រាជធានីភ្នំពេញ៖ មហាជនសុទ្ធតែដឹងពីជីវិតសិល្បៈរបស់នី មុនី្ននាថ ដោយសារនាងជាតារាសម្តែងល្បី តែងតែលេចមុខក្នុងខ្សែភាពយន្តជាច្រើនរឿង ។ ចំពោះជីវិតស្នេហាវិញ នី មុន្នីនាថ មិនអាចជួបសមតាមបំណងទេ ។
ក្រោយពេលបែកបាក់ពីគូដណ្តឹងនៅអាមេរិកមក នី មុន្នីនាថ ហាក់ចៀសមិនឲ្យជួបរឿងបែបនោះទៀតទេ ធ្វើឲ្យគេនិយាយថាទាំងស្អាតនិងពូកែសម្តែង តែអភ័ព្វស្នេហ៍ទៅវិញ ។ រហូតមកទល់ពេលនេះតាំងពីដាច់ដោចគ្នាជាមួយគូដណ្តឹងមក តារាទឹកភ្នែកនី មុនី្ននាថ មិនទាន់ឃើញបណ្តើរ ឬយកចិត្តទុកដាក់ជាមួយបុរសណាទៀតទេ ។ នាងប្រកាន់ខ្លួនឲ្យនៅទំនេរបែបនេះប្រហែលជាមកពីរាងចាលរឿងស្នេហ៍មិនសមប្រកប ព្រោះអំឡុងពេលបែកបាក់គ្នានាង និងគូដណ្តឹងបានប្តឹងផ្តល់គ្នាបែកផ្សែង ។ ការប្តឹងនោះទាក់ទងរឿងលុយដែលខាងប្រុសចោទថានី មុន្នីនាថ បោកយក ។
ពេលមានបញ្ហានី មុន្នីនាថ ខំទប់ចិត្តទប់កាយមិននិយាយអ្វីទាំងអស់រហូតរឿងមួយនេះបានស្ងប់ទៅវិញ ។ មនុស្សជាច្រើនបាននិយាយស្រដៀងៗគ្នាថាវាសនារបស់មុនី្ននាថ មិនដូចសារ៉ាយ សក្ខិណា ទេ ។ រវាងពួកនាងទាំង២ជាមិត្តជិតស្និទ្ធបំផុត ប៉ុន្តែគេមើលឃើញសក្ខិណា មានរាសីខ្ពស់ជាងមុនីនាថ ព្រោះបានរៀបការជាមួយបុរសអាណិកជនអាមេរិក និងសាងជីវិតនៅទីនោះ ។ មុនី្ននាថ អត់ឱកាសចេញទៅសាងស្នេហ៍នៅលើទឹកដីមហាអំណាចដូចសក្ខិណាឡើយ ។ នេះពិតជានិស្ស័យដោយគ្មានអ្នកណាគិតទាល់តែសោះថាមុនីនាថតារាស្រីមានសម្រស់ដែរនោះបែរជាអភ័ព្វជីវិតស្នេហារហូតស្ទើរតែដកថយលែងគិតស្របពេលសព្វថ្ងៃវ័យរបស់នាងកាន់តែ ច្រើនឡើងៗ។
នី មុនីនាថ ធ្លាប់ច្រានចោលជាបន្តបន្ទាប់ជុំវិញសំណួរដែលជជីកបើកកកាយទំព័រស្នេហារបស់នាង ។ នាងស្វាគមន៍តែសំណួរណាដែលមិនមែនជារឿងផ្ទាល់ខ្លួន គឺរឿងអាជីពសិល្បៈប៉ុណ្ណោះ ។ គេក៏មិនជឿថាមិនមែនអត់បុរសណាទាក់ទងនាងដែរ ប្រហែលជាតារាតូចច្រឡឹងសម្បុរស្រអែមរូបនេះបដិសេធមិនទទួលយក ឬទុកឲ្យនិស្ស័យជាអ្នកកំណត់ទៅវិញ ។
សព្វថ្ងៃនេះនី មុន្នីនាថ នៅតែបំពេញការងារសិល្បៈដោយគ្រងបានតំណែងតួឯកដដែលដោយភាគច្រើនសាច់រឿងដែលសម្តែងច្រើនជារឿងភាគតាមកញ្ចក់ទូរទស្សន៍ប្រភេទរឿងខ្មោចនិងរឿងបែបបុរាណ ។ ក្រៅពីសិល្បៈមុន្នីនាថ លក់ផលិតផលតាមអនឡាញ ព្រមទាំងចំណាយពេលបំពេញការងារមនុស្សធម៌ ឬស្ម័គ្រចិត្តជួយសង្គម ។
តើបុរសបែបណាទៅដែលនី មុន្នីនាថ ទទួលទុកក្នុងបេះដូងសាជាថ្មីបន្ទាប់ពីខកស្នេហ៍លើកដំបូងមក ៕
ចែករំលែកព័តមាននេះ