ខេត្តកំពង់ស្ពឺ ៖ បុរសម្នាក់បានរងរបួសជាទម្ងន់ និងត្រូវបានបញ្ជូនទៅសង្គ្រោះភ្លាមៗ បន្ទាប់ពីត្រូវដៃគូផឹកសុីជាមួយគ្នាកាប់ ព្រោះតែនិយាយដដែលៗថា ជនដៃដល់លួចស្រឡាញ់ប្រពន្ធគេ ។ ករណីហិង្សានេះ កើតឡើង កាលពីវេលាម៉ោងប្រមាណ៧និង៣០នាទីយប់ថ្ងៃទី១ ខែធ្នូ នៅភូមិព្រៃធំ ឃុុំរស្មីសាមគ្គី ស្រុកឱរ៉ាល់។
ជនដៃដល់ឈ្មោះ ឈាន ហៅយក្ស ភេទប្រុសអាយុ៣៨ឆ្នាំ ឯជនរងគ្រោះឈ្មោះ សែម រុី អាយុ៣៧ឆ្នាំ ទាំង២នាក់រស់នៅក្នុងភូមិ ឃុំខាងលើជាមួយគ្នា ។ ប្រភពពីសមត្ថកិច្ចបានស្រង់សម្តីសាក្សីឱ្យដឹងថា មុនពេលកើតហេតុ ជនរងគ្រោះនិងជនដៃដល់បានអង្គុយផឹកសុីជាមួយគ្នារហូតស្រវឹងរៀងៗខ្លួន ។
ពេលនោះក៏មានទំនាស់ពាក្យសម្តីគ្នាកើតឡើង ដោយជនរងគ្រោះនិយាយដដែលៗថា ជនដៃដល់លួចស្រលាញ់ប្រពន្ធគេ ហើយប្តីគេកំពុងប្រចណ្ឌ ។ ដោយសារនិយាយដដែលៗបែបនេះ ធ្វើឲ្យជនដៃដល់បានខឹងយ៉ាងខ្លាំង ក៏យកកាំបិតកាប់ជនរងគ្រោះតែម្តងរួចហើយរត់គេចខ្លួនបាត់ ។
ភ្លាមៗ សមត្ថកិច្ចបានតាមរុករកជនដៃដល់ពេញមួយយប់ តែមិនទាន់បានលទ្ធផលនៅឡើយ ព្រោះតំបន់នោះព្រៃច្រើន និងចម្ការអំពៅក៏ច្រើនដែរ ។ ជនរងគ្រោះត្រូវបានកាប់ចំក្បាលផ្នែកខាងឆ្វេង បណ្ដាលឱ្យរងរបួសធ្ងន់ហើយត្រូវបានសាច់ញាតិនាំយកទៅសង្គ្រោះភ្លាមៗតែម្តង ។
អធិការនគរបាលស្រុកឱរ៉ាល ់លោកវរសេនីយ៍ឯក ប៊ុត បុ៊នធឿន បានឱ្យដឹងនៅព្រឹកថ្ងៃទី២ ខែធ្នូថា បច្ចុប្បន្ននេះ ជនរងគ្រោះកំពុងសម្រាកព្យាបាលមន្ទីពេទ្យកាល់ម៉ែតឯរាជធានីភ្នំពេញ ៕
ចែករំលែកព័តមាននេះ