ខេត្តបាត់ដំបង ៖ អាជ្ញាធរខេត្តនិងសមត្ថកិច្ចដែលអះអាងថា នឹងបញ្ជាឲ្យមន្ត្រីមូលដ្ឋានចុះទៅសួរនាំអំពីផ្លូវច្បាប់នៃការបើកឱ្យមានល្បែងស៊ីសងយ៉ាងវក់វី ជ្រកក្រោមកន្ទុយកាស៊ីណូនៅជាប់ព្រំដែនខ្មែរ-ថៃ ក្នុងស្រុកសំពៅលូននោះ រហូតមកដល់ពេលនេះ នៅតែស្ងាត់ឈឹងដដែល មិនទទូលបានលទ្ធផលឡើយ ដែលនាំឲ្យមានការសង្ស័យថា…
ខេត្តបាត់ដំបង ៖ អាជ្ញាធរខេត្តនិងសមត្ថកិច្ចដែលអះអាងថា នឹងបញ្ជាឲ្យមន្ត្រីមូលដ្ឋានចុះទៅសួរនាំអំពីផ្លូវច្បាប់នៃការបើកឱ្យមានល្បែងស៊ីសងយ៉ាងវក់វី ជ្រកក្រោមកន្ទុយកាស៊ីណូនៅជាប់ព្រំដែនខ្មែរ-ថៃ ក្នុងស្រុកសំពៅលូននោះ រហូតមកដល់ពេលនេះ នៅតែស្ងាត់ឈឹងដដែល មិនទទូលបានលទ្ធផលឡើយ ដែលនាំឲ្យមានការសង្ស័យថា សមត្ថកិច្ចដែលមានអំណាចមួយចំនួនអាចស្ថិតនៅពីក្រោយ នៃបនល្បែងទាំងនេះ ហើយការអះអាងរបស់សមត្ថកិច្ចដែលថា នឹងចុះស្រាវជ្រាវសួរនាំអំពីផ្លូវច្បាប់នោះ គឺគ្រាន់តែជាការផ្ដល់ដំណឹងបែប «ប្រជាភិថុត»ឬផោមឱ្យគេហិតតែប៉ុណ្ណោះ ។
មន្ត្រីម្នាក់បានបង្ហើបឲ្យដឹងថា អាជ្ញាធរខេត្តក៏ដូចជាស្នងការដ្ឋានខេត្ត ឬស្ថាប័នដទៃទៀតដែរ គឺគ្មានផែនការចុះស្រាវជ្រាវរកច្បាប់ទម្លាប់នៃបនល្បែងសំងំក្រោមស្លាកកាស៊ីណូ «ប៉ារីស» នៅស្រុកសំពៅលូននេះ
ទេ ។ នេះគ្រាន់តែជាការផ្ដល់ដំណឹងបែប «ប្រជាភិថុត ឬភូតកុហក់» តែប៉ុណ្ណោះ ក្នុងបំណងឱ្យស្រាលសភាពការណ៍ ។ រហូតមកដល់ពេលនេះ ទីតាំងល្បែងនេះ នៅតែបើកទ្វារចំហរទទូលអតិថិជនយ៉ាងគគ្រឹកគគ្រេងរាល់ថ្ងៃដដែល ដោយគ្មានការរំខានពីអាជ្ញាធរឬសមត្ថកិច្ចឡើយ ។ ប៉ុន្តែស្ថិតក្នុងក្រោមការយាមកាមយ៉ាងតឹងតែងពីឆ្មាំសន្តិសុខស្រី-ប្រុស សូម្បីថតរូបពីខាងក្រៅក៏ត្រូវឆ្មាំទ្វារចេញមករារាំងយ៉ាងខ្លាំងក្លាដែរ។
មន្ត្រីរូបនេះបានប្រាប់ថា កាស៊ីណូ «PARIS» នេះ មានច្រកចូល២កន្លែង។ ច្រកខាងមុខដែលមានរៀបចំស្អាត មានយីហោត្រឹមត្រូវ គឺបើកទទូលភ្ញៀវដែលចូលលេងល្បែងក្នុងកាស៊ីណូជាធម្មតា ។ រីឯច្រកមួយកន្លែងទៀត គេបើកនៅចំហៀងផ្នែកខាងក្រោយ សម្រាប់ទទូលភ្ញៀវចូលលេងល្បែងខុសច្បាប់ ។ មន្ត្រីដដែលបានបញ្ជាក់ថា ភ្ញៀវជនជាតិខ្មែរដែលចូលលេងល្បែងខុសច្បាប់ នៅកន្ទុយកាស៊ីណូនេះ មានឆ្មាំទ្វារប្រុស-ស្រីយាមកាមយ៉ាងតឹងតែង។
ក្រុមឆ្មាំទាំងនេះ ជាអ្នកត្រូតពិនិត្យរាល់ការចេញចូលរបស់ភ្ញៀវ និងចាំរារាំងដល់អ្នកសារព័ត៌មាន ដែលព្យាយាមថតរូបភាពពីខាងក្រៅ ។ ល្បែងដែលជ្រោកក្រោមស្លាកកាស៊ីណូនេះ មានសង្វៀនជល់មាន់ ល្បែងអាប៉ោង បៀរ និងមានល្បែងហ្គេមបាញ់ត្រីផងដែរ ។ ប្រភពបានប្រាប់ថា អ្នកដែលចូលលេងល្បែងនេះ ស្ទើរ៩០% ជាប្រជាកសិករខ្មែរ ។ ពេលនេះ ពួកគេកំពុងសម្រុកយ៉ាងខ្លាំង ខណៈពេលនេះជារដូវប្រមូលកសិផលលក់បានប្រាក់ផង។
កាលពីចុងខែវិច្ឆិកាកន្លងទៅនេះ លោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់កោះសន្តិភាពថា ក្រោយពីបែកធ្លាយនូវបនល្បែងជ្រោកក្រោមស្លាកកាស៊ីណូខាងលើនេះ លោកស្នងការខេត្តបានចេញបញ្ជាឲ្យសមត្ថកិច្ចមូលដ្ឋានចុះស្រាវជ្រាវសួរនាំអំពីច្បាប់ទម្លាប់ ។ ប៉ុន្តែរហូតមកដល់ពេលនេះ ហាក់គ្មានការស៊ើបអង្កេតណាមួយ ត្រូវបានធ្វើឡើងឡើយ ។
ផ្ទុយទៅវិញ បនល្បែងទាំងនោះ នៅតែបើកទ្វារដំណើការយ៉ាងរលូន ដោយមិនរំខានដល់អាជ្ញាធរឬលោកស្នងការខេត្តឡើយ។ ជាមួយគ្នានេះ មតិនានា ក៏បានលើកឡើងដែរថា បនល្បែងដែលជ្រោកក្រោមស្លាកកាស៊ីណូខាងលើនេះ គ្មានឈ្មោះនៅក្នុងអាជ្ញាប័ណ្ណរបស់កាស៊ីណូទេ ។ ល្បែងទាំងនេះគ្រាន់តែបន្លំខ្លួន សម្ងំជ្រោកក្រោមកន្ទុយកាស៊ីណូតែប៉ុណ្ណោះ ។ មានមន្ត្រីខិលខូចមួយចំនួនក៏កំពុងធ្វើជាបង្អែក នៃបទល្មើសនេះដែរ។
លោកឧត្តមសេនីយត្រី ជេត វណ្ណនី មិនបានបកស្រាយយ៉ាងណាទៀតទេ ជុំវិញបនល្បែងស៊ីសងគ្មានច្បាប់ ជ្រោកក្រោមស្លាកកាស៊ីណូ «PARIS» នេះ ។ លោកគ្រាន់តែបញ្ជាក់ជាថ្មីថា «មិនទាន់មានការសួរនាំអ្វីនៅឡើយទេ»។ ប៉ុន្តែលោកបានប្រាប់ថា «បើតាមព័ត៌មានខ្លះៗ បនល្បែងនេះ ទំនងគ្មានច្បាប់មែន» ។
ដោយឡែក ពាក់ព័ន្ធនឹងកាស៊ីណូនេះ កំពុងធ្វើចរាចរណ៍ប្រាក់រៀលបំពានច្បាប់នោះ លោកជេត វណ្ណនី បានមានប្រសាសន៍ដែរថា «ខ្ញុំក៏បានទទូលព័ត៌មាននេះដែរ តែពេលនេះ ខ្ញុំកំពុងរកវិធីសាស្ត្រ ដើម្បីធ្វើការងារនេះហើយ» ប៉ុន្តែលោកមិនបាននិយាយអំពីវិធានការបង្ក្រាបបនល្បែងខុសច្បាប់នេះទេ ។
ព័ត៌មានពិស្តារនឹងមានផ្សាយជូននៅកាសែតកោះសន្តិភាព ។
ចែករំលែកព័តមាននេះ