ខេត្តបន្ទាយមានជ័យ ៖ បងថ្លៃ និងប្អូនថ្លៃបានទំនាស់ហិង្សាដោយពាក្យសម្ដីឈានដល់ការវាយតប់គ្នា បណ្តាលឲ្យរងរបួសទាំង២នាក់ ហើយបញ្ជូនទៅព្យាបាលនៅមន្ទីរពេទ្យ។ ហេតុការណ៍នៃអំពើហិង្សានេះ បានកើតឡើងនៅ ថ្ងៃទី០១ ខែធ្នូ…
ខេត្តបន្ទាយមានជ័យ ៖ បងថ្លៃ និងប្អូនថ្លៃបានទំនាស់ហិង្សាដោយពាក្យសម្ដីឈានដល់ការវាយតប់គ្នា បណ្តាលឲ្យរងរបួសទាំង២នាក់ ហើយបញ្ជូនទៅព្យាបាលនៅមន្ទីរពេទ្យ។ ហេតុការណ៍នៃអំពើហិង្សានេះ បានកើតឡើងនៅ ថ្ងៃទី០១ ខែធ្នូ ឆ្នាំ២០១៨ វេលាម៉ោង៩ និង០៥នាទីយប់ នៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។ ប្រភពព័ត៌មានពីនគរបាលមូលដ្ឋានបានឲ្យដឹងថា៖ ជនរងគ្រោះទាំង២នាក់ ម្នាក់ឈ្មោះ ចាន់ បញ្ញា ភេទប្រុស អាយុ២៨ឆ្នាំ ជាបងថ្លៃ និងម្នាក់ទៀតឈ្មោះ លី សាលាភ ភេទប្រុស អាយុ៣០ឆ្នាំ ជាប្អូនថ្លៃ ទាំង២នាក់នៅផ្ទះជាមួយគ្នានៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។
ប្រភពដដែល បានបញ្ជាក់ថា៖ តាមសម្ដីរៀបរាប់របស់ឈ្មោះ ចាន់ សុជាតា ត្រូវជាប្រពន្ធរបស់ឈ្មោះ លី សាលាភ បាននិយាយថា នៅមុនថ្ងៃកើតហេតុ នៅយប់ថ្ងៃទី៣០ ខែវិច្ឆិកា ឆ្នាំ២០១៨ ឈ្មោះ បញ្ញា ត្រូវជាបងរបស់ខ្លួន បានមកពីដើរលេងបានទាញទ្វារចូលដេកប៉ុន្តែរបូតគន្លឹះទ្វារចូលមិនកើតក៏បានវាយស័ង្កសីចូល ប៉ុន្តែគ្មានបញ្ហាអីទេ។ លុះដល់យប់ថ្ងៃទី០១ ខែធ្នូ ឆ្នាំ២០១៨ ឈ្មោះ បញ្ញា ត្រូវជាបងបង្កើតនេះ ពេលមកពីដើរលេងបានយកម៉ែត្រឈើដែលមានប្រវែងប្រមាណជា១ម៉ែត្រជាង វាយស័ង្កសីទៀត បណ្តាលឲ្យខូចខាត។
ដោយអត់ទ្រាំមិនបានប្តីរបស់ខ្លួនឈ្មោះ លី សាលាភ បានចេញពីបន្ទប់ដេក ហើយកាន់ដំបងឈើទំហំប៉ុនកដៃ ប្រវែងប្រមាណជា១ម៉ែត្របាននិយាយថា៖ អានេះថាមិនស្តាប់អញវាយវាម្ដងមើល ក្រោយពីនិយាយរួចក៏ស្ទុះទៅវាយបងរបស់ខ្លួន ឈ្មោះ បញ្ញា បែកក្បាលចំនួន២កន្លែងលើក្បាលខាងស្ដាំដេរចំនួន៧ថ្នេរ និងលើក្បាលខាងឆ្វេងចំនួន៥ថ្នេរបញ្ជូនទៅព្យាបាលនៅមន្ទីរពេទ្យបង្អែកស្រុកស្វាយចេក។ ហើយប្តីរបស់ខ្លួនបែកលើក្បាលខាងស្ដាំ និងដាច់សរសៃដៃខាងឆ្វេង បានបញ្ជូនទៅព្យាបាលនៅពេទ្យបង្អែកកម្ពុជា-ជប៉ុន នៅមង្គលបូរី។
ម្យ៉ាងឈ្មោះ បញ្ញានេះ មានសតិមិនសូវល្អ ដោយសារពីមុនគាត់ធ្លាប់ប្រើប្រាស់ថ្នាំញៀននៅស្រុកថៃ ហើយពេលត្រឡប់មកស្រុកវិញដើរតែផឹកមិនធ្វើការងារទេ។ លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានបញ្ជាក់ថា៖ ដោយសារករណីនេះ ជាអំពើហិង្សាដោយសហព័ទ្ធ រវាងបងថ្លៃ និងប្អូនថ្លៃ និងពុំមានការប្ដឹងផ្តល់គ្នា សមត្ថកិច្ចពុំមានការចាប់ឃាត់ខ្លួនអ្នកណានោះឡើយ៕
ចែករំលែកព័តមាននេះ