ខេត្តកំពង់ស្ពឺ ៖ បុរសម្នាក់ បានវាយអតីតប្រពន្ធរបស់ខ្លួនយ៉ាងចាស់ដៃ បន្ទាប់ពីជួបគ្នានៅសាលាឃុំរឿងចែកកូន តែមិនដាច់ស្រេច ។ ក្រោយបង្កហេតុ ជនដៃដល់ជាអតីតប្តី ត្រូវបានសមត្ថកិច្ចឃាត់ខ្លួនភ្លាមៗផងដែរ ដើម្បីចាត់ការតាមផ្លូវច្បាប់ ។ អំពើហិង្សានេះ កើតឡើងកាលពីរសៀលថ្ងៃទី៣០ ខែវិច្ឆិកាកន្លងទៅ នៅសាលាឃុំវល្លិស ស្រុកសំរោងទង ។
អតីតប្ដីឈ្មោះ ស៊ុំ វណ្ណថា អាយុ៣៨ឆ្នាំ រស់នៅភូមិចំបក់ ឃុំវល្លិស ចំណែកអតីតប្រពន្ធឈ្មោះ ភឿង ភ័ស្ត អាយុ៣៤ឆ្នាំ នៅក្នុងភូមិជាមួយគ្នា បានរងរបួសបែកក្បាល ។ ប្រភពពីអតីតប្រពន្ធឲ្យដឹងថា រវាងរូបគាត់និងអតីតប្តី បានចែកផ្លូវគ្នាជាច្រើនខែមកហើយ តែមិនទាន់ចែកកូនឲ្យទៅរស់នៅខាងណានៅឡើយទេ។
មុនពេលកើតហេតុ រូបគាត់និងអតីតប្តី បាននាំគ្នាទៅសាលាឃុំ ដើម្បីសុំឲ្យលោកមេឃុំជួយកាត់ក្តីរឿងកូនតើត្រូវបានទៅខាងណា ហើយលោកមេឃុំមិនទាន់និយាយអ្វីផង ស្រាប់តែអតីតប្តីស្រែកទាមទារយកកូនពីគាត់ ។ នៅពេលដែលគាត់តវ៉ា ស្រាប់តែអតីតប្តីរូបនេះស្ទុះមកវាយគាត់ បណ្តាលឲ្យបែកក្បាលហូរឈាមនៅចំពោះមុខអាជ្ញាធរតែម្តង ។
បន្ទាប់ពីឃាត់ខ្លួនសាកសួរ ជនដៃដល់ជាអតីតប្តីសារភាពថា ខ្លួនពិតជាបានវាយអតីតប្រពន្ធប្រាកដ
មែន ហើយនៅរសៀលថ្ងៃដដែល សមត្ថកិច្ចបានកសាងសំណុំរឿងបញ្ជូនជននេះទៅការិយាល័យនគរ
បាលព្រហ្មទណ្ឌ ដើម្បីចាត់ការតាមនីតិវិធី ៕
ចែករំលែកព័តមាននេះ