ខេត្តសៀមរាប ៖ រថយន្តដឹកគ្រួសម៉ាក Hi No មួយគ្រឿងបានបើកបរមកដល់ភ្លើងស៊ុប ចុងកៅស៊ូប្រាំងមិនស៊ីទៅបុករះម៉ូតូចំនួន២គ្រឿង បណ្តាលឱ្យខាងម៉ូតូម៉ាកវ៉េវ (Wave) ឌុបគ្នា២នាក់បងប្អូន បណ្តាលឱ្យស្លាប់ប្អូន (ជាអ្នកបើក) និងអ្នករួមដំណើរបងប្រុសរបួសធ្ងន់ ។
ចំណែកម៉ូតូសង់ម្ខាងទៀតពុំមានរបួសទេ គ្រាន់តែខូចខាតម៉ូតូទាំងស្រុង ខណៈពេលនោះត្រូវបានប្រជាពលរដ្ឋនាំគ្នាស្ទាក់ចាប់បានអ្នកបើកបរប្រគល់ឱ្យសមត្ថកិច្ចយកមកសួរនាំនៅការិយា ល័យនគរបាលចរាចរណ៍ផ្លូវគោកនៃស្នងការនគរបាលខេត្ត ដើម្បីចាត់ការទៅតាមផ្លូវច្បាប់ ។ ហេតុការគ្រោះថ្នាក់ចរាចរណ៍នោះបានកើតឡើងនៅវេលាម៉ោង១១និង៣០នាទីថ្ងៃត្រង់ ថ្ងៃទី៣០ ខែវិច្ឆិកា ឆ្នាំ២០១៨ ស្ថិតនៅចំណុចលើដងផ្លូវជាតិលេខ៦ ត្រង់ភ្លើងស៊ុបចុងកៅស៊ូ ភូមិចុងកៅស៊ូ សង្កាត់ស្លក្រាម ក្រុងសៀមរាប ។
តាមប្រភពពីមន្ត្រីប៉ូលិសចរាចរណ៍ជើងគោកនៃស្នងការនគរបាលខេត្តបានប្រាប់ថា មុនពេលកើតហេតុមានពលរដ្ឋរាយការណ៍មកសមត្ថកិច្ចនគរបាលចរាចរណ៍ជើងគោកថា មានករណីគ្រោះថ្នាក់ចរាចរណ៍រវាងរថយន្តដឹកគ្រួសបុកជាមួយម៉ូតូ២គ្រឿង បណ្តាលឱ្យស្លាប់ម្នាក់របួសធ្ងន់ម្នាក់ ចំណែកម៉ូតូម្ខាងទៀតពុំមានរបួសឡើយ ខណៈពេលនោះកម្លាំងជំនាញរបស់ការិយាល័យនគរបាលចរាចរណ៍ជើងគោកក៏បានចុះទៅដល់កន្លែងកើតហេតុមិនបានឃើញជនរងគ្រោះ និងសាកសពជនរងគ្រោះនោះទេ ឃើញតែអ្នកបើកបររថយន្តដឹកគ្រួសក៏ធ្វើការឃាត់ខ្លួនភ្លាមៗ និងធ្វើការវាស់វែង ដើម្បីយករថយន្ត និងម៉ូតូចេញកុំឱ្យមានការកកស្ទះចរាចរណ៍ ព្រោះជាកន្លែងភ្លើងស៊ុប ។
ប្រភពបានបញ្ជាក់ទៀតថា បន្ទាប់ពីធ្វើការវាស់វែងរួចមកកម្លាំងជំនាញបានចុះទៅដល់មន្ទីរពេទ្យ ស្រាប់តែត្រូវបានឪពុកម្តាយបានប្រាប់ថា កូនប្រុសរបស់គាត់ស្លាប់ម្នាក់ (ជាប្អូនអ្នកឌុប) និងបងរបស់ធ្ងន់ (អ្នករួមដំណើរ) ។ ប្រភពបានបញ្ជាក់ទៀតថា ជនរងគ្រោះ២នាក់បងប្អូនមាន៖ ឈ្មោះ យុន សុវណ្ណរដ្ឋ ភេទប្រុស អាយុ១៨ឆ្នាំ មុខរបរសិស្ស (ស្លាប់) ជាអ្នកបើកបរម៉ូតូម៉ាក វ៉េវ (Wave) ពណ៌ខ្មៅ គ្មានស្លាកលេខ បើកបរមកពីលិចទៅកើតស្របទិសគ្នាជាមួយរថយន្ត បានឌុបបងប្រុសឈ្មោះ យុន សុវណ្ណរាជ ភេទប្រុស អាយុ១៩ឆ្នាំ មុខរបរសិស្ស (របួសធ្ងន់)។ អ្នកទាំង២នាក់បងប្អូនបង្កើតមានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ។
ចំណែកម្ចាស់ម៉ូតូម្ខាងទៀតឈ្មោះ ចាន់ ទីន ភេទប្រុស អាយុ៥០ឆ្នាំ មានទីលំនៅភូមិខា្នរ សង្កាត់ជ្រាវ ក្រុងសៀមរាប បានជិះម៉ូតូម៉ាកសង់សេ១២៥ ពណ៌ខ្មៅ ពាក់ស្លាកលេខ សៀមរាប ១.J.៦១៣៦ គ្មានរបួសគ្រាន់តែខូចខាតម៉ូតូប៉ុណ្ណោះ ។ រីឯជនបង្កខាងរថយន្តដឹកគ្រួសមានឈ្មោះ មួន ញ៉ុល ភេទប្រុស អាយុ២៥ឆ្នាំ មុខរបរបើកឡានដឹកគ្រួស មានទីលំនៅភូមិចុងកៅស៊ូ សង្កាត់ស្លក្រាម ក្រុងសៀមរាប បើកបររថយន្តម៉ាក Hi No ពណ៌ស ពាក់ស្លាក លេខ ក្រចេះ ៣A-០២៥៤ បើកបរមកពីលិចទៅកើតស្របទិសគ្នា ។ មូលហេតុបង្កឡើងដោយរថយន្តដឹកគ្រួស បើកបរស្របទិសគ្នាពីលិចទៅកើតដល់ភ្លើងស៊ុបជាន់ប្រាំងមិនស៊ីក៏ជ្រុលទៅបុកម៉ូតូចំនួន២គ្រឿងដែលនៅពីមុខ បណ្តាលឱ្យស្លាប់ម្នាក់ និងរបួសធ្ងន់ម្នាក់ ព្រមទាំងជាន់ម៉ូតូទាំង២បណ្តាលឱ្យខូចខាតទាំងស្រុង ។
បច្ចុប្បន្នរថយន្តបង្ក និងអ្នកបើកបរព្រមទាំងម៉ូតូជនរងគ្រោះទាំង២គ្រឿងត្រូវបានសមត្ថកិច្ចនាំខ្លួន និងអូសយកទៅរក្សាទុកនៅការិយាល័យនគរបាលចរាចរណ៍ជើងគោកនៃស្នងការនគរបាលខេត្តសៀមរាប ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ