ខេត្តមណ្ឌលគិរី ៖ ពិតជាអាសូរពន់ពេកចំពោះជនរងគ្រោះវ័យ១៨ឆ្នាំម្នាក់ព្រោះតែជីវភាពក្រីក្ររកព្រឹកខ្វះល្ងាចត្រូវបង្ខំចិត្តដឹកឈើខ្នាតយក្សតាមម៉ូតូកែច្នៃចៃដន្យសំណាងមិនល្អបុកសត្វឆ្កែរត់តាមផ្លូវបណ្តាលឲ្យដួសឈើសង្កត់ពីលើស្លាប់ភ្លាមមួយរំពេច ។
ហេតុការណ៏រន្ធត់នេះបានកើតឡើងនាវេលាម៉ោង៩នឹង៥០នាទីយប់ថ្ងៃទី០៣ ខែធ្នូ ឆ្នាំ២០១៨ នៅចំណុចគីឡូម៉ែត្រលេខ៦៤ ផ្លូវជាតិលេខ៧៦ ស្ថិតនៅក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។
ជនរងគ្រោះឈ្មោះ អ៊ីង ហុក ភេទប្រុស អាយុ១៨ឆ្នាំ ជនជាតិដើមភាគតិចព្នង រស់នៅភូមិអូររណា ឃុំស្រែ ស្រុកកែវសីមា ខេត្តមណ្ឌលគិរី ។
សមត្ថកិច្ចឲ្យដឹងថា មានករណីគ្រោះថ្នាក់ចរាចរណ៍ដោយម៉ូតូកែច្នៃដឹកឈើចំនួន១ដុំប្រវែង២ម៉ែត្រប្រភេទកកោះចេញពីទិសខាងកើតមកលិចមកដល់ចំណុចកើតហេតុបានបុកសត្វឆ្កែម៉ូតូដួលសង្កត់អ្នកបើកបរបណ្តាលឲ្យស្លាប់នៅកន្លែងកើតហេតុ ។
ក្រុមអ្នកតាមដានបញ្ហាបរិស្ថានបានស្នើរដល់អាជ្ញាធរគប្បីទប់ស្តាប់ការដឹកជញ្ជួនឈើគ្រប់ប្រភេទជាពិសេសអ្នកដឹកតាមម៉ូតូដោយសារកន្លងមកគេតែងសង្កេតឃើញមានជនរងគ្រោះត្រូវពិការភាព និងស្លាប់ដោយសារម៉ូតូដឹកឈើដួលជាញឹកញាប់ ។
ក្រុមដដែលបន្តថា សកម្មភាពជួញដូរឈើនៅក្នុងទឹកដីស្រុកកែវសីមាដែលមានដែនជម្រកការពារសត្វព្រៃកែវសីមា និងដែនជម្រកការពារសត្វព្រៃភ្នំព្រេចកំពុងកើតមានបទល្មើសពេញបន្ទុក ខណៈការគ្រប់គ្រងរបស់មន្ត្រីមូលដ្ឋានហាក់នៅមានកម្រិតតិចតួចក្នុងការទប់ស្តាត់ក្រុមឈ្មួញរកស៊ីខុសច្បាប់ ៕
ចែករំលែកព័តមាននេះ