រាជធានីភ្នំពេញ ៖ រថយន្តដឹកដីមួយគ្រឿងបានបើកជែងខាងស្តាំដៃត្រូវរថយន្តក្រុងដឹកអ្នកដំណើរបត់ចូលចំណតហើយកៀរ រថយន្តដឹកដីនោះជ្រុលទៅបុកខឿនសួនច្បារ និងបង្កាន់ដៃដែកបណ្តាលអោយបាក់អស់មួយផ្ទាំង តែសំណាងល្អមិនបង្កគ្រោះថ្នាក់ដល់មនុស្សណាម្នាក់នោះឡើយ។
ហេតុការណ៍គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង១និង៥០នាទីរសៀលថ្ងៃទី៤ ខែធ្នូ ឆ្នាំ២០១៨ ស្ថិតតាមបណ្តោយផ្លូវជាតិលេខ៥ ត្រង់ចំណុចមុខសួនច្បារប្រជាធិបតេយ្យ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ។
រថយន្តដឹកដីម៉ាក FUSU ពណ៌ស គ្មានស្លាកលេខ អ្នកបើកបរដោយឈ្មោះ ហោ ហេង ភេទប្រុស អាយុ៣៣ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ។
ចំណែករថយន្តក្រុងពណ៌ខៀវ ពាក់ស្លាកលេខ រដ្ឋ៣៧-៣-០២៣២ បើកបរដោយឈ្មោះ កែវ មុន្នីងា ភេទប្រុស អាយុ៣៩ឆ្នាំ ស្នាក់នៅភូមិគោកឃ្លៀង សង្កាត់ភ្នំពេញ ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញរថយន្តទាំង២គ្រឿងខាងលើធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើងហើយរថយន្តក្រុងបើកបរក្នុងល្បឿនយ៉ាងលឿនបានស៊ីញ៉ូបត់ចូលចំណត។
ពេលនោះរថយន្តដឹកដីបើកមកពីក្រោយរុលចូលខាងស្តាំដៃត្រូវរថយន្តក្រុងបុក និងកៀរកៀបឡើងចិញ្ចើមផ្លូវបុកសួនច្បារបាក់បង្កាន់ដៃដែកសួនច្បារទៅមុខលែងរួច ចំណែករថយន្តក្រុងរងការខូចខាតបែកកញ្ចក់មួយផ្ទាំងចំហៀងខាងឆ្វេង តែសំណាងល្អមិនបណ្តាលឱ្យមនុស្សណាម្នាក់រងរបួសនោះឡើយ។
ក្រោយកើតហេតុ សមត្ថកិច្ចមូលដ្ឋានចុះមកដល់កន្លែងកើតហេតុនឹងទាក់ទងសមត្ថកិច្ចជំនាញចុះមកធ្វើការវាស់វែង ហើយយករថយន្តទាំង២គ្រឿងទៅរក្សាទុកនៅការិយាល័យនគរបាលចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំការដោះស្រាយសងការខូចខាត៕
ចែករំលែកព័តមាននេះ