រាជធានីភ្នំពេញ ៖ ក្មេងទំនើង២នាក់ក្នុងចំណោមបក្សពួក៤នាក់ត្រូវកម្លាំងសមត្ថកិច្ចធ្វើការឃាត់ខ្លួនក្រោយពីប្រើខ្សែក្រវ៉ាត់ដេញវាយទៅលើយុវជន៣នាក់បណ្តាលអោយម្នាក់របួសធ្ងន់ម្នាក់ និងរបួសស្រាល២នាក់ បង្កការភ្ញាក់ផ្អើលតាមដងផ្លូវកាលពីម៉ោង៩និង៣០នាទីយប់ថ្ងៃទី១ ធ្នូ ២០១៨ នៅស្តុបទំនប់កប់ស្រូវផ្លូវជាតិលេខ៤ ភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ។
ក្មេងទំនើងទាំង២នាក់ខាងលើម្នាក់ឈ្មោះ ពែល ណយ ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិផ្សារកំបូល សង្កាត់កំបូល ខណ្ឌពោធិ៍សែនជ័យ និងម្នាក់ទៀតឈ្មោះបឿន ប្រុស ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ។ ចំណែកបក្សពួក២នាក់ទៀតគេចខ្លួនមិនស្គាល់ឈ្មោះ។
ចំណែកជនរងគ្រោះទាំង៣នាក់ខាងលើ ១-ឈ្មោះ ឈួន រស្មី ភេទប្រុស អាយុ២៩ឆ្នាំ មុខរបរកម្មករលក់ហ្គាស បានរងរបួសធ្ងន់ ២-ម៉ៅ ភ័ក្ត្រ ភេទប្រុស អាយុ១៧ឆ្នាំ មុខរបរកម្មករ លក់ហ្គាស រងរបួសស្រាល និង៣-ឈ្មោះ ម៉ៅ ផៃ ភេទប្រុស អាយុ២២ឆ្នាំ មុខរបរកម្មករលក់ហ្គាស បានរងរបួសស្រាល ។ ជនរងគ្រោះទាំង៣នាក់ស្នាក់នៅភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ។
ប្រភពពីជនរងគ្រោះបានឲ្យដឹងថា មុនកើតហេតុ ពួកគាត់ចេញពីធ្វើការ ដោយជិះម៉ូតូមួយគ្រឿងម៉ាកស៊ុយហ្ស៊ុយគីនិក ពណ៌ស បិតស្កុតខ្មៅ ពាក់ស្លាកលេខ ភ្នំពេញ ១GC-១៤៨២ ឌុបគ្នា៣នាក់ ក្នុងគោលបំណងត្រឡប់ទៅផ្ទះវិញ ។
ដោយជិះម៉ូតូឌុបគ្នាធ្វើដំណើរតាមផ្លូវជាតិលេខ៤ ក្នុងទិសដៅពីលិចទៅកើត លុះមកដល់គោលដៅខាងលើ ស្រាប់តែមានក្មេងទំនើង៤នាក់ជិះម៉ូតូ២គ្រឿង ក្នុងនោះមួយគ្រឿងម៉ាកស៊ុយហ្ស៊ុយគីនិក ពណ៌ស និងមួយទៀតម៉ាកហុងដាឌ្រឹម ពណ៌ខ្មៅ មកពីក្រោយ រួចដកខ្សែក្រវាត់ដេញវាយពួកគាត់ដោយមិនដឹងមូលហេតុ បណ្តាលអោយជនរងគ្រោះម្នាក់របួសធ្ងន់ម្នាក់ និង២នាក់ទៀតរងរបួសស្រាល ភ្លាមៗនោះសមត្ថកិច្ចមូលដ្ឋានបានអន្តរាគមន៍ឃាត់ខ្លួនបានជនបង្ក២នាក់ ចំណែកបក្ខពួក២នាក់ទៀតបានរត់គេចខ្លួនអស់។
បច្ចុប្បន្នជនរងគ្រោះរបួសទាំង៣នាក់ត្រូវបានបងប្អូនបញ្ជូនទៅសង្គ្រោះនៅគ្លីនិកឯងជន ក្បែរកន្លែងកើតហេតុ ដោយឡែកជនបង្ក២នាក់ត្រូវឃាត់ខ្លួនបណ្តោះអាសន្នបញ្ជូនយកមកផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យ ៕
ចែករំលែកព័តមាននេះ