ខេត្តកំពង់ធំ ៖ ទៅឃ្វាលគោចុះមុជទឹកស្រះលង់ស្លាប់ទាំងពីរនាក់បងប្អូនករណីនេះបានបង្កឲ្យមានការភ្ញាក់ផ្អើលកាលពីវេលាម៉ោង០១និង៣០នាទីរសៀល ថ្ងៃទី០៣ ខែធ្នូ ឆ្នាំ២០១៨ ទីនៅចំណុចថ្នល់ខ្អាវខាងលិច ភូមិក្រសាំង ស្ថិតក្នុងឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
លោកវរសេនីយ៍ឯក ខេន ឈុនគ័រ អធីការនគរបាលស្រុកកំពង់ស្វាយប្រាប់ថា សពជនរងគ្រោះទាំងពីរនាក់បងប្អូនទី១-ឈ្មោះ ចំរើន វីរៈ ភេទប្រុស អាយុ១២ឆ្នាំ និងទី២-សពឈ្មោះ ចំរើន រដ្ឋា ភេទប្រុស អាយុ១៣ឆ្នាំ មុខរបរសិស្សរស់នៅភូមិកើតហេតុ ។
បើតាមការបំភ្លឺពីឈ្មោះ យ៉ាន់ ចំរើន អាយុ៤៣ឆ្នាំ ត្រូវជាឪពុករបស់ជនរងគ្រោះនិយាយថាលោកមានប្រពន្ធឈ្មោះ យន សុខ អាយុ៤៥ឆ្នាំ មានកូនចំនួនបីនាក់សុទ្ធតែប្រុស លោកបានរៀបរាប់ថា កាលពីវេលាម៉ោង១២ថ្ងៃត្រង់ ថ្ងៃកើតហេតុក្រោយពីចេញពីសាលារៀនហូបបាយរួចកូនៗទាំង០២នាក់របស់លោក រួមជាមួយនឹងឈ្មោះ ឈៀ សុវណ្ណ ភេទប្រុស អាយុ១១ឆ្នាំនៅភូមិជាមួយគ្នាបាននាំគ្នាទៅឃ្វាលគោនៅតំបន់កើតហេតុខាងលើ ។
លុះដល់ម៉ោង០១និង៣០នាទីរសៀល ក្មេងម្នាក់ឈ្មោះ ឈៀ សុវណ្ណ បានរត់មករាយការណ៍ប្រាប់លោកថា កូនទាំងពីរនាក់ពូកំពុងតែចុះលេងទឹកស្រះលង់ ហើយពេលឮដូច្នេះខ្លួនគាត់ជាឪពុកក៏នាំគ្នារត់ទៅកន្លែងកើតហេតុ ចុះស្រង់យកសពកូនទាំង២យកទៅពេទ្យដើម្បីជួយសង្គ្រោះនៅពេលទៅដល់ត្រូវបានក្រុមគ្រូពេទ្យប្រាប់ថា ក្មេងទាំង០២នាក់បានស្លាប់បាត់ទៅហើយធ្វើឲ្យពួកគាត់ជាឪពុកម្តាយស្ទើរគាំងបេះដូងស្លាប់ទៅហើយនៅពេលដែលឃើញកូនៗស្លាប់ម្តងទាំងពីរនាក់យ៉ាងដូច្នេះ ។
បន្ទាប់ពីទទួលព័ត៌មានកម្លាំងជំនាញ និងប៉ុស្តិ៍ព្រមទាំងរដ្ឋអំណាចមូលដ្ឋានបានចូលរួមពិនិត្យសពមិនឃើញមានស្លាកស្នាមអ្វីឡើយក៏ប្រគល់ឱ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ