នាងអេនចេលីណា ជោលី និងលោកប្រេតភីត បានសម្រេចកិច្ចព្រមព្រៀងលើការចិញ្ចឹមកូនទាំង៦នាក់ ក្រោយពីនាងជោលីបានប្ដឹងលែងលះលោកប្រេត ភីត ដោយផ្ដល់ពីហេតុផលថា «រស់នៅមិនចុះសម្រុងគ្នា» ។ តារាសម្តែងហូលីវូដទាំង២នាក់បានចែកផ្លូវគ្នាកាលពីឆ្នាំ២០១៦ ។
មេធាវីរបស់នាងជោលីមិនបានបង្ហាញព័ត៌មានលំអិតទាក់ទងនឹងកិច្ចព្រមព្រៀងលើការចិញ្ចឹមកូនទាំង៦នាក់មានអាយុពី១០ទៅ១៧ឆ្នាំដែលក្នុងនោះមានកូនចិញ្ចឹម៣នាក់ និងកូនបង្កើត៣នាក់ទេ ។
ប្រភពដដែលបញ្ជាក់ទៀតថា ក្រោយពីពួកគេបានលែងលះគ្នា មានបញ្ហាចម្បងមួយគឺការតស៊ូសុំសិទ្ធិចិញ្ចឹមកូនទាំង៦នាក់ ប៉ុន្តែកាលពីពេលថ្មីៗកន្លងមកតារាសម្តែងទាំង២នាក់នេះអាចសម្រេចកិច្ចព្រមេព្រៀងក្នុងការចិញ្ចឹមកូនដោយមិនចាំបាច់សម្រេចរឿងក្ដីនៅតុលាការ ។
ទោះជាយ៉ាងណាក៏ដោយ បច្ចុប្បន្ននាងអេនចេលីណា ជោលី និងលោកប្រេត ភីត នៅមិនទាន់សម្រេចរួចរាល់លើការព្រមព្រៀងក្នុងការលែងលះក្នុងដំណាក់កាលចុងក្រោយនៅឡើយទេ ៕ ម៉ុក សេង
ចែករំលែកព័តមាននេះ