រាជធានីភ្នំពេញ ៖ ស្ត្រីវ័យជាង៣០ឆ្នាំម្នាក់បានសម្រេចចិត្តលោតទឹកធ្វើអត្តឃាតសម្លាប់ខ្លួន ដោយបានបីកូនប្រុសវ័យជាង១ខួបដើរទៅលើស្ពានព្រះមុន្នីវង្សចាស់លុះដល់ពាក់កណ្តាលស្ពានក៏សម្រេចទុកកូនប្រុសចោល ហើយធ្វើសកម្មភាពលោតចូលទៅក្នុងទឹកតែម្តងទឹក ។
ហេតុការណ៍ខាងលើនេះបង្កអោយមានការភ្ញាក់ផ្អើលឡើងកាលពីវេលារសៀលថ្ងៃទី០៤ ខែធ្នូ ឆ្នាំ២០១៨ នៅចំណុចលើស្ពានព្រះមុន្នីវង្សចាស់ ស្ថិតក្នុងភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ ។
ស្ត្រីរងគ្រោះដែលសម្រេចចិត្តគិតខ្លីខាងលើមានឈ្មោះ ជិត ទៀង អាយុ៣៥ឆ្នាំ បច្ចុប្បន្នស្នាក់នៅខេត្តព្រៃវែង ។
ប្រភពព័ត៌មានអោយដឹងថា នៅវេលាខាងលើគេសង្កេតឃើញស្ត្រីរងគ្រោះបានបីកូនប្រុសដើរឡើងទៅកាន់ស្ពានព្រះមុន្នីវង្សចាស់ដោយដើរចេញពីចំណុចប៉េនឡានផ្សារច្បារអំពៅឡើងទៅ លុះដល់ចំណុចពាក់កណ្តាលស្ពាននាងក៏បានទម្លាក់កូនចុះពីលើដៃទុកកូនចោលនៅលើស្ពានម្នាក់ឯង ហើយធ្វើសកម្មភាពលោតចូលទៅក្នុងទឹកទន្លេតែម្តង ។
ភ្លាមៗនោះបងប្អូនអ្នកដំណើរឆ្លងកាត់ទីនោះបានឃើញក៏ស្រែកឆោរឡោរឡើងបង្កការភ្ញាក់ផ្អើលដល់កម្លាំងនគរបាលជើងទឹកដែលប្រចាំការនៅតំបន់ក្រោមស្ពាននោះរួមជាមួយក្រុមប្រជាជនចាម នាំគ្នាជិះទូកទៅមុជទឹកជួយស្រង់ស្ត្រីខាងលើឡើងមកលើគោកវិញតែម្តងទើប មិនបណ្តាលអោយស្លាប់បាត់បង់ជីវិតឡើយ ។ បន្ទាប់ពីស្រង់ចេញពីទឹករួចនាង និងកូនប្រុសត្រូវបានកម្លាំងនគរបាលប៉ុស្តិ៍ច្បារអំពៅទី២នាំទៅកាន់ប៉ុស្តិ៍នគរបាលរដ្ឋបាលដើម្បីសាកសួរនាំ ។
តាមការរៀបរាប់របស់ស្ត្រីខាងលើទាំងយំសោកបោកខ្លួនប្រាណបានអោយដឹងថា នាងតែរងការវាយធ្វើបាបរាងកាយ និងផ្លូវចិត្តជាខ្លាំងពីសំណាក់បុរសជាប្តីទើបជាហេតុនាំអោយរូបនាងគិតខ្លីមិនចង់រស់មានជីវិតនៅក្នុងលោកនេះទៀតឡើយ ។ បន្ទាប់ពីរៀបរាប់នូវទុក្ខសោករួចមក នគរបាលមូលដ្ឋានបានធ្វើការពន្យល់អប់រំណែនាំស្ត្រីខាងលើ និងបានឧបត្ថម្ភថវិការមួយចំនួនអោយនាងត្រឡប់ទៅកាន់ស្រុកកំណើតនៅឯខេត្តព្រៃវែងវិញនៅរសៀលថ្ងៃខែដដែលផងដែរ ៕
ចែករំលែកព័តមាននេះ