រាជធានីភ្នំពេញ ៖ យ៉ាងហោចណាស់ បុរសម្នាក់និងស្ត្រីម្នាក់បានរងរបួសធ្ងន់ធ្ងរ ចំណែករថយន្ត២គ្រឿង និងម៉ូតូហុងដាឌ្រីមធុនសេ១២៥មួយគ្រឿង ព្រមទាំងម៉ូតូកង់បីឥណ្ឌា១គ្រឿង បានរងការខូចខាតដោយ សារតែរថភ្លើងក្រុមហ៊ុនរ៉ូយ៉ាល់រេវេ បើកបុកនិងកៀររុញរថយន្តឱ្យខ្ទាតចូលទៅក្នុងផ្ទះលក់គ្រឿងទេស…
រាជធានីភ្នំពេញ ៖ យ៉ាងហោចណាស់ បុរសម្នាក់និងស្ត្រីម្នាក់បានរងរបួសធ្ងន់ធ្ងរ ចំណែករថយន្ត២គ្រឿង និងម៉ូតូហុងដាឌ្រីមធុនសេ១២៥មួយគ្រឿង ព្រមទាំងម៉ូតូកង់បីឥណ្ឌា១គ្រឿង បានរងការខូចខាតដោយ សារតែរថភ្លើងក្រុមហ៊ុនរ៉ូយ៉ាល់រេវេ បើកបុកនិងកៀររុញរថយន្តឱ្យខ្ទាតចូលទៅក្នុងផ្ទះលក់គ្រឿងទេស និងផ្ទុបបង្គោលស្លាកយីហោមួយកន្លែង ខណៈពេលដែលរថយន្ត និងម៉ូតូខាងលើកំពុងឈប់ភ្លើងស្តុបក្រហមលើផ្លូវដែក ។
ហេតុការណ៍នេះ បានកើតឡើងកាលពីវេលាម៉ោងប្រមាណ៧ និង៤៥នាទីព្រឹកថ្ងៃទី០៣ ធ្នូ នៅលើកំណាត់ផ្លូវចូលវត្តតាំងកសាងខាងត្បូង ត្រង់ចំណុចភ្លើងស្តុបមុខអាកាសយានដ្ឋានអន្តរជាតិភ្នំពេញ កែងមហាវិថីសហព័ន្ធរុស្សុី ស្ថិតនៅក្នុងភូមិក្បាលដំរី សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះដែលរងរបួសធ្ងន់ធ្ងរនោះ ពុំត្រូវបានស្គាល់អត្តសញ្ញាណទេ ពួកគាត់ជិះម៉ូតូម៉ាកហុងដាឌ្រីមធុនសេ១២៥មួយគ្រឿង ត្រូវបានអ្នកជិតខាងបញ្ជូនទៅកាន់មន្ទីរពេទ្យបង្អែកពោធិ៍ចិនតុងដើម្បីសង្គ្រោះ ។ ប៉ុន្តែដោយសាររបួសធ្ងន់ ទើបត្រូវបានបញ្ជូនបន្តទៅកាន់មន្ទីរពេទ្យកាល់ម៉ែតហើយម៉ូតូរបស់គាត់បានរងការខូចខាតយ៉ាងដំណំ ។
តាមប្រភព័ត៌មានបានឲ្យដឹងថា នៅក្នុងហេតុការណ៍មួយនេះ បានបណ្ដាលឲ្យមានការខូចខាតរថយន្តម៉ាក CANTEER ពណ៌.ស ពាក់ស្លាកលេខបាត់ដំបង៣A០៣៨០មួយគ្រឿង ។ រថយន្តម៉ាកកាមរីបាឡែន១គ្រឿងពណ៌ស្ករ ពាក់ស្លាកលេខ ភ្នំពេញ២H-៦៣៤៤ ។ ម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ និងឡំប្រឺតាឥណ្ឌា១គ្រឿង ព្រមទាំងរបួសមនុស្ស២នាក់ ។ ចំណែករថភ្លើងក្រោយពេលបុករថយន្តរួចបានបើកបន្តដំណើរទៅគោលដៅ អត់មានឈប់ទេ ។
ប្រភពដដែលបានបន្តថា នៅមុនពេលកើតហេតុរថយន្តម៉ាក CANTEER បានធ្វើដំណើរលើផ្លូវរថភ្លើងក្នុងទិសដៅពីជើងទៅត្បូង ។ ចំណែករថយន្តម៉ាកកាមរីបាឡែនរួមជាមួយម៉ូតូហុងដាឌ្រីម និងឡំប្រឺតាឥណ្ឌាបើកបរក្នុងទិសដៅស្របគ្នាដែរ ។ លុះពេលទៅដល់ត្រង់ចំណុចភ្លើងស្តុបមុខអាកាសយានដ្ឋានអន្តរជាតិភ្នំពេញ ភ្លើងស្តុបបានលោតក្រហម ក៏បាននាំគ្នាឈប់រង់ចាំបន្តដំណើរ ពេលភ្លើងស្តុបលោតខៀវ គឺឈប់លើផ្លុវដែក ។ ស្របពេលរថភ្លើងដឹកអ្នកដំណើររបស់ក្រុមហ៊ុនរ៉ូយ៉ាល់រេលវេ ចេញពីភ្នំពេញចូលអាកាសយានដ្ឋានបានទៅដល់ល្មម បុករះទាំងអស់នូវអ្វីដែលចតលើផ្លូវដែក ។
ប្រភពដដែលបានបន្តទៀតថា ខណៈនោះរថភ្លើងបានចុចសុីផ្លេយ៉ាងរន្ថើនដែរ ប៉ុន្តែរថយន្តម៉ាក CANTER នេះ មិនអាចគេចចេញទៅណាផុតពីផ្លូវដែកបានឡើយ ព្រោះទើសរថយន្ត និងម៉ូតូជាច្រើនគ្រឿងនៅពីមុខ និងពីក្រោយកំពុងតែឈប់ចាំភ្លើងស្តុបដែរ ។ ចំណែករថភ្លើង ក៏មិនបានជាន់ហ្វ្រាំងឈប់ឬបន្ថយល្បឿនឡើយ ហើយក៏បានបុករុញរថយន្ត CANTER នោះ បណ្ដាលឲ្យរថយន្តនេះជ្រុលទៅបុកអ្នកជិះម៉ូតូ២នាក់រងរបួសរួចជ្រុលទៅបុកឡំប្រឺតាឥណ្ឌាមួយតង់ទៀត ព្រមទាំងរុញបន្តគ្នាទៅបុករថយន្តកាមរីបាឡែនដែលកំពុងឈប់នៅក្បែរនោះរុញចូលផ្ទះលក់គ្រឿងទេស និងរុញផ្ទុបបង្គោលស្លាកយីហោទើបឈប់ស្ងៀមបណ្ដាលឲ្យរថយន្តកាមរីបាឡែនរងការខូចខាតធ្ងន់ធ្ងរគ្រាន់បើ ។
ប្រភពខាងលើបានបន្តថា ចាត់ទុកជាសំណាងមួយរបស់បុរសម្នាក់ ជាម្ចាស់ផ្ទះពេលកំពុងអង្គុយលក់គ្រឿងទេស បានលោតគេចចេញទាន់ ទើបគ្មានគ្រោះថ្នាក់ ។ សម្រាប់រថភ្លើងបានបន្តដំណើរចូលទៅក្នុងអាកាសយានដ្ឋានអន្តរជាតិភ្នំពេញ និងក្រោយពេលដាក់អ្នកដំណើរចុះរួចរាល់ ទើបបើកត្រឡប់ចូលទៅភ្នំពេញវិញបាត់ ។
ចំណែកកម្លាំងនគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះធ្វើការវាស់វែងនាំយករថយន្តទាំង២គ្រឿង និងម៉ូតូរងគ្រោះទៅរក្សាទុករង់ចាំការដោះស្រាយអត់បានយករទេះភ្លើងទៅទុកជាមួយទេ ។ រីឯឡំប្រឺតាឥណ្ឌារងការខូចខាតបន្តិចបន្តួចខ្ជិលវែងឆ្ងាយក៏បន្តដំណើរទៅ
មុខបាត់ស្រមោលដែរ ៕
ចែករំលែកព័តមាននេះ