រាជធានីភ្នំពេញ ៖ លោក សម រង្ស៊ី បានប្រកាសក្នុងសន្និសីទរបស់អតីតគណបក្សសង្គ្រោះជាតិ នៅសហរដ្ឋអាមេរិកលោក សម រង្ស៊ី បានព្រមធ្វើជាប្រធានស្តីទីគណបក្សសង្គ្រោះជាតិទោះបីជាក្រុមលោក…
រាជធានីភ្នំពេញ ៖ លោក សម រង្ស៊ី បានប្រកាសក្នុងសន្និសីទរបស់អតីតគណបក្សសង្គ្រោះជាតិ នៅសហរដ្ឋអាមេរិកលោក សម រង្ស៊ី បានព្រមធ្វើជាប្រធានស្តីទីគណបក្សសង្គ្រោះជាតិទោះបីជាក្រុមលោក កឹម សុខា ប្រកាសមិនទទួលស្គាល់យ៉ាងណាក្តី ។
ការប្រកាសនេះត្រូវអ្នកនាំពាក្យគណបក្សកាន់អំណាចលោក សុខ ឥសាន បានអះអាងថាលោក សម រង្ស៊ី មិនអាចស្តាអតីតគណបក្សប្រឆាំង ឬខ្មោចដែលងាប់ហើយឲ្យរស់ឡើងវិញ បានទេ ។ នៅក្នុងសន្និសីទរបស់អតីតគណបក្សសង្គ្រោះជាតិដែលរៀបចំនៅថ្ងៃទី ១-២ ខែវិច្ឆិកា ឆ្នាំ២០១៨ សហរដ្ឋអាមេរិកបានសម្រេចឲ្យលោកសម រង្ស៊ី ឡើងធ្វើជាប្រធានស្តីទីនៃអតីត គណបក្សនេះជាបណ្តោះអាសន្នដោយពួកគេយល់ថា លោក កឹម សុខា ដែលជាប្រធានកំពុងស្ថិតនៅក្រោមគំនាប ហើយពុំមានសិទ្ធិបរិបូរ ដើម្បីដឹកនាំគណបក្សនោះទេ ។
ក្នុងពិធីបិតសន្និសីទទ្រង់ទ្រាយធំដែលមានតំណាងជាង៤០០នាក់នៃអតីតគណបក្សសង្គ្រោះ ជាតិពីបណ្តាប្រទេសនានា លោកសម រង្ស៊ី បានប្រកាសយ៉ាងដូច្នេះថា «ខ្ញុំមានកិត្តិយស ទទួលយកតំណែងនេះ » ។ លោកសម រង្ស៊ី បានបញ្ជាក់ថា ការរៀបចំសន្និសីទនេះឡើង ហើយលោកព្រមទទួលយកតំណែងជាប្រធានស្តីទីនាពេលនេះ គឺដើម្បីរៀបចំក្បាលម៉ាស៊ីន គណបក្សឡើយវិញ ហើយបន្ទាប់មកទើបអាចរកផ្លូវដោះស្រាយវិបត្តិនយោបាយនៅកម្ពុជា ។
លោកសម រង្ស៊ី និងអ្នកគាំទ្រជឿថា យុទ្ធសាស្ត្រនេះនឹងអាចធ្វើឲ្យគណបក្សរបស់ពួកគេរស់ឡើយវិញ ហើយលោក កឹម សុខា នឹងទទួលបានសេរីភាពពេញ ។ ជាមួយគ្នានោះដែរ លោក សម រង្ស៊ី ប្រកាសថា លោកនឹងលាលែងពីតំណែងជាប្រធានស្តីទីនេះនៅពេលណាលោក កឹម សុខា ទទួលបានសេរីពិតប្រាកដ ហើយវិលមកកាន់តំណែងជាប្រធានឡើងវិញ ។ ម្យ៉ាងទៀត លោកអះអាងថា រចនាសម្ព័ន្ធរបស់គណបក្សសង្គ្រោះជាតិ គឺនៅរក្សាទុកដូចមុនដដែលដោយ មិនរុះរើអ្វីទាំងអស់ ។ លោក សម រង្ស៊ី បន្តថា ក្នុងដំណាក់កាលដែលគណសង្គ្រោះជាតិកំពុងស្ថិតក្នុងការគ្រប់គ្រងរបស់ លោក លោកស្នើឲ្យថ្នាក់ដឹកនាំ និងអ្នកគាំទ្រគណបក្សសង្គ្រោះជាតិទាំងអស់រួបរួមគ្នាជាធ្លុងមួយដោយចៀសវាងការប្រកាន់បក្សពួក ឬបែកចែកគ្នាជាក្រុម ។
លោកបញ្ជាក់ថា «ថ្នាក់ដឹកនាំ និងអ្នកគាំទ្រទាំងអស់ត្រូវប្រកាន់ភ្ជាប់នូវស្មារតី « សម រង្ស៊ី – កឹម សុខា ជាមនុស្សតែមួយ» ដែលជាពាក្យស្លោក និងជានិមិត្តរូបនៃការរួបរួមរបស់គណបក្ស »។ ទោះបីជាលោក កឹម សុខា តាមរយៈមេធាវីប្រកាសមិនទទួលស្គាល់ចំពោះការធ្វើសន្និសីទ នៅសហរដ្ឋអាមេរិកយ៉ាងណាក្តីលោក សម រង្ស៊ី សង្កត់ធ្ងន់យ៉ាងដូច្នេះថា « អ្នកណាទាំងទ្រ កឹម សុខា គឺគាំទ្រសម រង្ស៊ី ហើយអ្នកណាគាំទ្រ សម រង្ស៊ី គឺគាំទ្រកឹម សុខា ។
អ្នកណា វាយប្រហារ កឹម សុខា គឺវាយប្រហារ សម រង្ស៊ី ហើយអ្នកណា វាយប្រហារសម រង្ស៊ី គឺវាយប្រហារ កឹម សុខា» ។ លោក សម រង្ស៊ី មិនភ្លេចនោះទេពីការបកស្រាយនូវមូលហេតុដែលលោកត្រូវសម្រេចចិត្តទទួលយកតំណែងជាប្រធានស្តីទីគណបក្សសង្គ្រោះជាតិ ។ នៅ ចំពោះមុខអ្នកគាំទ្រលោក សម រង្ស៊ី ពន្យល់ថា ការទទួលតំណែងនេះ គឺជាកាលៈទេសៈ ចាំបាច់ដែលត្រូវបង្ខំឲ្យទទួលយក ។ បន្ទាប់មកលោកក៏រម្លឹកដល់កាលដែលលោកលាលែង ពីតំណែងជាប្រធានគណបក្សសង្គ្រោះជាតិ ។
លោក សម រង្ស៊ី លើកឡើងថា កាលនោះដោយសារតែកាលៈទេសៈបង្ខំដូចគ្នាទើបលោក សុខចិត្តលាលែងពីតំណែងគណបក្សសង្គ្រោះជាតិ ។ លោកបកស្រាយយ៉ាងដូច្នេះថា «តួនាទីមិនសំខាន់ទេ ខ្ញុំមិនដែលឲ្យតម្លៃតួនាទីឡើយ ។ ខ្ញុំមិនស្រឡាញ់តំណែងទេ ។ បើខ្ញុំ ស្រឡាញ់តំណែងខ្ញុំលាលែងធ្វើ អី … ។ ខ្ញុំមកកាន់តំណែងមិនមែនដោយចិត្តឯងចង់ទេ តែមកពីតម្រូវការបង្ខំ ។ លាលែងក៏ជាតម្រូវការវិលមកវិញក៏ជាតម្រូវការ » ។ ជាមួយគ្នានោះដែរលោកសម រង្ស៊ីបានអះអាងថា ការរៀបចំសន្និសីទ និងការជ្រើសរើសលោកឲ្យធ្វើជាប្រធានស្តីទីថា ជាការរៀបក្បាលម៉ាស៊ីនគណបក្ស និងថ្នាក់ដឹកនាំ ដើម្បីចាប់ផ្តើមដំណើរការឡើងវិញ ។
លោកបានលើកឡើងយ៉ាងដូច្នេះថា «យើងនឹងប្រមូលឥស្សរជនទាំងអស់អ្នកគាំទ្រទាំងអស់ឲ្យមកចាប់ដៃគ្នាក្រោមផ្លាកគណបក្សសង្គ្រោះជាតិ ។ ទាល់តែយើងពង្រឹងក្បាលម៉ាស៊ីនគណបក្សទើបអាចធ្វើសេចក្តីសម្រេចក្នុងនាមគណបក្សទាំងមូលបាន ។ គំនុំកូនកុំ អត់ចិត្តកុំប៉ះទង្គិចគ្នាឯងឲ្យសោះ» ។ ទាក់ទិននឹងការយល់ព្រមធ្វើជាប្រធានទីស្តីរបស់លោក សម រង្ស៊ីដើម្បីដឹកនាំអតីតគណបក្សសង្គ្រោះជាតិឡើងវិញនេះ ត្រូវបានអ្នកនាំពាក្យគណបក្សប្រជាជនកម្ពុជាលើកឡើងថា មិនស្តា ឬហៅខ្មោចដែលងាប់ហើយរស់នៅវិញបានទេ ។ លោកបញ្ជាក់ថា «ដូច្នេះឧបាយកលប៉ុនប៉ងចង់ធ្វើឲ្យខ្មោចអតីតបក្សប្រឆាំងនេះរស់ឡើងវិញ គឺមិនអាចទៅរួចទាល់តែសោះ ។ ហើយឱបាយកលចង់ប្រោះព្រំយកទណ្ឌិត សម រង្សី មកដឹកនាំអតីតគណបក្សនេះក៏អត់បានការដែរ ។
ហេតុនេះទោះប្រើមធ្យោបាយណា និងឧបាយកលណាក៏មិនអាចប្រោះព្រំធ្វើឲ្យអតីតបក្សប្រឆាំងនេះអាចរស់ឡើងវិញ ហើយចង់យកមនុស្សមិនមែននៅក្នុងបក្សមកដឹកនាំបក្សក៏កាន់តែមិនអាចទៅរួចជាដាច់ខាតដែរ» ។ តាមរយៈមេធាវីលោក កឹម សុខា បានប្រកាសមិនទទួលស្គាល់ចំពោះសន្និសីទរបស់គណបក្សសង្គ្រោះជាតិនៅសហរដ្ឋអាមេរិកនោះទេ ។ នេះបើថ្លែងការណ៍របស់ក្រុមមេធាវី លោក កឹម សុខា ។ ថ្លែងការណ៍លើកឡើងថា ចំពោះមុខមេធាវី លោក កឹម សុខា នៅតែរក្សាជំហរដដែល គឺគាត់មិនទទួលស្គាល់ដឹងឮ និងមិនគាំទ្រ នូវការៀបចំ និងការសម្រេចណាមួយនៃសន្និសីទថ្ងៃទី១ -២ ខែធ្នូ ឆ្នាំ២០១៨ នៅទីក្រុងអាតាឡង់តាសហរដ្ឋអាមេរិករបស់ក្រុមអ្នកគាំទ្រ លោក សម រង្ស៊ី ប្រធានចលនសង្គ្រោះជាតិនោទេ ។ ថ្លែងការណ៍បញ្ជាក់ថា « ការបញ្ចេញទស្សនៈរបស់លោក កឹម សុខា មិនស្ថិតនៅក្រោមការបង្ខិតបង្ខំរបស់បុគ្គណាឡើយ ។
យើងខ្ញុំជាសមហមេធាវី សូមបញ្ជាក់ថា ទោះជាលោក កឹម សុខា ស្ថិតក្រោមការត្រួតពិនិត្យតាមផ្លូវតុលាការក៏ដោយ លោកកឹម សុខា នៅតែមាន សិទ្ធិក្នុង ការតវ៉ាការពារទាមទារ និងបដិសេធនូវអ្វីដែលប៉ះពាល់ដល់សិទ្ធិស្របច្បាប់របស់គាត់ ។ លោក កឹម សុខា មានសិទ្ធិបញ្ចេញមតិដោយផ្ទាល់ ឬតាមរយៈមេធាវី ស្របតាមបញ្ញត្តិច្បាប់»៕
ចែករំលែកព័តមាននេះ