ខេត្តកំពង់ស្ពឺ ៖ បុរសចំណាស់ជាព្រូរថយន្តបានកៀបជាប់ក្នុងកាប៊ីនរថយន្តស្លាប់ភ្លាមៗនៅកន្លែង កើតហេតុ និងម្នាក់ទៀតបានរងរបួសធ្ងន់ធ្ងរ ហើយត្រូវបានដឹកបញ្ជូនយកទៅសង្គ្រោះ ខណៈដែលរថយន្តធុនធំ០២គ្រឿងបុកគ្នាចំពីមុខយ៉ាងពេញទំហឹង។ ក្រោយបង្កហេតុតៃកុងរថយន្ត បង្កឃើញដូចនោះបានរត់គេចខ្លួនបាត់ស្រមោល កាលពីវេលាម៉ោង០៤ និង៤០នាទីទៀបភ្លឺថ្ងៃទី០៣ ខែធ្នូ ឆ្នាំ២០១៨។ នៅលើកំណាត់ផ្លូវជាតិលេខ៤ត្រង់ចន្លោះបង្គោលគីឡូម៉ែត្រលេខ៩១-៩២ ត្រង់ចំណុច ភូមិទី០៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ បើតាមនគរបាលស្រុកភ្នំស្រួច បានប្រាប់ឲ្យដឹងថា នៅមុនពេលកើតហេតុមានរថយន្តមួយគ្រឿងម៉ាកហ៊ីណូ ពណ៌ស ទ្រុងពណ៌ក្រហម ពាក់ស្លាកលេខ ភ្នំពេញ 3F-2193 អ្នកបើកបរមិនស្គាល់អត្តសញ្ញាណនោះឡើយ (ក្រោយបង្កហេតុរួចបានរត់គេចខ្លួនបាត់ស្រមោល)។
ដែលបើកបរតាមបណ្តោយផ្លូវជាតិលេខ៤ បើកបរក្នុងទិសដៅ ពីទិសកើតទៅទិសខាងលិចលុះពេលធ្វើដំណើរ មកដល់ចំណុចកើតហេតុខាងលើ ក៏បានបុកជាមួយរថយន្តមួយគ្រឿងទៀតម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3C-2193 បើកបរដោយឈ្មោះ វី សម្ភស្ស ភេទប្រុស អាយុ៣៩ឆ្នាំ មុខរបរបើកបររថយន្ត រស់នៅភូមិជាលា ឃុំជាលា ស្រុកបាធាយ ខេត្តកំពង់ចាម ដែលបើកបរក្នុងទិសដៅ បញ្ច្រាសទិសគ្នាបុកចំពីមុខយ៉ាងពេញ ទំហឹង បណ្តាលឲ្យអ្នកបើកបររងរបួសធ្ងន់ធ្ងរ និងអ្នកជិះជាមួយមាន ឈ្មោះ ផេង ភេទប្រុស អាយុ៥៥ឆ្នាំ រស់នៅភូមិតាពយ ឃុំសំបូរ ស្រុកបាធាយ ខេត្តកំពង់ចាមត្រូវជាព្រូរថយន្តបានកៀបជាប់ក្នុងកាប៊ីន ស្លាប់ភ្លាមៗនៅកន្លែងកើតហេតុតែម្តង។
ចំណែកអ្នកបើកបររថយន្តហ៊ីណូចុះរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ។ ក្រោយកើតហេតុនគរបាលជំនាញចរាចរស្រុកភ្នំស្រួច បានចុះទៅធ្វើការវាស់វែងហៅរថយន្តសាមុយដឹកអ្នករងគ្រោះយកទៅព្យាបាល រីឯសពយកទៅតម្កល់ទុក នៅវត្តត្រែងត្រយឹងរង់ចាំសាច់ញាតិមកទទួលយក ។ ចំពោះរថយន្តទាំងពីររងការខូចខាតធ្ងន់ធ្ងរ និងតូបលក់ដូររងការខូចខាតធ្ងន់ផងដែរ សំណាងម្ចាស់តូបមិនគ្រោះថ្នាក់។ បច្ចុប្បន្នរថយន្ត ទាំង០២គ្រឿង នគរបាលជំនាញអូសយកមករក្សាទុកនៅអធិការដ្ឋាននគរបាលស្រុកភ្នំស្រួច រង់ចាំម្ចាស់ចូលខ្លួនមកដោះស្រាយនៅពេលក្រោយ៕
ចែករំលែកព័តមាននេះ