ទីក្រុងបាងកក ៖ យោងតាមក្រុមហ៊ុនប្រឹក្សាយោបល់អចលនទ្រព្យអន្តរជាតិ CBRE បានឲ្យដឹងថា ទីផ្សារផ្ទះក្នុងទីក្រុងបាងកកកាន់តែមានភាពមិនប្រាកដប្រជាឡើងហើយ បើទោះជាក្រុមហ៊ុនអចលនទ្រព្យបានបង្កើនការចេញលក់ខុនដូថ្មីៗពិតមែន ប៉ុន្ដែចំនួនលក់ឲ្យអតិថិជនថៃបានធ្លាក់ចុះក្នុងតំបន់មួយចំនួន ហើយអាចនឹងធ្លាក់ចុះបន្ថែមទៀតបន្ទាប់ពីការបង្កើនអត្រាការប្រាក់កម្ចី ។
CBRE បានឲ្យដឹងថា ក្រុមហ៊ុនអចលនទ្រព្យមួយចំនួនកំពុងតែព្យាយាមស្វែងរកទីតាំងដែលមានតម្រូវការពិតប្រាកដពីអតិថិជនថៃ និងអភិវឌ្ឍន៍គម្រោងដែលអតិថិជនអាចមានសមត្ថភាពទិញបាន ។ ក្រុមហ៊ុនដទៃទៀតបានបង្កើនការពឹងផ្អែកលើការលក់ឲ្យជនបរទេស បើទោះជានៅមិនទាន់ប្រាកដប្រជាពីអ្នករស់នៅពិតប្រាកដពិតមែនក្តី ។
ទីផ្សារជួលផ្ទះឲ្យជនបរទេសដែលធ្វើការក្នុងប្រទេសថៃនៅកណ្តាលទីក្រុងបន្តមានភាពរឹងមាំ ប៉ុន្តែ CBRE គិតថា ទីផ្សារជួលក្នុងស្រុកនៅតំបន់ដទៃទៀតនៅទន់ខ្សោយនៅឡើយ ដូច្នេះអតិថិជនដែលចង់ទិញដើម្បីដាក់ផ្ទះជួលប្រហែលជាមិនអាចទទួលបានប្រាក់ចំណេញដូចដែលពួកគេគិតទុកឡើយ ។
ក្នុងពេលថ្មីៗនេះ ធនាគារជាតិថៃបានចេញវិធានការរឹតបន្តឹងការផ្តល់ប្រាក់កម្ចីដើម្បីកាត់បន្ថយការបញ្ចាំអចលនទ្រព្យ និងហានិភ័យក្នុងទីផ្សារអចលនទ្រព្យ ព្រមទាំងបង្កើនគុណភាពការផ្តល់កម្ចីទិញផ្ទះផងដែរ។
វិធានការថ្មីៗនេះនឹងចាប់មានប្រសិទ្ធភាពនៅថ្ងៃទី១ ខែមេសាឆ្នាំក្រោយ ហើយនឹងផ្តល់អត្ថប្រយោជន៍ដល់អតិថិជនដែលទិញផ្ទះដំបូង ខណៈដែលវិនិយោគិនដែលទិញផ្ទះដើម្បីជួលបន្តអាចនឹងទទួលរងការប៉ះពាល់ ។
ច្បាប់ថ្មីនេះនឹងជំរុញឲ្យក្រុមហ៊ុនអចលនទ្រព្យទាមទារប្រាក់កក់ច្រើនជាងមុនដើម្បីកាត់បន្ថយហានិភ័យប្រាក់កម្ចីផងដែរ។ វានឹងកាត់បន្ថយតម្រូវការពីអតិថិជនដែលទិញផ្ទះដើម្បីលក់បន្តព្រោះពួកគេនឹងត្រូវបង់ដល់ទៅ២០ទៅ៣០% សម្រាប់ជាប្រាក់កក់ ៕
ចែករំលែកព័តមាននេះ