ខេត្តស្វាយរៀង ៖ កម្លាំងជំនាញ សហការជាមួយរដ្ឋបាលក្រុងបាវិត ដឹកនាំដោយលោកលឹម សៀងហេងអភិបាលរងក្រុងបាវិត កម្លាំងអធិការដ្ឋាននគរបាលក្រុងបាវិត កម្លាំងចម្រុះ បានចុះត្រួតពិនិត្យរដ្ឋបាលតាមបណ្តាផ្ទះសំណាក់បន្ទប់ជួលចំនួន២គោលដៅ វេលាម៉ោង០៨ និង៣០នាទីព្រឹកថ្ងៃទី២៨ វិច្ឆិកា ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
កម្លាំងក៏បានរកឃើញជនបរទេសចំនួន១៩នាក់ (ស្រី៦នាក់) ក្នុងនោះជនជាតិចិន១៤នាក់ (ស្រី៦នាក់)ជនជាតិឥណ្ឌូនេស៊ីចំនួន៥នាក់ (ប្រុស) ដែលជនបរទេសទាំងអស់ មានលិខិតឆ្លងដែនទិដ្ឋាការ ប្រភេទE តែពុំមានប័ណ្ណការងារ ត្រូវបានសមត្ថកិច្ចប្រគល់ជូនក្រុមការងារអធិការកិច្ចហត្ថពលកម្មបរទេសធ្វើការផាកពិន័យតាមច្បាប់ ។
បើតាមមន្ត្រីនគបាលអន្តោប្រវេសន៍ម្នាក់បានបង្ហើបឲ្យដឹងថា ដោយមានជនបរទេស មកស្នាក់នៅតាមផ្ទះសំណាក់ច្រើន និងច្រើនថ្ងៃច្រើនខែហើយ បានប្រកបមុខរបរ និងការងារ ដោយមិនបានសុំទិដ្ឋាការសៀវភៅការងារពីមន្ទីរការងារ និងបណ្តុះបណ្តាលវិជ្ជាជីវៈខេត្ត ដើម្បីចូលធ្វើការងារស្របច្បាប់ការងារ
នៃព្រះរាជាណាចក្រកម្ពុជា ធ្វើឱ្យពិបាកក្នុងការគ្រប់គ្រង ។ ជាពិសេស ជនជាតិចិនចូលមកក្នុងនាមភ្ញៀវទេសចរ ក៏ប៉ុន្តែពួកគេបែរជាជួលផ្ទះស្នាក់នៅ ហើយចូលធ្វើការតាមកាស៊ីណូ លក់ដូរ និងធ្វើការតាមក្លិបកំសាន្តនានាក្នុងក្រុងបាវិត ។
មហាជនសង្ឃឹមថា អាជ្ញាធរបន្តការចុះពិនិត្យនៅតាមសណ្ឋាគារផ្ទះសំណាក់ និងតាមផ្ទះជួលនានា ក្នុងក្រុងបាវិតទាំងមូល ដើម្បីជំរឿនជនបរទេស ដែលមកស្នាក់នៅប្រកបមុខរបររកស៊ី និងបំពេញការងារតាមកាស៊ីណូ ក្លិបកំសាន្ត រោងចក្រសហគ្រាស ផ្សារទំនើប ។ល។
ចែករំលែកព័តមាននេះ