រាជធានីភ្នំពេញ ៖ ជនសង្ស័យម្នាក់បានឆបោកយកម៉ូតូពីមិត្តភក្តិបានជាង១ខែ ពេលម្ចាស់ម្ចាស់ម៉ូតូរកឃើញ ក៏ប្រើនារីម្នាក់ធ្វើជាធ្នាក់ណាត់ជួប ក្រោយមកនាំគ្នាវាយជនសង្ស័យប៉ោងភ្នែកម្ខាង រួចប្តឹងសមត្ថកិច្ច បង្កឲ្យមានការភ្ញាក់ផ្អើលកាលពីម៉ោង៤ល្ងាច ថ្ងៃទី២ ខែធ្នូ ឆ្នាំ២០១៨ ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ ។
ជនសង្ស័យខាងលើមានឈ្មោះ សួន ឃីម ភេទប្រុស អាយុ១៨ឆ្នាំ មុខរបរបើករថយន្ត ស្នាក់នៅម្តុំផ្លូវ ប្រឡោក បែក មានស្រុកកំណើតនៅភូមិតាំងគោក ឃុំ ផ្សែងភ្លើង ស្រុកបារាយណ៍ខេត្តកំពង់ធំ ។ ចំណែកជនរងគ្រោះឈ្មោះ ប្រាក់ សុវ័ន ភេទប្រុស អាយុ១៧ឆ្នាំ មុខរបរជាងសាឡុង ស្នាក់នៅភូមិថ្មគោល៣ សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិផ្លូវទូក ឃុំប្រលាយមាស ស្រុកកំពង់លែង ខេត្តកំពង់ឆ្នាំង ។ រីឯម៉ូតូដែលជនសង្ស័យឆបោកម៉ាកស៊ុយសូគីនិច ពណ៌ត្រួយចេក ស៊េរីឆ្នាំ២០១៤ ពាក់ស្លាកលេខ ភ្នំពេញ 1 DH-3326។
តាមប្រភពពីជនរងគ្រោះបាននិយាយថា នៅមុនពេលកើតហេតុ ដោយជនសង្ស័យ និងជនរងគ្រោះជាមិត្តភក្តិនឹងគ្នា ទើបនឹងស្គាល់គ្នាបានពីរបីថ្ងៃ ហើយក៏បាននាំគ្នាដើរលេងទៅម្តុំកំបូល ដោយជិះម៉ូតូចេញពីបន្ទប់ជួលជនរងគ្រោះនៅម្តុំត្រពាំងថ្លឹង សង្កាត់ចោមចៅទី១ ជិះតាមបណ្ដោយផ្លូវជាតិលេខ៤ លុះជិះម៉ូតូមកដល់ស្តុបទំនុបកប់ស្រូវ នៅពេលនោះជនរងគ្រោះនឹង ជនសង្ស័យត្រូវសមត្ថកិច្ចចរាចរណ៍នៅគោលដៅចាប់ផាកពិន័យ ដោយម៉ូតូរបស់គាត់មិនមានកញ្ចក់ និងពួកគាត់មិនពាក់មួកសុវត្ថិភាព ។
ប្រភពខាងលើបន្តថា នៅពេលនោះពួកគាត់មិនមានលុយទាំង២នាក់ ចំណែកជនសង្ស័យក៏បានឱ្យជនរងគ្រោះចាំនៅកន្លែងសមត្ថកិច្ច ហើយជនសង្ស័យខាងលើជិះម៉ូតូរបស់ជនរងគ្រោះទៅយកលុយមេរបស់ខ្លួននៅម្តុំកំបូល ដើម្បីយកលុយឱ្យសមត្ថកិច្ច ។
ប្រភពបានបន្តទៀតថា ខណៈពេលជនរងគ្រោះជាម្ចាស់ម៉ូតូចាំមិត្តភក្តិទៅយកលុយដើម្បីឱ្យសមត្ថកិច្ចបង់ថ្លៃផាកពិន័យ ហើយជនរងគ្រោះចាំរយៈពេលជាង1ម៉ោងពុំឃើញជនសង្ស័យយកម៉ូតូ និងលុយឲ្យសមត្ថកិច្ចទេ ។ នៅពេលនោះរូបគាត់នឹកឃើញថា ជនសង្ស័យខាងលើ ឆបោកម៉ូតូគាត់យកទៅបាត់ហើយ ព្រោះមិនឃើញមកសោះ ចំណែកជនរងគ្រោះបានប្រាប់ សមត្ថកិច្ចចរាចរណ៍តាមដំណើររឿង រួចទៅប្តឹងសមត្ថកិច្ចនគរបាលប៉ុស្តិ៍ចោមចៅភ្លាមៗផងដែរ។
ប្រភពជនរងគ្រោះបន្តទៀតថា លុះដល់ថ្ងៃកើតហេតុទើបស្គាល់លេខទូរស័ព្ទរបស់ជនសង្ស័យ នៅពេលនោះដែរ បានឱ្យនារីម្នាក់ជាធ្នាក់ដើម្បីទូរស័ព្ទណាត់ជួបជាមួយជនសង្ស័យ និងមានបក្សពួកចំនួនមួយក្រុមស្ទាក់ចាប់ជនសង្ស័យឃាត់ខ្លួនបានភ្លាមៗ ។ មិត្តភ័ក្តិជនរងគ្រោះបាននាំគ្នាវាយបណ្តាលឱ្យប៉ោងមុខម្ខាង ហើយប្តឹងសមត្ថកិច្ច ឃាត់ភ្លាមៗ។
ក្រោយពេលកើតហេតុ ជនសង្ស័យឆបោកម៉ូតូខាងលើ បានប្រាប់សមត្ថកិច្ចថា ម៉ូតូដែលបោកពីមិត្តភក្តិរបស់ខ្លូននោះ គឺគាត់យកទៅបញ្ចាំបាត់ហើយ បន្ទាប់មកសមត្ថកិច្ចបានកសាងសំណុំរឿងបញ្ជូនទៅជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធី ៕
ចែករំលែកព័តមាននេះ