ខេត្តកណ្តាល ៖ ជនសង្សយ័ម្នាក់ជាមុខសញ្ញាលួច ធ្លាប់ជាប់ពន្ធនាគារម្តងរួចមកហើយ ពេលចេញមកវិញលួចទៀត ត្រូវនគរបាលស្រុកកៀនស្វាយឃាត់ខ្លួនចាប់វាយខ្នោះ ដែលហេតុការណ៍នេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី២ ខែធ្នូ ឆ្នាំ២០១៨ ចំណុចភូមិរទាំង ឃុំភូមិធំ ស្រុកកៀន
ស្វាយ ខេត្តកណ្តាល ។
ជនរងគ្រោះឈ្មោះ ប៉ុល វាសនា ភេទប្រុស អាយុ៥០ឆ្នាំ ជាមន្ត្រីរាជការ មានទីលំនៅ ភូមិ រទាំង ឃុំភូមិធំស្រុកកៀនស្វាយ ខេត្តកណ្តាល ។ ចំណែកជនសង្ស័យឈ្មោះ សាំង សំរេច ភេទប្រុស អាយុ១៩ឆ្នាំ មុខរបរមិនពិតប្រាកដ មានទីលំនៅភូមិរទាំងឃុំ ភូមិធំ ស្រុកកៀនស្វាយ ខេត្តកណ្តាល រីឯសម្ភារៈបាត់បង់មានទូរស័ព្ទម៉ាក oppo S3 ចំនួន២គ្រឿង (ពណ៌ទឹកប៊ិច១គ្រឿង និងពណ៌ក្រហម១គ្រឿង) ។
នគរបាលស្រុកកៀនស្វាយបានអោយដឹងថា នៅវេលាកើតហេតុខាងលើ ពេលជនរងគ្រោះកំពុងតែដេកនៅលើសាឡុងខាងក្រៅផ្ទះរបស់ខ្លួន ស្រាប់តែជនសង្ស័យបានធ្វើសកម្មភាពលួចទូរស័ព្ទរបស់ជនរងគ្រោះ ។
បន្ទាប់មក ជនរងគ្រោះបានឃើញជនសង្ស័យរត់ចេញពីក្នុងបន្ទប់ក្នុងផ្ទះរបស់ខ្លួន ហើយជនរងគ្រោះក៏បានរត់ដេញតាមចាប់ជនសង្ស័យដែរ ប៉ុន្តែដេញមិនទាន់នោះទេ គឺជនសង្ស័យបានរត់គេចខ្លួនបាត់ ។
បន្ទាប់ពីកើតហេតុ ជនរងគ្រោះបានមកប្តឹងនគរបាលប៉ុស្តិ៍ភូមិធំអោយជួយអន្តរាគមន៍ ក្រោយទទួលបានពាក្យភ្លាម នគរបាលប៉ុស្តិ៍ក៏បានចុះទៅដល់កន្លែងកើតហេតុស្រាវជ្រាវចាប់ខ្លួនជនសង្ស័យយកមកប៉ុស្តិ៍ដើម្បីសាកសួរ និងបញ្ជូនមកអធិការដ្ឋាននគរបាលស្រុកដើម្បីបន្តបន្តចាត់ការតាមនីតិវិធី ។
សូមបញ្ជាក់ថា ជនសង្ស័យឈ្មោះសាំង សំរេច ធ្លាប់ជាប់ពន្ធនាគារម្តងរួចមកហើយកាលពីថ្ងៃទី២៣ ធ្នូ ឆ្នាំ២០១៦ ពីបទលួច (គាស់ផ្ទះ) ប្រព្រឹត្តនៅភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល ដោយជាប់ពន្ធនាគាររយៈពេល៧ខែ ៕
ចែករំលែកព័តមាននេះ