ខេត្តកណ្តាល ៖ ព្រឹកថ្ងៃទី២ ធ្នូ វេលាម៉ោង១១ និង៣០នាទី កម្លាំងសមត្ថកិច្ចនគរបាលស្រុកកៀនស្វាយបានចុះទៅបញ្ឈប់អាពាហ៍ពិពាហ៍មួយ ដែលបានលួចរៀបការដោយពុំមានច្បាប់អនុញ្ញាត រវាងកូនកំលោះជាជនជាតិចិន និងនារីខ្មែរ នៅក្នុងភូមិសំរោងក្អែរ៣ ឃុំសំរោងធំ ស្រុកកៀនស្វាយ ជាក្តាមស្រែសុទ្ធសាធ ។
បើតាមលោក ប៊ុត សីហា នាយប៉ុស្តិ៍នគរបាលរដ្ឋបាលសំរោងធំ បានប្រាប់កោះសន្តិភាពតាមទូរស័ព្ទឲ្យដឹងកាលពីរសៀលថ្ងៃទី៣ ធ្នូ ថា បន្ទាប់ពីមន្ត្រីនគរបាលរបស់លោកចុះធ្វើការតាមមូលដ្ឋាន នាព្រឹកថ្ងៃដដែលនោះ ក៏បានឃើញរោងមង្គលការមួយ នៅចំណុចភូមិខាងលើ ដែលមានកូនកំលោះជាជនជាតិចិន រីឯកូនក្រមុំ គឺជាជនជាតិខ្មែរទើបរាយការណ៍មកប្រាប់រូបលោក ។
បន្ទាប់ពីទទួលបានព័ត៌មាននេះភ្លាម រូបលោកក៏បានរាយការណ៍បន្តជូនទៅលោកអធិការបញ្ជាឲ្យលោក នូវ ឡាង អធិការរងទទួលផ្នែកអន្តោប្រវេសន៍ស្រុកកៀនស្វាយ ដឹកនាំកម្លាំងសហការជាមួយកម្លាំងនគរបាលរដ្ឋបាលសំរោងធំចុះទៅសួរនាំ ។ លោកនាយប៉ុស្តិ៍បន្តថា ពេលដែលកម្លាំងចុះទៅដល់ ខណៈពិធីមង្គលការនេះកំពុងរៀបចំពិធីសូត្រមន្តនៅលើផ្ទះជាមួយសាច់ញាតិបងប្អូនក្រុមគ្រួសារ ហើយក៏សួរនាំទៅទើបដឹងថាការរៀបអាពាហ៍ពិពាហ៍នេះ ពុំមានច្បាប់អនុញ្ញាតឡើយ ហើយកូនកំលោះដែលជាជនជាតិចិននោះ ក៏មិនចេះនិយាយភាសារខ្មែរដែរ រកសួរនាំមិនបាន គឺចិនសុទ្ធដូចទើបមកពីស្រុកចិនថ្មីៗ ។
ពេលដឹងថា ការរៀបអាពាហ៍ពិពាហ៍នេះគ្មានច្បាប់ទន្លាប់នោះ កម្លាំងសមត្ថកិច្ចក៏ធ្វើការណែនាំឲ្យផ្អាកមង្គលការនេះជាបន្ទាន់ បើពុំនោះទេសមត្ថកិច្ច និងអនុវត្តទៅតាមនីតិវិធីច្បាប់ជាក់ជាមិនខាន ។ ដោយណែនាំថា រង់ចាំបុរសជនជាតិចិនរូបនោះ ទៅធ្វើច្បាប់ការឲ្យរួចរាល់ ទៅតាមលំដាប់លំដោយគន្លងប្រពៃណីរបស់ព្រះរាជាណាចក្រកម្ពុជាសិន ទើបអនុញាតឲ្យរៀបអាពាហ៍ពិពាហ៍នេះបន្តទៀត ក៏វាមិនយឺតពេលដែរ។ ក្រោយពីស្តាប់ការពន្យល់ណែនាំពាក់ព័ន្ធពីផ្លូវច្បាប់ ដែលជនបរទេសមករៀបការជាមួយជនជាតិខ្មែររួចមក សាច់ញាតិបងប្អូនខាងនារីជាកូនក្រមុំខ្មែរក៏យល់ព្រមស្តាប់តាម គឺមិនហ៊ានរឹងរូសទេ ព្រមទាំងរុះរើរោងការចេញបញ្ឈប់កម្មពិធីមង្គលការតែត្រឹមនោះ ។
លោក ប៊ុត សីហា នាយប៉ុស្តិ៍ បានបញ្ជាក់បន្ថែមទៀតថា សមត្ថកិច្ចមិនបានធ្វើការឃាត់ខ្លួនជនជាតិចិននោះទេ គឺគ្រាន់តែពន្យល់ណែនាំឲ្យទៅធ្វើច្បាប់ទម្លាប់ឲ្យបានត្រឹមត្រូវស្របតាមច្បាប់នៃព្រះរាជាណាចក្រកម្ពុជា ទើបអនុញាតឲ្យមករៀបការវិញបាន ។កូនកំលោះជាជនជាតិចិនឈ្មោះ YANG XIMING អាយុ៣០ឆ្នាំ មានទីលំនៅបច្ចុប្បន្នស្នាក់នៅសិប្បកម្មបោះពុម្ពយីហោលីផេង (រាជធានីភ្នំពេញ) កាន់លិខិតឆ្លងដែនចិនលេខ E82486140 ទិដ្ឋាការលេខEI01027234 ផុតកំណត់ថ្ងៃទី២៧ កញ្ញា ២០១៩ ។ រីឯកូនក្រមុំខ្មែរឈ្មោះ តូ ស្រីជាតិ អាយុ២៥ឆ្នាំ មានទីលំនៅបច្ចុប្បន្នភូមិឃុំខាងលើ ។
ពាក់ព័ន្ធរឿងបុរសជនជាតិចិនលួចរៀបការជាមួយនារីខ្មែរ អត់មានច្បាប់ទម្លាប់ត្រូវសមត្ថកិច្ចបញ្ឈប់នេះ អ្នកយកព័ត៌មានយើងបានព្យាយាមស្វែងរកប្រភពព័ត៌មានទាក់ទងនឹងជនជាតិចិននេះ ដោយចង់ដឹងថា តើមានទំនាក់នង តាមរយៈមេខ្យល់ណា ទើបក្លាយជាកូនកំលោះមករៀបការអត់ច្បាប់បែបនេះ ។ ប៉ុន្តែគ្មានប្រភពណាមួយដឹងនោះទេ ។
ពាក់ព័ន្ធច្បាប់បន្តទៀត ភ្នាក់ងារយើងបានទូរស័ព្ទ សូមការបំភ្លឺពីលោកអធិការរង នូវ ឡាង ដែរ តែពេល
តេទូរស័ព្ទចូលហើយ មានអ្នកលើកទទួលប្រាប់ថា ច្រឡំលេខទៅវិញ ។ ចំណែកលោក ទេព ឈួន មេឃុំសំរោងធំ បានប្រាប់តាមទូរស័ព្ទថា រឿងនេះរូបលោកក៏មិនបានដឹងដែរ ទាល់តែសមត្ថកិច្ចចុះទៅដល់រោងការទើបលោកដឹង ព្រោះគេលួចរៀបការស្ងាត់ៗ ។
មតិខ្លះនិយាយឮៗថា បើចង់បានកូនប្រសាចិនបែបនេះ ម៉េចមិនសុំច្បាប់រៀបការត្រឹមត្រូវ?
ចែករំលែកព័តមាននេះ