រាជធានីភ្នំពេញ ៖ រថយន្តបែនដឹកដី១គ្រឿងបើកបរក្នុងល្បឿនលឿនដូចហោះហើយពេលទៅដល់ត្រង់ចំណុចផ្លូវខ្វែងបានបុកម៉ូតូ១គ្រឿងជិះគ្នា៣នាក់ពេញទំហឹង ។ បណ្ដាលឲ្យបុរសម្នាក់រងរបួសធ្ងន់ ដោយត្រូវរថយន្តអូសជាមួយម៉ូតូច្រើនម៉ែត្រ រីឯប្រពន្ធនិងកូនខ្ទាតចេញផុតរងរបួសមធ្យម បន្ទាប់មកត្រូវបានរថយន្តពេទ្យដឹកយកទៅសង្គ្រោះបន្ទាន់ភ្លាមៗនៅគ្លីនិកឯកជន។
គ្រោះថ្នាក់ចរាចរនេះបានកើតឡើងកាលពីវេលាម៉ោង៦និង១៥នាទីព្រឹកថ្ងៃទី៥ ខែធ្នូ ឆ្នាំ២០១៨ នៅផ្លូវ៣០ម៉ែត្រចំណុចផ្លូវខ្វែង ស្ថិតនៅក្នុងភូមិព្រៃទីទុយ សង្កាត់ព្រៃស ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា រថយន្តបង្កម៉ាកហ៊ីយ៉ាន់ដាយ ជាប្រភេទរថយន្តបែនដឹកដី ពាក់ស្លាកលេខ ភ្នំពេញ ៣D-៧៦៦៦ អ្នកបើកបររត់គេចខ្លួនបាត់ស្រមោល។
ដោយឡែកជនរងគ្រោះខាងលើដែលរងរបួសធ្ងន់ឈ្មោះឈូក ណាវិន ភេទប្រុស អាយុ២១ឆ្នាំមុខរបរកម្មកររោងចក្រ ស្នាក់នៅភូមិរកាកោះ សង្កាត់ព្រៃសខណ្ឌដង្កោ ជាអ្នកបើកបរម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៍ខ្មៅ ពាក់ស្លាកលេខ ភ្នំពេញ ១DL-០២៥៧ ។
តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះបានបើកបរម៉ូតូមួយគ្រឿងមានឌុបប្រពន្ធ និងកូន ធ្វើដំណើរពីទិសខាងលិចទៅកើត លុះពេលមកដល់ត្រង់ចំណុចកើតហេតុដែលជាចំណុចផ្លូវខ្វែងក៏ត្រូវបានរថយន្តបែនដឹកដីខាងលើបើកបរក្នុងទិសដៅពីត្បូងទៅជើងបើកលឿនដូចហោះបោះពួយជ្រុលទៅបុកម៉ូតូទាំងកម្រោលតែម្ដង។
ប្រភពដដែលបានបន្តថា ពេលនោះបានបណ្ដាលឲ្យម៉ូតូដួលបោកទៅលើថ្នល់ហើយបុរសជាអ្នកបើកបរត្រូវរថយន្តអូសជាច្រើនម៉ែត្ររងរបួសធ្ងន់ធ្ងរ ចំណែកប្រពន្ធនិងកូនខ្ទាតចេញផុតពីកង់រថយន្តរងរបួសមធ្យម។
ក្រោយពេលកើតហេតុ អ្នកបើកបររថយន្តបានរត់គេខ្លួនបាត់ស្រមោល បន្ទាប់មកជនរងគ្រោះត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗដែរ។
ដោយឡែកនគរបាលផ្នែកចរាចរខណ្ឌដង្កោបានចុះទៅធ្វើការវាស់វែង និងជួយសម្រួលចរាចរនៅកន្លែងកើតហេតុ និងបាននាំយករថយន្តនិងម៉ូតូទៅរក្សាទុកនៅអធិការដ្ឋាន នគរបាលខណ្ឌដង្កោរង់ចាំធ្វើការដោះស្រាយគ្នានៅពេលក្រោយ៕
ចែករំលែកព័តមាននេះ