រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវបងប្អូនប្រជាពលរដ្ឋចាប់បាន ហើយស្វាគមន៍ម្នាក់មួយដៃមួយជើង រួចប្រគល់ឱ្យនគរបាលប៉ុស្តិ៍ផ្សារដើមគ បន្ទាប់ពីជនសង្ស័យរូបនោះឆក់ទូរសព្ទ័របស់ជនរងគ្រោះម្នាក់សំរេច ដេញតាមបំបុកដួលម៉ូតូទើបចាប់បាន កាលពីម៉ោង១២និង២០នាទីរំលងអធ្រាត្រឈានចូលថ្ងៃទី៤ ខែធ្នូ…
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវបងប្អូនប្រជាពលរដ្ឋចាប់បាន ហើយស្វាគមន៍ម្នាក់មួយដៃមួយជើង រួចប្រគល់ឱ្យនគរបាលប៉ុស្តិ៍ផ្សារដើមគ បន្ទាប់ពីជនសង្ស័យរូបនោះឆក់ទូរសព្ទ័របស់ជនរងគ្រោះម្នាក់សំរេច ដេញតាមបំបុកដួលម៉ូតូទើបចាប់បាន កាលពីម៉ោង១២និង២០នាទីរំលងអធ្រាត្រឈានចូលថ្ងៃទី៤ ខែធ្នូ ឆ្នាំ២០១៨ ចំណុចស្តុបនាងគង់ហ៊ីង ផ្លូវទេព្យផន សង្កាត់មនោរម្យ ខណ្ឌ៧មករា ឃាត់ខ្លួនបាននៅម្តុំលក់បន្លែផ្សារដើមគ ផ្លូវព្រះមុនីរ៉េត សង្កាត់ផ្សារដើមគ ខណ្ឌទួលគោក ។
ជនរងគ្រោះមានឈ្មោះ សំ បូរ អាយុ២៣ឆ្នាំ មុខរបរធ្វើការនៅក្រុមហ៊ុនឯកជន ស្នាក់នៅ ម្តុំសំណង់១២ សង្កាត់ទឹកល្អក់៣ ខណ្ឌទួលគោក បានបាត់ទូរស័ព្ទម៉ាក iPhon 6មួយគ្រឿង ។ ចំណែកជនសង្ស័យឈ្មោះ ឡៃ សុផានី ភេទប្រុស អាយុ១៦ឆ្នាំ មុខរបរមិនពិតប្រាកដ ស្នាក់នៅភូមិខ្មួញ សង្កាត់ខ្មួញ ខណ្ឌសែនសុខ រីឯបក្សពួកម្នាក់ទៀតដែលរត់គេចខ្លួនបាត់មិនបានឱ្យដឹងឈ្មោះនោះ ។ វត្ថុតាងដែលដកហូតបានមាន ម៉ូតូម៉ាកហុងដាឌ្រីម ស៊េរីឆ្នាំ ២០១៩ ពណ៌ទឹកមាស ពាក់ស្លាកលេខ ភ្នំពេញ 1HG 6788 ជារបស់ជនសង្ស័យ ជិះធ្វើសកម្មភាព ។
តាមសម្តីជនរងគ្រោះឱ្យដឹងថា មុនកើតហេតុ រូបគាត់បានជិះម៉ូតូម៉ាកគុបជ្រុង សេ៩០ ពណ៌ទឹកប៊ិច ពាក់ស្លាកលេខ ភ្នំពេញ 1CM5529 បានចេញពីផ្ទះនៅម្តុំសំណង់១២ ខណ្ឌទួលគោក គោលបំណងទៅយកប្រពន្ធទៅម្តុំអូឡាំពិក ខណៈរូបគាត់ជិះម៉ូតូមកដល់ចំណុចកើតហេតុ រូបគាត់បានទាញទូរស័ព្ទមកនិយាយគ្នាជាមួយនឹងប្រពន្ធ តែពេលនោះជនសង្ស័យ២នាក់ជិះម៉ូតូម៉ាកហុងដាឌ្រីម ពណ៌ទឹកមាស មកពីក្រោយ រួចឆក់យកទូរស័ព្ទពីដៃរបស់គាត់បានសំរេច ហើយជនសង្ស័យទាំងនោះក៏បានបន្ថែមល្បឿនម៉ូតូរត់គេចខ្លួន ។
ប្រភពដដែលបន្តទៀតថា បន្ទាប់ពីជនសង្ស័យជិះរត់គេចខ្លួន រូបគាត់បានជិះម៉ូតូតាមពីក្រោយ រហូតមកដល់ម្តុំលក់បន្លែផ្សារដើមគ ក៏ជិះបំបុកម៉ូតូជនសង្ស័យពីក្រោយ បណ្តាលឱ្យដួលគរលើគ្នា ធ្វើឱ្យរូបគាត់ជាជនរងគ្រោះរងរបួសរលាត់ដៃរលាត់ជើងតិចតួច ចំណែកជនសង្ស័យវិញក៏នាំគ្នារត់គេចខ្លួនចោលម៉ូតូនៅកន្លែងកើតហេតុ តែចៃដន្យបានបងប្អូនប្រជាពលរដ្ឋនៅក្បែរនោះជួយដេញចាប់បានជនសង្ស័យដែលអង្គុយខាងក្រោយ ហើយស្វាគមន៍ម្នាក់មួយដៃមួយជើង ទើបយកទៅប្រគល់ឱ្យសមត្ថកិច្ចប៉ុស្តិ៍នគរបាលផ្សារដើមគ ធ្វើការសាកសួរ ចំណែកជនសង្ស័យម្នាក់ទៀតជាអ្នកបើកម៉ូតូបានរត់គេចខ្លួនបាត់ ។
ក្រោយពេលកើតហេតុ សមត្ថកិច្ចបាននាំខ្លួនជនសង្ស័យទៅទៅសាកសួរ និងចង្អុលបង្ហាញកន្លែងកើតហេតុឃើញថា ករណីនេះ គឺកើតហេតុនៅសង្កាត់មនោរម្យ ខណ្ឌមករា ទើបសមត្ថកិច្ចប៉ុស្តិ៍នគរបាលផ្សារដើមគ ប្រគល់ជនសង្ស័យ និងជនរងគ្រោះយកទៅខាងសមត្ថកិច្ច ប៉ុស្តិ៍នគរបាលមនោរម្យ ដើម្បីចាត់ការបន្តតាមនីតិវិធី រីឯទូរស័ព្ទរបស់ជនរងគ្រោះរកមិនឃើញទេ៕
ចែករំលែកព័តមាននេះ