រាជធានីភ្នំពេញ ៖ ប្រជាពលរដ្ឋរខណ្ឌព្រែកព្នៅ បានស្នើឲ្យអាជ្ញាធររាជធានីភ្នំពេញ មេត្តាជួយបង្ក្រាបក្រុមក្មេងទំនើង ល្បែងស៊ីសងគ្រប់ប្រភេទ និងការប្រើប្រាស់គ្រឿងញៀននៅក្នុងមូលដ្ឋាន ព្រោះសព្វថ្ងៃ មានយុវជនប្រើប្រាស់ និងសេពគ្រឿងញៀនច្រើន ដែលធ្វើឲ្យពួកគាត់មានការព្រួយបារម្ភ អំពីបញ្ហាសន្តិសុខកើតមានដោយសារ ការប្រើប្រាស់ គ្រឿងញឿននេះ។ លោក កែវ វណ្ណា តំណាងប្រជាពលរដ្ឋរស់នៅសហគមន៍អណ្តូង៤ សង្កាតគោករកា ក៏ដូចប្រជាពលរដ្ឋ រស់នៅក្នុងសង្កាត់ផ្សេងៗទៀត បានលើកឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សា រាជធានីភ្នំពេញ អាណត្តិទី២ ស្ថិតក្នុងវត្តឈូកវ៉ា សង្កាត់គោករកា ខណ្ឌព្រែកព្នៅ កាលពីព្រឹកថ្ងៃទី០៤ វិច្ឆិកាថា បច្ចុប្បន្ននៅក្នុងសហគមន៍ របស់ពួកគាត់ ក្រៅពីល្បែងស៊ីសង មានយុវជនប្រើប្រាស់ និងសេពគ្រឿងញៀនច្រើន។
លោកបន្តថា ការប្រើប្រាស់ ការជួញដូគ្រឿងញៀកើតមានច្រើននេះ ជាហេតុបង្កឲ្យមានបទល្មើសផ្សេងៗ នៅតាមមូលដ្ឋានក្នុងភូមិសង្កាត់ដូចជា ចោរលួចឆក់ និងគាស់ផ្ទះនៅពេលយប់ជាដើម។ ដូច្នេះ ដើម្បីបង្ការទប់ស្កាត់ និងបង្ក្រាបឲ្យបានទាន់ពេល ពួកគាត់សុំឲ្យអាជ្ញាធររាជធានីពិសេសកងកម្លាំងមានសត្ថកិច្ចមេត្តាដោះស្រាយ និងចាត់វិធានការអំពីបញ្ហាគ្រឿងញៀននេះ។ លោកក៏បានសុំណូមពរឲ្យ អាជ្ញាធរមានសមត្ថកិច្ចជួយធ្វើយ៉ាងណា កុំឲ្យមានគ្រឿងញឿនកើតមាននៅក្នុងសង្កាត់គោករកា បន្តទៀត បើមិនបាន១០០% បាន៥០%ក៏បានដែរ។ ដូច្នេះសុំកម្លាំងប៉ូលិស រាជអាវុធហត្ថ ជួយប្រល្បាត រាល់ពេលយប់ពេលថ្ងៃ ព្រោះនៅពេលនេះ គ្មានឃើញកម្លាំងណាល្បាតទេ យូរៗបានឃើញម្តងនេះជាការពិត។ លោក ឈិន ប៊ុនហ៊ុយ អធិការនគរបាលខណ្ឌព្រែកព្នៅ បានទទួលយកនូវសំណើរបស់ប្រជាពលរដ្ឋក្នុងវេទិកានេះ។
លោកបន្តថា ចំណុចដែលបានលើកឡើងអំពីបញ្ហាគ្រឿងញៀននេះ លោក នឹងខិតខំយកចិត្តទុកដាក់កែតម្រូវគ្រប់កម្លាំង តាមប៉ុស្តិ៍ធ្វើយ៉ាងណាបំពេញការងារនេះឲ្យបានសកម្មជាងមុន ដើម្បីបំពេញទៅតាមសំណូមពររបស់បងប្អូន។ លោក អធិការបានបញ្ជាក់ថា នៅពេលនេះ សមត្ថកិច្ចកំពុងយកចិត្តទុកដាក់មកលើសង្កាត់គោករកានេះ កម្លាំងនៅតែចុះតាមដាន យាមល្បាត ដើម្បីឆ្លើយទៅនឹងការស្នើសុំរបស់បងប្អូន។ ប៉ុន្តែអ្វីដែលនៅសេសសល់ យើងត្រូវការចូលរួមពីប្រជាពលរដ្ឋ ព្រោះ វាមិនមែនតែរឿងរបស់សមត្ថកិច្ចមួយទេ ប្រការដែលកាត់បន្ថយគ្រឿងញៀននេះ ធ្វើឲ្យរួចផុតពីបញ្ហាផ្សេងៗទៀត នេះជាការបកស្រាយដើម្បីឲ្យបងប្អូនបានអស់ចិត្ត ហើយលោក នឹងខិតខំបន្តយកចិត្តទុកដាក់ខ្លាំងជាងបន្ថែមទៀត។ សូមបញ្ជាក់ថា៖ ខណ្ឌព្រែកព្នៅមានចំនួន៥សង្កាត់ ទី១-សង្កាត់ព្រែកព្នៅ ទី២-សង្កាត់សំរោង ទី៣-សង្កាត់ញាពន់ ទី៤-សង្កាត់ពន្សាំង និងទី៥-សង្កាត់គោករកា៕
ចែករំលែកព័តមាននេះ