ខេត្តព្រះសីហនុ ៖ គ្រោះថ្នាក់ចរាចរណ៍រវាងម៉ូតូបុកជាមួយម៉ូតូ បណ្តាលឱ្យរងរបួសធ្ងន់ស្រាល៣នាក់ ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី១ ខែធ្នូ ឆ្នាំ២០១៨ លើដងផ្លូវជាតិលេខ៤ ចន្លោះគីឡូ១៩៦-១៩៧ ស្ថិតក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
ភាគីម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខ ព្រះសីហនុ ១G- ៥៦៤០ បើកបរដោយឈ្មោះ មាស ស័ក ភេទប្រុស អាយុ៧០ឆ្នាំ មុខរបររត់ម៉ូតូឌុប មានទីលំនៅភូមិបត់សិរមាន់ ឃុំព្រៃនប់ ស្រុកព្រៃនប់ ខេត្តព្រះសីហនុ បានរងរបួសធ្ងន់។
ចំណែភាគីម៉ូតូមួយគ្រឿងទៀតជិះគ្នា២នាក់ម៉ាកភីស៊ីអិច ពណ៌ទឹកប្រាក់ គ្មានស្លាកលេខ បើកបរដោយឈ្មោះ អ៊ុក ថន ភេទប្រុស អាយុ៣០ឆ្នាំ មានទីលំនៅភូមិព្រៃនប់១ ឃុំព្រៃនប់ ស្រុកព្រៃនប់ ខេត្តព្រះសីហនុ រងរបួសស្រាល និងអ្នករួមដំណើរម្នាក់ឈ្មោះ ហ៊ឹម ចាន់ដា ភេទស្រីអាយុ៤៥ឆ្នាំ បានរងរបួសធ្ងន់ ។
ប្រភពព័ត៌មានបានឱ្យដឹងថា ម៉ូតូមួយគ្រឿងម៉ាកហុងដាបើកបរដោយបុរសម្នាក់ធ្វើដំណើរក្នុងទិសដៅពីភ្នំពេញទៅខេត្តព្រះសីហនុ លុះមកដល់ចំណុចកើតហេតុខាងលើបានបត់ឆ្វេងក៏បុកជាមួយម៉ូតូមួយគ្រឿងទៀតជិះគ្នា២នាក់ម៉ាកភីស៊ីអិច បើកបរក្នុងទិសដៅពីផ្លូវលំឡើងផ្លូវជាតិ បណ្តាលឱ្យអ្នកបើកបរម៉ូតូម៉ាកហុងដារងរបួសធ្ងន់ ចំណែកភាគីខាងអ្នកបើកបរម៉ូតូម៉ាកភីស៊ីអ៊ិចបានរងរបួសស្រាល រីឯអ្នករួមដំណើរបានរងរបួសធ្ងន់ ។
ក្រោយកើតហេតុ ជនរងគ្រោះត្រូវបានគេបញ្ជូនទៅព្យាបាលនៅគ្លីនិកឯកជនមួយកន្លែង ។ ចំណែកម៉ូតូទាំង២គ្រឿងត្រូវបានសមត្ថកិច្ចយកទៅរក្សាទុកនៅប៉ុស្តិ៍ ៕
ចែករំលែកព័តមាននេះ