាប់ដោយកាំភ្លើងអាកា និងគ្រាប់បែកដៃ១គ្រាប់បានជួបជុំគ្នានៅក្នុងវត្ដត្រែងត្រយឹងរៀបគំរោងប៉ុនប៉ងប្លន់ថៅកែលក់ទឹកកក និងអាជីវករលក់និងប្ដូរប្រាក់ ប៉ុន្ដែផែនការនោះបានបែកធ្លាយដឹងដល់សមត្ថកិច្ចនាយកដ្ឋាននគរបាលក្រសួងមហាផ្ទៃ និងស្នងការដ្ឋាននគរបាលខេត្ដកំពង់ស្ពឺ ។
ដោយមានរបាយការណ៍ច្បាស់លាស់ពីគំរោងប្លន់របស់ចោរកាំភ្លើងអាកា១ក្រុមនេះ លោកនាយឧត្ដមសេនីយ៍ផ្កាយមាស៤នេត សាវឿន អគ្គស្នងការនគរបាលជាតិបានដាក់បទបញ្ជាយ៉ាងម៉ឺងម៉ាត់ដល់លោកឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលនគរបាលយុត្ដិធម៌ឱ្យប្រើប្រាស់កំលាំងជំនាញនាយកដ្ឋានព្រហ្មទណ្ឌក្រសួងសហការជាមួយស្នងការដ្ឋានខេត្ដកំពង់ស្ពឺចេញទៅបង្ក្រាបក្រុមចោរ មានគំរោងប្លន់នេះនៅនឹងកន្លែងជាក់ស្ដែងបាន២នាក់ដោយបាញ់មេខ្លោងឱ្យរបួសបាក់ជើងដកហូតបានអាវុធអាកា១ដើម និងម៉ូតូ១គ្រឿង ។ លុះនៅថ្ងៃទី១៣មេសា មានការសហការជាមួយស្នងការដ្ឋាននគរបាលរាជធានីភ្នំពេញចាប់បាន៥នាក់ទៀត និងដកហូតបាន អាវុធអាកាចំនួន៣ដើមគ្រាប់បែកដៃ១គ្រាប់ និងគ្រាប់កាំភ្លើងអាកាជាង១០០គ្រាប់។ នៅថ្ងៃទី១៩ មេសា ដោយសហការជាមួយស្នងការដ្ឋាននគរបាលខេត្ដមួយចំនួន ចាប់បានសមាជិក៥នាក់ទៀត ក្នុងនោះមានស្ដ្រីម្នាក់ ជាអ្នកលក់គ្រាប់ និងអាវុធឱ្យក្រុមចោរប្លន់១ក្រុមនេះផង លុះមកដល់ពេលនេះចាប់បានម្នាក់ទៀត ដូច្នេះសរុប១៣នាក់ហើយ ។ តាមចំលើយរបស់ក្រុមចោរប្រើប្រាស់កាំភ្លើងអាកានេះ កន្លងមកធ្លាប់ប្លន់មិនតិចជាង២២លើកនោះទេ ដែលភាគច្រើនប្លន់តាមបណ្ដាខេត្ដ ។
ជនទាំង១៣នាក់នេះមាន ១- ឈ្មោះហេង ស ជាមេខ្លោងត្រូវសមត្ថកិច្ចបាញ់ បាក់ជើង, ២-ឈ្មោះ ឆៃ រ៉ា, ៣-ឈ្មោះញ៉ែម រ៉ូ, ៤-ឈ្មោះ មួង ម៉ៅ, ៥-ឈ្មោះសេង អូន, ៦-ឈ្មោះ យ៉ាវ វៃ ហៅជ្រូក, ៧-ឈ្មោះខាំ ធិញ, ៨-ឈ្មោះឈុន ចឺម, ៩-ឈ្មោះទី តូច ហៅចូច, ១០-ឈ្មោះកាត ធីម, ១១-ឈ្មោះ ដូង អេប, ១២-ឈ្មោះអៀង លៀម ភេទស្រី និង១៣-ឈ្មោះស៊ិន ស៊ាង។ ទាំង១៣នាក់ ត្រូវបានបញ្ជូនទៅកាន់ខេត្ដតាកែវ កំពត និង កំពង់ស្ពឺ។
លោកឧត្ដមសេនីយ៍ត្រីឡឹក វណ្ណៈ បាន មានប្រសាសន៍ឱ្យដឹងថា ក្រុមនេះនៅសេសសល់បក្សពួកជិត១០នាក់ទៀតដែលកំពុង តាមចាប់ខ្លួន ប៉ុន្ដែអ្វីដែលនៅមានការយឺត យ៉ាវក្នុងការតាមប្រមាញ់សមាជិកក្រុមចោរប្លន់ប្រើកាំភ្លើងអាកានេះសំខាន់គឺថវិកាដែលត្រូវប្រើប្រាស់ចាយវាយគ្រប់មធ្យោបាយ និងគ្រប់ជំនាញ ។
ចែករំលែកព័តមាននេះ