ខេត្តកំពត ៖ មានករណីបង្ករបួសស្នាមដោយក្រុមក្មេងទំនើងពីរក្រុមដេញកាប់ប្រហារគ្នាយ៉ាងសាហាវ កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៥ ខែធ្នូ ឆ្នាំ២០១៨ ស្ថិតនៅចំណុចក្បាលស្ពានព្រែកកំពង់បាយត្រើយខាងកើត ស្ថិតក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត ។
ហេតុការដេញកាប់ និងវាយប្រហារគ្នាដោយក្រុមក្មេងទំនើងទាំងពីរក្រុមខាងលើដែលក្រុមមួយមានគ្នា៣នាក់ បានវាយបង្ករបួសស្នាមមកលើជនរងគ្រោះ២នាក់ បណ្តាលឲ្យរងបួសយ៉ាងធ្ងន់ធ្ងរ ហើយត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗផងដែរ ។
លោកវរសេនីទោ ហោ វណ្ណា អធិការនគរបាលក្រុងកំពតបានឲ្យដឹងថា ជនជាក្មេងទំនើងដៃដល់ដែលបង្ករបួសស្នាមនោះមានគ្នាបីនាក់ ទី១- ឈ្មោះ ភាព ផែន ភេទប្រុស អាយុ២០ឆ្នាំ រស់នៅភូមិក្តាត ឃុំព្រែកឆ្នោត ស្រុកទឹកឈូ ខេត្តកំពត (អ្នករួមគំនិត) ។ ទី២- ឈ្មោះ ចែន វិត ហៅគីត ភេទប្រុស អាយុ២៣ឆ្នាំ រស់នៅភូមិចុងក្រូច ឃុំរាប ស្រុកពារាំង ខេត្តព្រៃវែង ។ (ជនដៃដល់ ) ទី៣- ឈ្មោះ ឈិត ភេទប្រុស អាយុជាង២០ឆ្នាំ (បានរត់គេចខ្លួន) ។
លោកអធិការក្រុងបន្តថា ក្មេងទំនើងដៃដល់ទាំង៣នាក់ខាងលើបានប្រើប្រាស់ដាវសាំម៉ារ៉ៃ កាប់មកលើជនរងគ្រោះ២នាក់ បណ្តាលអោយរងរបួសធ្ងន់ធ្ងរក្នុងនោះរួមមានទី១- ឈ្មោះ ត្រឹង សីហា ភេទប្រុស អាយុ២៩ឆ្នាំ រស់នៅភូមិស្វាយធំ សង្កាត់ក្រាំងអំពិល ក្រុងកំពត ខេត្តកំពត (របួសត្រង់ត្រចៀក)។ ទី២- ឈ្មោះ អេង ហៃ ភេទប្រុស អាយុ២៩ឆ្នាំ រស់នៅភូមិសុវណ្ណាសារគរ សង្កាត់កំពង់កណ្តាល ក្រុងកំពត ខេត្តកំពត (ទទួលរងរបួសដៃស្តាំ ) ។
បន្ទាប់ពីបង្កហេតុជនរងគ្រោះបានរាយការណ៍មកកាន់សមត្ថកិច្ចនគរបាលក្រុងកំពតទាន់ពេលវេលាភ្លាមៗនោះកម្លាំងសមត្ថកិច្ចជំនាញបានចុះអន្តរាគមន៍ និងដោយមានបទបញ្ជាផ្ទាល់ពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងលោកវរសេនីយ៍ទោហោ វណ្ណា អធិការក្រុងកំពត កម្លាំងជំនាញព្រហ្មទណ្ឌក្រុង គឺលោកវរសេនីយ៍ត្រី កុល ណារុំ អធិការរងទទួលផែនព្រហ្មទណ្ឌបានដឹកនាំកម្លាំងធ្វើការព័ទ្ធស្ទាក់បានឃាត់ខ្លួនជនសង្ស័យខាងលើបានចំនួន២នាក់ ព្រមទាំងនាំខ្លួនមកកាន់អធិការដ្ឋាននគរបាលក្រុងកំពត ដើម្បីសាកសួរដែលឈានទៅដល់បង្កហិង្សាខាងលើ ចំណែកជនបក្ខពួកម្នាក់ទៀតរត់គេចខ្លួននោះកម្លាំងអធិការនគរបាលក្រុងកំពុងស្វែងរកចាប់ខ្លួនបន្ត ។ ដោយជនសង្ស័យជាក្មេងទំនើងបង្ករបួសស្នាមខាងលើក ក្រោយពីធ្វើការសាកសួរការិយាល័យនគរបាលព្រហ្មទណ្ឌក្រុងបានកសាងសំណុំរឿងបញ្ជូនទៅកាន់ស្នងការខេត្ត ដើម្បីចាត់ការបន្តតាមនីតិវិធី ។
សូមបញ្ជាក់ថា ជនក្មេងទំនើងទាំង២ក្រុមខាងលើនេះ គឺផ្តើមចេញពីការបើកបរម៉ូតូជែងគ្នា ទើបឈានដល់បង្កទំនាស់ឲ្យមានហិង្សាកើតឡើងខាងលើ ៕
ចែករំលែកព័តមាននេះ