ជម្រុញការលើកកម្ពស់ជីវភាព និងថែទាំសុខភាពកងទ័ព
- ភ្នំពេញ
រាជធានីភ្នំពេញ ៖ លោក ហ៊ុន ម៉ាណែត ជម្រុញការលើកកម្ពស់ជីវភាព និងថែទាំសុខភាពកងទ័ពមេបញ្ជាការរងកងយោធពលខេមរភូមិន្ទឧត្តមសេនីយ៍ ហ៊ុន ម៉ាណែត មេបញ្ជាការកងទ័ព…
រាជធានីភ្នំពេញ ៖ លោក ហ៊ុន ម៉ាណែត ជម្រុញការលើកកម្ពស់ជីវភាព និងថែទាំសុខភាពកងទ័ពមេបញ្ជាការរងកងយោធពលខេមរភូមិន្ទឧត្តមសេនីយ៍ ហ៊ុន ម៉ាណែត មេបញ្ជាការកងទ័ព…
រាជធានីភ្នំពេញ ៖ លោក ហ៊ុន ម៉ាណែត ជម្រុញការលើកកម្ពស់ជីវភាព និងថែទាំសុខភាពកងទ័ពមេបញ្ជាការរងកងយោធពលខេមរភូមិន្ទឧត្តមសេនីយ៍ ហ៊ុន ម៉ាណែត មេបញ្ជាការកងទ័ព ជើងគោកបានថ្លែងដាស់តឿនដល់គ្រប់មេបញ្ជាការ មេបញ្ជាការរងទាំងអស់ត្រូវជម្រុញការលើកកម្ពស់ជីវភាពរស់នៅរបស់កងទ័ព និងខិតខំយកចិត្តទុកដាក់ឲ្យបានកាន់តែខ្លាំងក្លាក្នុងការថែទាំសុខភាពរបស់កងទ័ព ដើម្បីបង្កើនកម្លាំងចូលរួមពង្រឹងវិស័យការពារជាតិ ។
លោកហ៊ុន ម៉ាណែត បានថ្លែងដូច្នេះក្នុងឱកាសចូលរួមក្នុងពិធីបិទវគ្គហ្វឹកហ្វឺនលំហាត់បាញ់គ្រាប់ ពិតវរសេនាតូចថ្មើជើងសហការវាយលុកនៅទីលានបាញ់គ្រាប់ពិតមរតកតេជោសែនភ្នំវាលចាបយោធភូមិភាគទី៥ កាលពីពេលថ្មីៗនេះ ។
លោក ហ៊ុន ម៉ាណែត បានរម្លឹកថា ភ្នំវាលចាបកាលពីមុន គឺជាមូលដ្ឋានដើម្បីវាយប្រយុទ្ធគ្នា ប៉ុន្តែបច្ចុប្បន្ននេះ គឺជាមូលដ្ឋាន ដើម្បីពង្រឹងកងទ័ពក្នុងការការពារបូរណភាពទឹកដី ការពារ សុខសន្តិភាព ។ លោកថា តំបន់នេះមានការអភិវឌ្ឍច្រើនណាស់រួមមានហេដ្ឋារចនាសម្ព័ន្ធ ប្រព័ន្ធទឹកប្រព័ន្ធអគ្គិសនី និងអគារស្នាក់នៅរបស់កងទ័ព ហើយការអភិវឌ្ឍន៍នេះ គឺបង្ហាញអំពីការយកចិត្តទុកដាក់របស់ថ្នាក់ដឹកនាំយោធភូមិភាគ និងការចូលរួមពីផ្នែកដែលពាក់ព័ន្ធទាំងអស់ ជាពិសេសការគាំទ្ររបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាដែលលោកផ្ដល់អាទិភាពនៅក្នុងការកសាង ។
លោកបញ្ជាក់ថា មូលដ្ឋាននៃការហ្វឹកហ្វឺននេះ គឺសំខាន់ណាស់ ហើយប្រមុខរាជរដ្ឋាភិបាល បានយកចិត្តទុកដាក់ណាស់តាមរយៈការផ្គត់ផ្គង់ប្រាក់បំប៉នបន្ថែមផ្សេងៗ និងការបង្កលក្ខណៈ គ្រប់បែបយ៉ាង ដើម្បីឲ្យកងកម្លាំងរបស់យើងបំពេញភារកិច្ចជូនជាតិមាតុភូមិ ។ លោកក៏បានថ្លែងការកោតសរសើរចំពោះកងកម្លាំងនៅក្នុងយោធភូមិភាគទី៥ អង្គភាពកងរាជអាវុហត្ថ នគរបាលដែលបានខិតខំចូលរួមសហការការពារបូរណភាពទឹកដី ការពារសុខសន្តិភាពជូនប្រជាពលរដ្ឋ ជាពិសេសពង្រឹងស្មារតីមិនឲ្យចាញ់ឧបាយកលនៃការឃោសនាទាក់ទាញ កម្លាំងប្រដាប់អាវុធ ។
លោកថ្លែងបញ្ជាក់ថា គោលដៅសំខាន់របស់កងកម្លាំងប្រដាប់អាវុធ គឺថែរក្សាសុខសន្តិភាពការពារបូរណភាពទឹកដី ហើយប្រឆាំងដាច់ខាតចំពោះការជ្រៀតជ្រែកផ្ទៃក្នុងកម្ពុជាពីជនខាងក្រៅ និងមិនទុកឲ្យជនក្បត់ជាតិឃុបឃិតជាមួយបរទេសបំផ្លាញជាតិឡើយ ។ ទន្ទឹមនោះលោកអំពាវនាវដល់កងកម្លាំងប្រដាប់អាវុធទាំងអស់ទាំងកងទ័ពទាំងនគរបាលជាតិ និងកងរាជអាវុធហត្ថសូមបន្តជឿទុកចិត្ត និងត្រូវមានចិត្តស្មោះត្រង់ដាច់ខាតចំពោះជាតិចំពោះព្រះមហាក្សត្រ និងរាជរដ្ឋាភិបាលស្របច្បាប់ត្រូវពង្រឹងជំហរកុំចូលរួមនៅក្នុងសកម្មភាពខុសច្បាប់ឬបង្កអសន្តិសុខដល់ប្រទេសជាតិ ។
ដោយឡែកចំពោះយោធាចារ្យត្រូវយកចិត្តទុកដាក់ស្រាវជ្រាវសិក្សារៀនសូត្របន្ថែមទៀតដើម្បីបង្កើនសមត្ថភាពរបស់ខ្លួនឲ្យកាន់តែរីកចម្រើន និងបង្ហាត់បង្រៀនផ្ទេរចំណេះដឹងចំណេះធ្វើបទពិសោធន៍ដ៏ល្អដល់សិក្ខាកាម ។ ទន្ទឹមនោះក៏ត្រូវយកចិត្តទុកដាក់គោរពឲ្យបាននូវបទវិន័យនៃកងយោធពលខេមរៈភូមិន្ទខិតខំអត់ធ្មត់លត់ដំកសាងខ្លួន ដើម្បីអោយក្លាយជាកងទ័ពដែលមានសមត្ថភាព ពេញលេញក្នុងបុព្វហេតុការពារជាតិ និងប្រជាជន ៕
ចែករំលែកព័តមាននេះ