ខេត្តបាត់ដំបង ៖ អាជ្ញាធរស្រុកសំពៅលូន នៅព្រឹកថ្ងៃទី០៤ ធ្នូ នេះ បានដឹកនាំកម្លាំងចម្រុះ ដែលមានក្រុមគ្រួពេទ្យផង ចុះពិនិត្យនិងធ្វើការស្រាវជ្រាវរកមូលហេតុ ដែលនាំឲ្យយុវសិស្សនៃវិទ្យាល័យសំពៅលូន…
ខេត្តបាត់ដំបង ៖ អាជ្ញាធរស្រុកសំពៅលូន នៅព្រឹកថ្ងៃទី០៤ ធ្នូ នេះ បានដឹកនាំកម្លាំងចម្រុះ ដែលមានក្រុមគ្រួពេទ្យផង ចុះពិនិត្យនិងធ្វើការស្រាវជ្រាវរកមូលហេតុ ដែលនាំឲ្យយុវសិស្សនៃវិទ្យាល័យសំពៅលូន ចំនួនជាង៤០នាក់ ដូលសន្លប់ជាបន្តបន្ទាប់ ចាប់តាំងពីថ្ងៃទី២៩ វិច្ឆិកា រហូតដល់ព្រឹកថ្ងៃទី០៤ ធ្នូ នេះ ដោយមិនដឹងអំពីមូលហេតុច្បាស់លាស់ ។
តាមការផ្ដល់ព័ត៌មានពីសមត្ថកិច្ចបានឲ្យដឹងថា យុវសិស្សភាពច្រើនជានារីបានដួលសន្លប់ ដោយមិនដឹងពីមូលហេតុ ក្នុងរយៈពេលប៉ុន្មានថ្ងៃជាប់ៗគ្នាកន្លងទៅនេះជាបន្តបន្ទាប់ តែមិនទាន់មានគ្រើថ្នាក់ដល់អាយុជីវិតនៅឡើយទេ ។ ពួកគេមួយចំនួនមានអាការៈក្អួតចង្អោរ និងមួយចំនួនទៀត វិលមុខដូលសន្លប់តែម្ដង។
សមត្ថកិច្ចបានប្រាប់ថា កាលពីដំបូងមានការអះអាងថា ក្រុមយុវសិស្សទាំងនោះ ទំនងពុលចំណីអាហារដែលលក់ដូរនៅក្នុងសាលា ដែលគ្មានអនាម័យ និងចំណីដែលខូចគុណភាព ។ រីឯខ្លះទៀត បានលើកឡើងថា ដំបូងមានកូនសិស្សកើតខ្យល់ដួលសន្លប់ ទើបធ្វើឲ្យសិស្សដទៃទៀតភ័យរន្ធត់រហូតដួលសន្លប់ជាបន្តបន្ទាប់ប៉ុន្មានថ្ងៃកន្លងទៅនេះ ។
សមត្ថកិច្ចបានបញ្ជាក់ថា ចាប់តាំងពីថ្ងៃទី២៩ វិច្ឆិកា រហូតដល់ព្រឹកថ្ងៃទី០៤ធ្នូ នេះ កូនសិស្សបានដូលសន្លប់ចំនួន៤១នាក់ហើយ ក្នុងនោះ មានប្រុសចំនួន២នាក់ ។ ប៉ុន្តែយ៉ាងណាក្ដី ក្រុមមន្ត្រីជំនាញដែលដឹកនាំដោយអាជ្ញាធរស្រុក ចុះពិនិត្យ និងធ្វើការស្រាវជ្រាវដល់ទីតាំងកើតហេតុ ហាក់មិនទាន់មានការវាយតំលៃជាក់លាក់អំពីមូលហេតុដែលនាំឲ្យកូសិស្សដូលសន្លប់ជាបន្តបន្ទាប់នៅឡើយទេ។
មន្ត្រីដែលចុះទៅកាន់វិទ្យាល័យសំពៅលូន បានឲ្យដឹងជាបឋមថា បើតាមការស្រាវជ្រាវយើងគ្រាន់តែអាចសន្និដ្ឋានជំហ៊ានដំបូងបានខ្លះៗថា អាចបណ្ដាលមកពីសិស្សប្រឹងរៀនលើសម៉ោងទាំងម៉ោងរដ្ឋនិងម៉ោងរៀនគួរ ដែលមិនមានពេលសម្រាកគ្រប់គ្រាន់ ហូបអាហារមិនទៀងពេល មិនគ្រប់គ្រាន់ និងមានយុវសិស្សខ្លះតមអាហារសម្រករាង និងខ្លះទៀតអាចដូលសន្លប់ដោយសារថប់អារម្មណ៏ពេលឃើញយុវសិស្សដទៃមានអាការៈពុលក្អូតចង្អោរ
។ល។
មន្ត្រីដដែលបានបញ្ជាក់ថា ក្រោយពីចុះពិនិត្យទៅលើស្ថានភាពជំងឺរបស់សិស្ស ពេលនេះអាជ្ញាធរស្រុក បានស្នើឲ្យលោកនាយកវិទ្យាល័យផ្អាកកាសិក្សាដល់សិស្សរយៈពេល២ថ្ងៃសិន ដើម្បីឲ្យសិស្សមានអារម្មណ៏ល្អប្រសើរឡើងវិញ និងបានប្រកាសដល់សិស្សានុសិស្សទាំងឡាយណាដែលមានអាការៈមិនស្រូល សុំឲ្យអាណាព្យាបាលប្រញាប់ប្រញ៉ាលបញ្ជូនពួកគេទៅកាន់មន្ទីរពេទ្យបង្អែកស្រុកសំពៅលូន ដើម្បីព្យាបាលដោយមិនចាំបាច់បង់ប្រាក់ឡើយ ។ ប៉ុន្តែយ៉ាងណាអាជ្ញាធរបានអះអាងថា ក្រុមមន្ត្រីជំនាញនៅតែបន្តចុះស្រាវជ្រាវ ដើម្បីស្វែងរកការពិតអំពីករណីសិស្សដូលសន្លប់ខាងលើនេះ ។
ចែករំលែកព័តមាននេះ