ធ្លាប់សន្លប់ត្រឹមទឹកទី២ ឥឡូវនេះដណ្ដើមបានខ្សែក្រវាត់ជើងឯកអន្តរជាតិ
- ភ្នំពេញ
រាជធានីភ្នំពេញ ៖ គ្មានអ្នកណានឹកស្មាននោះទេថា កីឡាករកម្ពុជា មាជ សុខរ៉ា ធ្លាប់បានសន្លប់ក្រោមដៃកីឡាករថៃ Pep Sy ម្ដងហើយ…
រាជធានីភ្នំពេញ ៖ គ្មានអ្នកណានឹកស្មាននោះទេថា កីឡាករកម្ពុជា មាជ សុខរ៉ា ធ្លាប់បានសន្លប់ក្រោមដៃកីឡាករថៃ Pep Sy ម្ដងហើយ ក្នុងពេលកីឡាករទាំងពីរប៉ះគ្នាក្នុងជំនួបសន្សំពិន្ទុ នៅក្នុងព្រឹត្តិការណ៍ជ្រើសរើសជើងឯក និងម្ចាស់ខ្សែក្រវាត់អន្តរជាតិរបស់ទូរទស្សន៍អាស៊ីអាគ្នេយ៍ ក្នុងពេលអ្នកទាំងពីរប្រកួតគ្នាដណ្ដើមពិន្ទុយកចំណាត់ថ្នាក់ខ្ពស់ប្រចាំពូល។
អ៊ីចឹងហើយទើបម្នាក់ៗមានការកោតសរសើរយ៉ាងខ្លាំង ក្នុងពេលដែលកីឡាករកម្ពុជារូបនេះ ស្រាប់តែអាចសងសឹកគូប្រកួតបានសម្រេចក្នុងវគ្គផ្ដាច់ព្រ័ត្រ ហើយដណ្ដើមបានខ្សែក្រវាត់ជើងឯកតាមការចង់បាន ដែលនេះគឺជាលទ្ធផលដ៏មោទនភាពសម្រាប់ការប្រកួតដែលបានធ្វើឡើងកាលពីល្ងាចថ្ងៃ២ ធ្នូ។
លោក ញាណ សុធី អ្នករៀបចំការប្រកួតបានថ្លែងបញ្ជាក់ថា ការប្រកួតជើងឯក គឺជាលើកទី១ប៉ុណ្ណោះសម្រាប់ទូរទស្សន៍អាស៊ីអាគ្នេយ៍ ប៉ុន្តែសម្រាប់ការប្រកួតគឺមានលក្ខណៈជាអន្តរជាតិដូចគ្នា នឹងការប្រកួតរបស់ទូរទស្សន៍អាស៊ីអាគ្នេយ៍ ដែលធ្លាប់បានធ្វើនាពេលកន្លងមកដែរ ដោយការប្រកួតនេះក្នុងពេលបើកប្រកួត គឺមានកីឡាករកម្ពុជា៤រូប និងកីឡាករបរទេស៤រូប ប្រកួតគ្នាចុះឡើងតាមរូបមន្តកីឡាករកម្ពុជាប្រកួតជាមួយបរទេសសុទ្ធសាធ ហើយស្វែងរកអ្នកមានពិន្ទុខ្ពស់ប្រចាំពូលកម្ពុជា និងប្រចាំពូលថៃ មួយរូបៗអោយឡើងប៉ះគ្នាដណ្ដើមយកជើងឯក។
លោកថា កីឡាករ មាជ សុខរ៉ា និងកីឡាករថៃ Pep Sy គឺជាអ្នកលេខ១ប្រចាំពូលម្ខាងៗ ដោយលោកបង្ហាញការកោតសរសើរយ៉ាងខ្លាំង ចំពោះលទ្ធផលរបស់គូប្រកួតមួយគូនេះជាពិសេសនៅពេលដែលអ្នកទាំងពីរបើកឆាកវាយគ្នាទៅវិញទៅមកដោយមិនសំចៃដៃ។
លោកថា កីឡាករកម្ពុជាក្នុងវគ្គសន្សំពូល ត្រូវសន្លប់ក្រោមដៃកីឡាករថៃ ប៉ុន្តែនៅពេលជំនួបម្ដងទៀតក្នុងវគ្គផ្ដាច់ព្រ័ត្របានក្លាយជាអ្នកដណ្ដើមបានខ្សែក្រវាត់ ដែលលោកបានហៅលទ្ធផលនេះថា គឺជាជោគជ័យខ្លាំង។
កីឡាករ មាជ សុខរ៉ា ទទួលបានខ្សែក្រវាត់អន្តរជាតិមួយ ពានកិត្តិយសមួយ និងទឹកប្រាក់២០លានរៀលស្មើនឹង៥ពាន់ដុល្លារ ដោយប្រាក់រង្វាន់របស់លោកមិនទាន់រាប់បញ្ចូលប្រាក់លើកទឹកចិត្ត និងប្រាក់រង្វាន់តម្លៃខ្លួននៅឡើយផង ខណៈដែលកីឡាករថៃ ទទួលបានពានកិត្តិយសមួយ និងទឹកប្រាក់៣ពាន់ដុល្លារ៕
ចែករំលែកព័តមាននេះ