ខេត្តស្វាយរៀង ៖ ថ្ងៃទី២៨ ខែវិច្ឆិកា ឆ្នាំ២០១៨ វេលាម៉ោង០៨និង៣០នាទីព្រឹក កម្លាំងជំនាញចុះសហការជាមួយរដ្ឋបាលក្រុងបាវិតដឹកនាំដោយលោក លឹម សៀងហេង អភិបាលរងក្រុងបាវិតកម្លាំងអធិការដ្ឋាននគរបាលក្រុងបាវិតកម្លាំងចម្រុះបានចុះត្រួតពិនិត្យរដ្ឋបាលតាមបណ្តាផ្ទះសំណាក់បន្ទប់ជួលចំនួន០២ គោលដៅស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បានរកឃើញជនបរទេសចំនួន១៩នាក់ស្រី០៦នាក់ក្នុងនោះជនជាតិចិន១៤នាក់ ស្រី០៦នាក់ ជនជាតិឥណ្ឌូនេស៊ីចំនួន០៥នាក់ប្រុស ។ ជនបរទេសទាំងអស់មានលិខិតឆ្លងដែនទិដ្ឋាការ ប្រភេទE តែពុំមានប័ណ្ណការងារត្រូវបានសមត្ថកិច្ចប្រគល់ជូនក្រុមការងារអធិការកិច្ចហត្ថពលកម្មបរទេសធ្វើការផាកពិន័យតាមច្បាប់ ។
បើតាមមន្ត្រីនគបាលអន្តោប្រវេសន៍ម្នាក់បានបង្ហើបឲ្យដឹងថា ដោយមានជនបរទេសមកស្នាក់នៅតាមផ្ទះសំណាក់ច្រើន និងច្រើនថ្ងៃច្រើនខែហើយបានប្រកបមុខរបរ និងការងារដោយមិនបានសុំទិដ្ឋាការសៀវភៅការងារពីមន្ទីរការងារ និងបណ្តុះបណ្តាលវិជ្ជាជីវៈខេត្តដើម្បីចូលធ្វើការងារស្របច្បាប់ការងារនៃព្រះរាជាណាចក្រកម្ពុជាធ្វើឲ្យពិបាកក្នុងការគ្រប់គ្រងជាពិសេសជនជាតិចិនចូលមកក្នុងនាមភ្ញៀវទេសចរណ៍ ក៏ប៉ុន្តែពួកគេបែជាជួលផ្ទះស្នាក់នៅហើយចូលធ្វើការតាមកាស៊ីណូ លក់ដូរ និងធ្វើការតាមក្លិបកំសាន្តនានាក្នុងក្រុងបាវិត ។
ទើបអាជ្ញាធរក្រុងបាវិតចុះពិនិត្យតាមផ្ទះសំណាក់ និងផ្ទះជួល២កន្លែងរកឃើញជនបរទេសស្រីប្រុសចំនួន១៩នាក់មានលិខិតឆ្លងដែន និងទិដ្ឋាការប្រភេទEតែពុំមានប័ណ្ណការងារស្នាក់នៅប្រកបការងារទើបចាប់បញ្ជូនឲ្យក្រុមការងារអធិការកិច្ចហត្ថពលកម្មបរទេសធ្វើការផាកពិន័យតាមច្បាប់ ។
រីឯមហាជនសង្ឃឹមថា អាជ្ញាធរបន្តការចុះពិនិត្យនៅតាមសណ្ឋាគារផ្ទះសំណាក់ និងតាមផ្ទះជួលនានាក្នុងក្រុងបាវិតទាំងមូលដើម្បីជំរើនជនបរទេសដែលមកស្នាក់នៅប្រកបមុខរបររកស៊ី និងបំពេញការងារតាមកាស៊ីណូ ក្លិបកំសាន្ត រោងចក្រសហគ្រាស ផ្សារទំនើប ។ល។ ដើម្បីប្រមូលចំណូលចូលរដ្ឋឲ្យមានប្រសិទ្ធិភាព ៕
ចែករំលែកព័តមាននេះ