កាសែតអ៊ីតាលីឈ្មោះ CORRIERE DELLASERA បានចេញផ្សាយពីការចំណាយនានារបស់ប្រមុខរដ្ឋាភិបាលអ៊ីតាលីលោកស៊ីលវីយ៉ូ ប័រលូស្កូនី ។ កាសែតអ៊ីតាលីនេះរាយការណ៍កាលពីថ្ងៃទី៩ មីនា ថា ទិញគ្រឿងអលង្ការ វត្ថុបុរាណ ក្រវាត់ក ស្រោមសំបុត្រមានប្រាក់ លោកប័រលូស្កូនី បានចំណាយប្រាក់៣៤លានអឺរ៉ូ ក្នុងឆ្នាំ២០១០ សម្រាប់ការដើរផ្សារ ឬការទិញកាដូឱ្យបណ្តាស្រីស្អាតវ័យក្មេងៗរបស់លោក ។
ប្រមុខរដ្ឋាភិបាលអ៊ីតាលីដែលក៏ជាសេដ្ឋីអាយុ៧៤ឆ្នាំបានចំណាយប្រាក់១២០.០០០អឺរ៉ូគ្រាន់តែសម្រាប់ទិញក្រវាត់.ក កន្សែងរុំកនិងរបស់របរដទៃៗទៀត និងចំណាយប្រាក់៦៥.០០០អឺរ៉ូសម្រាប់ទិញគ្រឿងអលង្ការ ។ នេះជាការស្រង់ទិន្នន័យផ្តល់ក្នុងក្របខណ្ឌនៃការស៊ើបអង្កេតរបស់តុលាការមួយដែលកំពុងធ្វើលើទំនាក់ទំនងរបស់លោកប័រលូ ស្កូនី ជាមួយនារីរកស៊ីផ្លូវភេទវ័យពុំទាន់ពេញវ័យម្នាក់នាង RUBY ។
មហាសេដ្ឋីខាងម៉ាស៊ីនឃោសនារូបនោះ ក៏ជួលក្នុងទឹកប្រាក់៦៧៥.០០០អឺរ៉ូនូវវិមានមួយស្ថិតនៅជិតកន្លែងកំសាន្តមាត់សមុទ្រ PORT-OFINO ចំណាយ៩០០.០០០អឺរ៉ូសម្រាប់ថ្លៃឧស្ម័ន និងអគ្គិសនីក្នុងភូមិគ្រឹះរបស់លោកនៅ ANTIGUA ។ ទឹកប្រាក់ចំនួន៦៥០.០០០អឺរ៉ូ ក៏ត្រូវចំណាយផងដែរ ក្នុងបណ្តាហាងលក់វត្ថុបុរាណ និងលក់ផ្ទាំងគំនូរសិល្បៈ ។ នារីវ័យក្មេងជាច្រើនដែលនៅជុំវិញលោក ក៏លាតត្រដាងផងដែរ ក្នុងក្របខណ្ឌនៃការស៊ើបអង្កេតដែលនឹងអាចបញ្ជូនលោកប័រលូ ស្កូនី ទៅកាន់តុលាការនាថ្ងៃទី៦ មេសា ក្នុងបទចោទប្រកាន់ទាក់ទិនរំលោភបំពានអំណាចនិងការទិញកាដូជាច្រើនរបស់ប្រមុខរដ្ឋាភិបាលអ៊ីតាលីរូបនោះ ។
យោងតាមរបាយការណ៍ចេញផ្សាយដោយកាសែត CORRIERE ថា លោកប័រលូស្កូនី បានចែកប្រាក់៥៦២.០០០អឺរ៉ូឱ្យដល់នារី១៤នាក់ ក្នុងចំណោមនារីក្មេងៗដែលលោកទាក់ទង។ នារីម្នាក់ក្នុងចំណោមនារីទាំងនេះនាង ANGELA SOZIO ទទួលបានប្រាក់តែមួយលើកដល់១០០.០០០អឺរ៉ូ ។ កាន់តែជ្រះថ្លាថែមទៀតជាមួយបណ្តាស្រីស្អាត លោកប័រ លូស្កូនីបានផ្តល់៤០.០០០អឺរ៉ូដល់នារីជាលេខាធិការមួយរូបរបស់លោកក្រោមរូបភាពជាកាដូរៀបការ ៕
ចែករំលែកព័តមាននេះ