រាជធានីភ្នំពេញ ៖ យុវជនម្នាក់ជិះម៉ូតូដើរលេងពេលយប់រួចបានជូនមិត្តភក្តិទៅផ្ទះស្រាប់តែមានក្មេងទំនើងមួយក្រុមដេញវាយប្លន់យកម៉ូតូបានសម្រេច រួចជិះគេចខ្លួនបាត់អស់ កាលពីម៉ោង២ និង៣០នាទីទៀបភ្លឺថ្ងៃទី២ ធ្នូ ២០១៨ នៅផ្លូវទំនប់កប់ស្រូវភូមិជម្ពូវ័ន្ត២ សង្កាត់ចោមចៅ៣ ខណ្ឌពោធិ៍សែនជ័យ។
ជនរងគ្រោះជាម្ចាស់ម៉ូតូឈ្មោះ គង់ គឹមឡាង ភេទប្រុស អាយុ២០ឆ្នាំ មុខរបរជួយលក់គ្រឿងបន្លាស់រថយន្ត ស្នាក់នៅម្តុំក្រោយពេទ្យកាល់ម៉ែត ក្នុងសង្កាត់ស្រះចក ខណ្ឌដូនពេញ មានស្រុកកំណើតភូមិកំពង់ឫស្សី ឃុំជីរោទ៍ទី១ ស្រុកត្បូងឃ្មុំ ខេត្តកំពង់ចាម។
តាមសំដីជនរងគ្រោះឲ្យដឹងថា មុនកើតហេតុ ជនរងគ្រោះបានបើកបរម៉ូតូម៉ាកហុងដាឌ្រីមស៊េរីឆ្នាំ២០១៨ឡើងតែមឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១GX-១១២២ ដឹកមិត្តភក្តិមកពីដើរលេងនៅក្នុងខណ្ឌសែនសុខ ។
ក្រោយពីដើរលេងរួចហើយ នៅវេលាកើតហេតុខាងលើក៍ដឹកជូនមិត្តភក្តិត្រឡប់ទៅផ្ទះវិញ លុះធ្វើដំណើរមកដល់គោលដៅខាងលើ ស្រាប់តែមានក្មេងទំនើងមួយក្រុមជាង១០នាក់មកដេញវាយប្លន់យកម៉ូតូរបស់ខ្លួនដោយប្រើដាវនិងខ្សែក្រវាត់ជាអាវុធ ពេលប្លន់បានហើយ ក្រុមក្មេងទំនើងទាំងនោះនាំគ្នាជិះម៉ូតូគេចខ្លួនបាត់អស់។
ក្រោយហេតុការណ៍កើតឡើង ជនរងគ្រោះត្រូវបងប្អូនជូនមកប៉ុស្តិ៍នគរបាលរដ្ឋបាលចោមចៅ៣ដើម្បីដាក់ពាក្យប្តឹងឱ្យសមត្ថកិច្ចអោយជួយស្រាវជ្រាវតាមចាប់ក្រុមក្មេងទំនើងខាងលើយកមកចាត់ការតាមច្បាប់ ៕
ចែករំលែកព័តមាននេះ