រាជធានីភ្នំពេញ ៖ ចៅក្រមជំនុំជម្រះនៃតុលាការកំពូលនៅថ្ងៃទី៣ ខែធ្នូ ឆ្នាំ២០១៨ បានប្រកាសសាលដីកាសម្រេចផ្ដន្ទាទោសបុរសជនជាតិវៀតណាម២នាក់ដាក់ពន្ធនាគារកំណត់ម្នាក់ៗ២៥ឆ្នាំ និងពិន័យជាប្រាក់ក្នុងម្នាក់ៗ៥០លានរៀលបង់ចូលថវិការដ្ឋក្រោមការចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀនឆ្លងដែន…
រាជធានីភ្នំពេញ ៖ ចៅក្រមជំនុំជម្រះនៃតុលាការកំពូលនៅថ្ងៃទី៣ ខែធ្នូ ឆ្នាំ២០១៨ បានប្រកាសសាលដីកាសម្រេចផ្ដន្ទាទោសបុរសជនជាតិវៀតណាម២នាក់ដាក់ពន្ធនាគារកំណត់ម្នាក់ៗ២៥ឆ្នាំ និងពិន័យជាប្រាក់ក្នុងម្នាក់ៗ៥០លានរៀលបង់ចូលថវិការដ្ឋក្រោមការចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀនឆ្លងដែន តាមមាត្រា៤០នៃច្បាប់ប្រឆាំងគ្រឿងញៀន ។ សេចក្ដីសម្រេចនេះធ្វើឡើងនៅចំពោះមុខជនជាប់ចោទ វ៉ាន់ វ៉ាយ ភេទប្រុស អាយុ៤៦ឆ្នាំ ជនជាតិវៀតណាម នឹងកំបាំងមុខជនជាប់ចោទ ឈ្មោះ ឡេ ម៉េងឡាំ តែចាត់ទុកជាចំពោះមុខ ។
សូមរំលឹកថា សាលាដំបូងរាជធានីភ្នំពេញកាលពីខែកុម្ភៈ ឆ្នាំ២០១៥ បានសម្រេចផ្តន្ទាទោសមេខ្លោងជួញដូរគ្រឿងញៀនជនជាតិវៀតណាម២នាក់ដាក់គុកក្នុងម្នាក់ៗ២៥ឆ្នាំ និងពិន័យជាប្រាក់ក្នុងម្នាក់ៗ៥០លានរៀល ពាក់ព័ន្ធនឹងការរក្សាទុក និងដឹកជញ្ជូនសារធាតុញៀនប្រភេទខេតាមីន (K-Tamines) ទម្ងន់ជាង ៣៨.១០០ក្រាមប្រព្រឹត្តកាលពីថ្ងៃទី១៤ ខែកុម្ភៈ ឆ្នាំ២០១៤ ។
លោក តុប ឈុនហេង ប្រធានចៅក្រមជំនុំជម្រះបានឲ្យដឹងថាបុរសវៀតណាមទាំង២នាក់នេះមានឈ្មោះ វ៉ាន់ វ៉ាយ អាយុ៤៦ឆ្នាំ (នៅក្នុងឃុំ) និងឡេ ម៉េងឡាំ អាយុ៣០ ឆ្នាំ (រត់គេចខ្លួន) ។
លោកវរ សេនីយ៍ទោឈូក គា នាយរង ការិយាល័យប្រឆាំងគ្រឿងញៀននៃមន្ទីរ ប្រឆាំងគ្រឿងញៀនក្រសួងមហាផ្ទៃបានថ្លែងនៅក្នុងអង្គសវនាការកាលពីថ្ងៃទី១៧ ខែកុម្ភៈ ឆ្នាំ២០១៥ ថាឈ្មោះ វ៉ាន់ វ៉ាយ គឺជាមេខ្លោង ជួញ ដូរគ្រឿងញៀនដ៏សកម្មម្នាក់ដែលលាក់ខ្លួននៅកម្ពុជា ។
ជននេះត្រូវបានចាប់ខ្លួនកាលពីថ្ងៃទី២០ ខែមករា ឆ្នាំ២០១៤ នៅខាងក្រោយផ្សារអូឡាំពិកជាប់ពាក់ព័ន្ធនឹងការផ្ញើសារធាតុគ្រឿងញៀនសុទ្ធ ទម្ងន់សរុបចំនួន១២,១២គីឡូក្រាមពីសាខាប្រៃសណីយ៍ច្បារអំពៅទៅកាន់ប្រទេស អូស្ត្រាលី ។
លោកបន្តថា ការបង្ក្រាបករណីការជួញដូរគ្រឿងញៀនឆ្លងដែនខាងលើនេះត្រូវបានធ្វើឡើងបន្ទាប់ពីនគរបាលជាតិបានទទួលព័ត៌មានពីនគរបាលសហព័ន្ធអូស្ត្រាលីពីករណីផ្ញើសារធាតុផ្សំគ្រឿងញៀនលាក់បង្កប់ក្នុងតុក្កតាទៅប្រទេសអូស្ត្រាលីចំនួនពីរករណីប្រព្រឹត្តកាលពីថ្ងៃទី១៩ ខែធ្នូ ឆ្នាំ២០១៣ និងថ្ងៃទី០៨ ខែមករា ឆ្នាំ២០១៤ តាមប្រៃសណីយ៍ច្បារអំពៅ ។
ក្រៅពីនេះជនជាប់ចោទបានលាក់ទុកគ្រឿងញៀននៅក្នុងកន្សែងពោះគោចំនួន១៨កន្លែងមានទម្ងន់ចំនួន៣៨,១០០ក្រាមនៅក្នុងបន្ទប់ខុនដូជួលរបស់គាត់ក្នុងសង្កាត់ទឹកល្អក់ខណ្ឌទួលគោក ៕
ចែករំលែកព័តមាននេះ