រាជធានីភ្នំពេញ ៖ គណៈប្រតិភូសភាកម្ពុជាបានផ្តល់អនុសាសន៍សំខាន់ចំនួន៦ក្នុងកិច្ចប្រជុំមហាសន្និបាតលើកទី១១ នៃសភាតំបន់អាស៊ីនៅទីក្រុងអ៊ីស្តង់ប៊ុលប្រទេសទួកគី ។
លោក ឈិត គឹមយាត អនុប្រធានគណៈកម្មការការបរទេសសហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភាបានឲ្យដឹងនាព្រឹកថ្ងៃទី៤ ធ្នូនេះនៅអាកាសយានដ្ឋានអន្តរជាតិភ្នំពេញថា នៅក្នុងកិច្ចអំឡុងមហាសន្និបាត លើកទី១១ គណៈប្រតិភូសភាកម្ពុជា បានចូលរួមយ៉ាងសកម្មក្នុងកិច្ចប្រជុំសំខាន់ដូចជា កិច្ចប្រជុំក្រុមប្រឹក្សាប្រតិបត្តិលើកទី២នៃមហាសន្និបាតលើកទី១១ ដោយនៅក្នុងកិច្ចប្រជុំនោះលោក ងួន ញ៉ិល ប្រធានប្រតិភូត្រូវបានអង្គប្រជុំបោះឆ្នោតជ្រើសតាំងជាអនុប្រធានដឹកនាំកិច្ចប្រជុំ ។
កិច្ចប្រជុំបានពិភាក្សា និងអនុម័តរបៀបវារៈសំខាន់ៗសម្រាប់មហាសន្និបាតរួមមានរបាយការណ៍ក្រុមប្រឹក្សាប្រតិបត្តិលើកទី១ កម្មវិធីមហាសន្និបាតការជ្រើសតាំងអនុប្រធានទាំង៤ សម្រាប់មហាសន្និបាតលើកទី១១ របស់ APA ការបញ្ជាក់ជាថ្មីនូវបេក្ខភាពប្រធាន APA សម្រាប់អាណត្តិបន្ទាប់២០២០-២០២១ និងការអនុម័តទទួលសភានៃប្រទេសទីម័រឡែសជាសមាជិកទី៤៣ នៃAPA ។ លោកបន្តថា ក្នុងកិច្ចប្រជុំលោក ងួន ញ៉ិល អនុប្រធានទី១ រដ្ឋសភា និងជាប្រធានក្រុមជាតិសភាកម្ពុជាសភាតំបន់អាស៊ីបានសង្កត់ធ្ងន់ថា ការលើកកម្ពស់កំនើនសេដ្ឋកិច្ច និងវិបុលភាពក្នុងតំបន់បានបង្ហាញពីបទពិសោធន៍ និងវឌ្ឍនភាពគួរជាទីមោទនៈរឹងមាំ និងធន់ដែលជាមធ្យមក្នុងរង្វង់៧ភាគ ក្នុងរយៈពេល២ទសវត្សរ៍ចុងក្រោយ ។
លោកបន្តថា លទ្ធផលនៃវឌ្ឍនភាពសេដ្ឋកិច្ចសង្គមបានប្រែក្លាយកម្ពុជាពីភាពក្រីក្រទៅជាប្រទេសមានចំណូលមធ្យមកម្រិតទាប និងឈានទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ ។ លោកអនុប្រធានទី១ រដ្ឋសភាក៏បានផ្តល់អនុសាសន៍សំខាន់ៗក្នុងន័យលើកកម្ពស់វិបុលភាព សេដ្ឋកិច្ចក្នុងតំបន់ឲ្យកាន់តែប្រសើរឡើង និងប្រកបដោយបរិយាប័ន្ធ ក្នុងនោះមានទី១-ត្រូវរក្សាការពារ និងលើកកម្ពស់នូវសន្តិភាព និងស្ថេរភាពដែលជាកក្តាចម្បង និងបុព្វបទគន្លឹះសម្រាប់ការអភិវឌ្ឍ ។ ទី២- ការគាំទ្រដល់ប្រព័ន្ធអន្តរជាតិដោយផ្អែកលើកបទដ្ឋានគតិយុត្តិ ។ ទី៣- អំពាវនាវដល់ប្រទេសដែលមានសេដ្ឋកិច្ចជឿនលឿនចែករំលែងការប្រតិបត្តិល្អៗដល់ប្រទេសកំពុងអភិវឌ្ឍ និងមានសេដ្ឋកិច្ចកំពុងលូតលាស់ ។ ទី៤- លើកកម្ពស់ពាណិជ្ជកម្មសេរី និងវិនិយោគដែលជាកត្តាសំខាន់ជម្រុះដល់កំនើនសេដ្ឋកិច្ច និងទី៦- ពង្រឹងលើកកម្ពស់ និងគាំទ្រដល់សហគ្រាសខ្នាតតូច និងធម្យមតាមរយៈការផ្តល់ធនធានហិរញ្ញវត្ថុ លើកកម្ពស់ ជំនាញ វិជ្ជាជីវៈ និងបច្ចេកទេស ។
លោក ឈិត គឹមយាត បានលើកឡើងទៀតថា លទ្ធផលនៃមហាសន្និបាតទទួលផ្លែផ្លាយ៉ាងច្រើនដូចជា បានអនុម័តសេចក្តីសម្រេចចំនួន២៥ពាក់ព័ន្ធនឹងគណៈកម្មការចំនួន៤សំខាន់ គឺគណៈកម្មការនយោបាយចំនួន៧ និងក្រុមការងារចំនួន២ទៀត ក្រោមគណៈកម្មាធិការនេះ គណកម្មការសង្គម និងវប្បធម៌ ចំនួន៩គណៈកម្មការសេដ្ឋកិច្ច និងការអភិវឌ្ឍប្រកបដោយចីរភាពចំនួន៦ ។ អនុម័តសេចក្តីប្រកាសទីក្រុងអ៊ីស្តង់ប៊ុលដោយផ្តោតសំខាន់លើការលើកកម្ពស់វិបុលភាពសេដ្ឋកិច្ចក្នុងតំបន់គាំទ្រដល់កិច្ចខិតខំប្រឹងប្រែងរបស់ទេ្វភាគីក្នុងការចែករំលែកក្នុងតំបន់ ។ អនុម័តយល់ព្រមឲ្យសភាប៉ាគីស្ថានជាប្រធានា APA បន្ទាប់ពីរដ្ឋសភាទួកគីសម្រាប់អាណត្តិ២០២០- ២០២១ ។
លោកបានបន្ថែមថា ទាក់ទងនឹងកិច្ចការថវិកា និងផែនការអង្គមហាសន្និបាតក៏បានស្តាប់របាយការណ៍របស់លេខាធិការដ្ឋាន APA ពន្លឿននូវការឯកភាពនៃការបង់វិភាគទានដល់ APA ដោយផ្អែកលើរូបមន្តនៃការបង់វិភាគទានចំនួន៣ទម្រង់ គឺ១- ផ្អែកលើ GDP ២- សមភាព (បង់ដូចគ្នា) ៣- គឺការច្របាច់បញ្ចូលគ្នារវាងទម្រង់ទី១ និងទី២ ៕
ចែករំលែកព័តមាននេះ