រាជធានីភ្នំពេញ ៖ សហព័ន្ធកីឡាប្រដាល់គុនខ្មែរកាលពីថ្ងៃទី២៩ វិច្ឆិកា កន្លងមកនេះ បានចេញសេចក្ដីសម្រេចជាផ្លូវការដោយប្រកាសបញ្ឈរជើងលោក សាន សៅយ៉ាន់ ប្រធានក្លិបនិងជាគ្រូបង្វឹកក្លិបសានសៅយ៉ាន់នាគាខេត្តបន្ទាយមានជ័យ តាមរយៈការផ្អាកការងារជាចៅក្រម…
រាជធានីភ្នំពេញ ៖ សហព័ន្ធកីឡាប្រដាល់គុនខ្មែរកាលពីថ្ងៃទី២៩ វិច្ឆិកា កន្លងមកនេះ បានចេញសេចក្ដីសម្រេចជាផ្លូវការដោយប្រកាសបញ្ឈរជើងលោក សាន សៅយ៉ាន់ ប្រធានក្លិបនិងជាគ្រូបង្វឹកក្លិបសានសៅយ៉ាន់នាគាខេត្តបន្ទាយមានជ័យ តាមរយៈការផ្អាកការងារជាចៅក្រម និងអាជ្ញាកណ្ដាលរយៈពេល៦ខែ។ចំណែកកីឡាករ សុខ ធី វិញក៏ត្រូវបានប្រកាសលែងឱ្យឡើងសង្វៀនប្រកួតទាំងក្នុងស្រុកនិងក្រៅស្រុករយៈពេល៦ខែដូចគ្នា។
លោក រាជ សុផែន មន្ត្រីគណៈកម្មការវិន័យ របស់សហព័ន្ធកីឡាប្រដាល់គុនខ្មែរបានប្រាប់កោះសន្តិភាពថា ការចេញសេចក្ដីសម្រេចបញ្ឈរជើងទាំងគ្រូនិងសិស្សរបស់ក្លិបសានសៅយ៉ាន់នាគាទាំងពីររូបនេះ ដោយសារតែពួកគេបានប្រព្រឹត្តខុសទៅនឹងបទបញ្ជាបច្ចេកទេសនៃការប្រកួត ។
ជាក់ស្ដែងកាលពីពេលថ្មីៗនេះ លោក សាន សៅយ៉ាន់ និងកីឡាករ សុខ ធី បានរួមគំនិតគ្នាធ្វើឱ្យខូចកម្មវិធីប្រកួតដណ្ដើមជើងឯកខ្សែក្រវាត់អន្តរជាតិ ISI ទោះបីសហព័ន្ធក៏ដូចជាស្ថានីយទូរទស្សន៍ស៊ីអិនស៊ី ខិតខំប្រឹងប្រែងស្វែងរកដំណោះស្រាយកណ្ដាលមួយ ថែមទាំងជួយសម្រួលការងារច្រើនបែបណាក៏ដោយដើម្បីផ្ដល់ឱកាសឱ្យកីឡាករ សុខ ធី បានមកប្រកួតវិញ ក៏ពួកគេមិនយល់ព្រមដែរ ។
ហេតុដូច្នេះហើយបានជាសហព័ន្ធកាលពីពេលថ្មីៗកន្លងមកនេះ បានចេញសេចក្ដីសម្រេចជាផ្លូវការដកលោក សាន សៅយ៉ាន់ ចេញពីការងារជាមន្ត្រីចៅក្រម និងអាជ្ញាកណ្ដាលប៉ុស្តិ៍បាយ័នរយៈពេល៦ខែ ។ ចំណែកកីឡាករ សុខ ធីមិនត្រឹមតែបញ្ឈរជើងលែងឱ្យឡើងប្រកួតលើសង្វៀនស្រុកខ្មែរប៉ុណ្ណោះទេ ថែមទាំងប្រកាសលែងឱ្យចេញទៅប្រកួតនៅក្រៅប្រទេសទៀតផង។
ទន្ទឹមគ្នានេះដែរ លោក ម៉ា ស៊ីថេតប្រធានគ្រប់គ្រងកម្មវិធីប្រដាល់CBS( CTN CNC MYTV)ក៏បានធ្វើសេចក្ដីជូនដំណឹងជាផ្លូវការមួយជូនដល់ប្រធានសហព័ន្ធកីឡាប្រដាល់គុនខ្មែរថា ក្រុមហ៊ុនរបស់លោកក៏បានឯកភាពគ្នាជាមួយក្រុមហ៊ុន ISI STEELសម្រេចដកកីឡាករសុខ ធី ចេញពីកម្មវិធីប្រកួតកំពូលអ្នកប្រយុទ្ធកណ្ដាប់ដៃដែក រដូវកាលទី៣ជាផ្លូវការដែរ ។
ការសម្រេចបែបនេះដោយសារតែលោក សាន សៅយ៉ាន់ និងកីឡាករ សុខ ធីនៅតែមានះ រឹងរូស ថែមទាំងប្រាប់ដោយផ្ទាល់មាត់ ថា លោកមិនព្រមចូលរួមនៅក្នុងកម្មវិធីប្រកួតខាងលើនេះទៀតទេ ដោយសារសហព័ន្ធមិនព្រមឯកភាពតាមសំណូមពររបស់គេ ។
លោក ម៉ា ស៊ីថេត បានលើកឡើងទៀតថា ខាងក្រុមហ៊ុនCBSសម្រេចចិត្តដកបុគ្គលទាំងពីររូបនេះចេញពីកម្មវិធីប្រកួត ដោយសារមើលឃើញថា ពួកគេមិនគោរពតាមកិច្ចសន្យាដែលបានព្រមព្រៀងគ្នា និងបទបញ្ជាបច្ចេកទេសនៃការប្រកួត ។ ម្យ៉ាងវិញទៀត លោកក៏បានទាក់ទងទៅភាគីថៃ និងOne FCរួចហើយថា ករណីដែលពួកគេមិនទាន់រួចផុតពីការដាក់ទណ្ឌកម្មរបស់សហព័ន្ធកីឡាប្រដាល់គុនខ្មែរ ដាច់ខាតមិនអនុញ្ញាតឱ្យទៅប្រកួតបានឡើយ៕
ចែករំលែកព័តមាននេះ