ខេត្តកណ្ដាល ៖ ជនសង្ស័យម្នាក់បានធ្វើសកម្មភាពគាស់ជញ្ជាំងតូបលក់ដូរមួយកន្លែងរួចបានចូលទៅលួចយកលុយ បារី ដែកកេះ ព្រមទាំងសម្លៀកបំពាក់មួយចំនួនក្នុងខណៈដែលម្ចាស់មិននៅ ។
បន្ទាប់មកបានគេចខ្លួនបាត់ ចំណែកម្ចាស់តូបក្រោយពេលត្រឡប់មកដល់ផ្ទះវិញបាត់របស់របរ និងលុយកាក់ក៏បានប្ដឹងនគរបាលស្រុកអង្គស្នួលធ្វើការស្រាវជ្រាវ និងចាប់ខ្លួនបាន ។ ហេតុការណ៍នោះបានកើតឡើងកាលពីវេលាម៉ោង២និង៣០នាទីយប់រំលងអាធ្រាត្រឈានចូលថ្ងៃទី០២ ខែធ្នូ ឆ្នាំ២០១៨ នៅក្នុងភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល ។
ជនសង្ស័យឈ្មោះ សារ៉ុម សុវណ្ណបញ្ញា អាយុ១៦ឆ្នាំ ជនជាតិមុខរបរកម្មកររោងចក្រមានទីលំនៅក្នុងភូមិកើតហេតុ ។ ចំណែកជនរងគ្រោះឈ្មោះ ហៀង រស្មី ភេទស្រី អាយុ៣៥ឆ្នាំ ជនជាតិខ្មែរមុខរបរលក់ដូរ នៅភូមិកើតហេតុនោះដែរបាត់បង់សម្ភារលុយរៀល ចំនួន៣៨ម៉ឺន បារីម៉ាយសឺវិន១សុង ដែកកេះ១ប្រអប់ ៥០ដែកកេះ ខោអាវ១ចំនួន ។
តាមប្រភព័ត៌មានបានឲ្យដឹងថា នៅមុនពេលកើតហេតុជនរងគ្រោះបានបិទទ្វារផ្ទះចោលបន្ទាប់មកបានទៅហូបការបងប្អូននៅឯអ្នកលឿង ក្នុងខេត្តព្រៃវែង ។ ក្រោយមកជនសង្ស័យបានធ្វើសកម្មភាពគាស់ជញ្ជាំងស័ង្កសីតូបលក់ដូរចូលលួចរបស់របរ និងលុយខាងលើរួចបានគេចខ្លួនបាត់ស្រមោល ។ ចំណែកជនរងគ្រោះក្រោយពេលត្រឡប់មកដល់ផ្ទះវិញឃើញផ្ទះមានស្នាមគាស់ជញ្ជាំងស័ង្កសី និងឥវាន់ព្រមទាំងលុយខាងលើទើបប្ដឹងនគរបាលឲ្យជួយស្រាវជ្រាវ និងចាប់ខ្លួនជនសង្ស័យតែម្ដង ។
ក្រោយពេលខាប់ខ្លួនជនសង្ស័យបានសារភាពថា ខ្លួនបានគាស់ជញ្ជាំងតូបចូលទៅលួចយកលុយ និងបារីព្រមទាំងដែកកេះ និងខោអាវនៅក្នងតូបខាងលើពិតមែន ហើយកម្លាំងនគរបាលកំពុងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ