ខេត្តកំពង់ឆ្នាំង ៖ ដើម្បីថែរក្សាកំណាត់ផ្លូវលេខ50c ចាប់ពីចំណុចភូមិកង្កែប ឃុំច្រណូក ស្រុកកំពង់លែងទៅកាន់ខេត្តកំពង់ធំ ឲ្យបានប្រើប្រាស់យូរអង្វែង ក្នុងពេលដែលទឹកទន្លេកំពុងតែស្រកផុតទៅថ្មីៗនេះ និងក៏ដូចជាដើម្បីការពារសុវត្ថិភាពដល់អ្នកធ្វើដំណើរផងនោះ អាជ្ញាធរស្រុកកំពង់លែងកាលពីថ្ងៃទី៣០ ខែវិច្ឆិកាកន្លងទៅនេះ បានសេចក្តីជូនដំណឹងមួយ អំពាវនាវដល់ប្រជាពលរដ្ឋអ្នកធ្វើដំណើរឆ្លងកាត់នៅលើកំណាត់ផ្លូវខាងលើ សូមផ្អាកធ្វើការធ្វើដំណើរជាបណ្ដោះអាសន្ន ព្រោះតែស្ថានភាពផ្លូវនៅជ្រាយនៅឡើយ។
យោងតាមសេចក្តីជូនដំណឹងរបស់រដ្ឋបាលស្រុកកំពង់លែងបានផ្អាកការធ្វើដំណើរជាបណ្តោះអាសន្ន ចំពោះយានយន្តគ្រប់ប្រភេទ ដែលធ្វើដំណើរលើកំណាត់ផ្លូវលេខ50 C ព្រោះបន្ទាប់ពីទឹកទន្លេបានស្រកចុះ កំណាត់ផ្លូវខាងលើកំពុងមានស្ថានភាពនៅជ្រាយ នៅឡើយ ហើយកន្លែងខ្លះ មានការខូចខាតដោយអន្លើលើផងដែរ ។ ដោយសារស្ថានភាពបែបនេះ រដ្ឋបាលស្រុកបរិបូរណ៍ សហការជាមួយមន្ត្រីជំនាញ និងសមត្ថកិច្ចពាក់ព័ន្ធ សូមផ្អាកការធ្វើដំណើរជាបណ្តោះអាសន្នលើកំណាត់ផ្លូវជាតិ50C ខាងលើចាប់ពីពេលនេះតទៅរហូតដល់អំឡុងពាក់កណ្តាលខែធ្នូ ទើបអាចធ្វើដំណើរបាន ។
ជុំវិញបញ្ហានេះលោក សំ ចាន់ថន អភិបាលស្រុកបរិបូរណ៍ បានមានប្រសាសន៍ប្រាប់តាមទូរស័ព្ទថា៖ ផ្លូវ ពីស្រុកកំពង់លែងទៅដល់ខេត្តកំពង់ធំ មានចំណុចខ្លះស្ថានភាពដីនៅជ្រាយនៅឡើយ បន្ទាប់ពីទឹកទន្លេបានស្រកចុះ ហើយបញ្ហាមួយទៀតគឺប៉ុន្មានថ្ងៃមុននេះ ក៏មានភ្លៀងធ្លាក់ខ្លាំងទៀតផង បណ្ដាលអោយដីនៅជ្រាយ មិនអាចធ្វើដំណើរបាន រហូតដល់មានរថយន្តជាប់ផុងជាច្រើនគ្រឿងផងដែរ ។ បើសិនជាក្នុងអំឡុងពាក់កណ្ដាលខែធ្នូ ខាងមុខនេះមិនមានភ្លៀងនោះទេ ដីនឹងស្ងួតទើបអាចធ្វើដំណើរបាន ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ