រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចុះហត្ថលេខាលើសេចក្តីសម្រេចមួយចុះថ្ងៃទី២៩ ខែវិច្ឆិកា បង្កើតក្រុមការងារដើម្បីរៀបចំខ្លឹមសារនៃកិច្ចប្រជុំ ដើម្បីជំរុញការពន្លឿននីតិវិធីជំនុំជម្រះនៅក្នុងតុលាការ និងចេញសាលក្រម ឬសាលដីកាស្ថាពរ ។ ការបង្កើតក្រុមការងារ នេះត្រូវបានគេមើលឃើញថា ចំពេលដែលអ្នកទោសនៅក្នុងពន្ធនាគារមានភាពចង្អៀតណែនពីមួយថ្ងៃទៅមួយថ្ងៃ ។
ក្រុមការងារនេះមានសមាសភាព១១រូបដឹកនាំដោយ លោក សក់ សេដ្ឋា រដ្ឋលេខាធិការក្រសួងមហាផ្ទៃ និងមានលោក ប៉ាវ ហម ផាន រដ្ឋលេខាធិការក្រសួងមហាផ្ទៃ លោក កើត រិទ្ធ រដ្ឋលេខាធិការក្រសួងយុត្តិធម៌ ជាអនុប្រធាន លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ លោកនាយឧត្តមសេនីយ៍ ចាន់ គឹមសេង អគ្គនាយកពន្ធនាគារ ជាសមាជិក និងមន្ត្រីសំខាន់ៗជាច្រើនរូបទៀត ។
ការសម្រេចបង្កើតក្រុមការងារនេះ ត្រូវបានធ្វើឡើងបន្ទាប់ពីសម្តេចតេជោនាយករដ្ឋមន្ត្រីបានឯកភាពតាមសំណើរបស់សម្តេចក្រឡាហោម ស ខេង ដើម្បីឱ្យក្រសួង និងស្ថាប័នពាក់ព័ន្ធទាំងអស់ រៀបចំកិច្ចប្រជុំដោះស្រាយចំពោះបញ្ហាពេញណែននៅក្នុងពន្ធនាគារ ជាពិសេសក្រោយពីមានយុទ្ធនាការបង្ក្រាបគ្រឿងញៀននៅទូទាំងប្រទេស ។
តាមសំណើរបស់សម្តេចក្រឡាហោម ស ខេង កាលពីថ្ងៃទី៨ ខែវិច្ឆិកា ឆ្នាំ២០១៨ បានឱ្យដឹងថា ស្ថានភាពពន្ធនាគារមានភាពចង្អៀតណែនស្ទើរគ្រប់ពន្ធនាគារទូទាំងប្រទេស ។ ជាក់ស្តែងគិតត្រឹមថ្ងៃទី៣០ ខែកញ្ញា ឆ្នាំ២០១៨ ជនជាប់ឃុំមានចំនួនសរុប៣១.០០៨នាក់ ក្នុងនោះជនជាប់ឃុំដែលស្ថិតនៅក្នុងនីតិវិធីតុលាការមានរហូតដល់២២.២៩៥នាក់ ស្មើនឹង៧១,៩% ហើយលើសពីនេះ ជនជាប់ឃុំមួយចំនួនពុំទាន់មានសាលក្រម ឬសាលដីកាស្ថាពរទេ ទោះបីតុលាការបានជំនុំជម្រះចប់សព្វគ្រប់ហើយក្តី ។
សម្តេចក្រឡាហោមបានបញ្ជាក់ទៀតថា ដើម្បីដោះស្រាយបញ្ហាប្រឈមនេះ ក៏ដូចជារក្សាបាននូវសន្តិសុខ សុវត្ថិភាព សុខុមាលភាពជនជាប់ឃុំ ពិសេសដើម្បីអនុវត្តស្របតាមបទដ្ឋានគតិយុត្តជាតិ និងអន្តរជាតិ ខ្ញុំសូមគោរពស្នើសុំគោលការណ៍សម្តេចតេជោនាយករដ្ឋមន្ត្រី មេត្តាអនុ
ញ្ញាតឱ្យខ្ញុំដឹកនាំកិច្ចប្រជុំអន្តរក្រសួងមួយពេល ដែលមានសមាសភាពចូលរួម ក្រសួងមហាផ្ទៃ ក្រសួងយុត្តិធម៌ ប្រធានសាលាដំបូងរាជធានី-ខេត្ត និងព្រះរាជអាជ្ញានៃអយ្យការសាលាដំបូងរាជធានី-ខេត្ត សំដៅពិនិត្យពិភាក្សា និងស្វែងរកដំណោះស្រាយសមស្រប ក្នុងការជំរុញឱ្យសា
លាក្តីគ្រប់ជាន់ថ្នាក់ ពន្លឿននីតិវិធីដោះស្រាយសំណុំរឿងព្រហ្មទណ្ឌឱ្យឈានដល់ការជំនុំជម្រះឱ្យបានឆាប់រហ័ស ។
អ្នកនាំពាក្យក្រសួងយុត្តិធម៌ និងជាសមាជិកក្រុមការងារនេះ លោក ជិន ម៉ាលីន ថ្លែងថា ក្រុមការងារនេះនឹងរៀបចំការងារសម្រាប់រៀបចំកិច្ចប្រជុំអន្តរក្រសួងមួយ ដើម្បីរកដំណោះស្រាយបញ្ហាចង្អៀតណែនក្នុងពន្ធនាគារ ។
លោកត្រូវបានដកស្រង់សម្តីថា «ក្រោយពីក្រុមការងារធ្វើការសិក្សាស្រាវជ្រាវទៅលើខ្លឹមសារ នឹងអាចមានជាសំណើលើយន្តការជាក់ស្ដែងមួយចំនួន និងដាក់ជូនកិច្ចប្រជុំអន្តរក្រសួងដឹកនាំដោយសម្ដេចក្រឡាហោម ធ្វើការពិនិត្យពិភាក្សា និងសម្រេច ហើយចេញពីហ្នឹងទៅនឹងអាចមានជាវិធានការជាក់ស្ដែងណាមួយ ដើម្បីដោះស្រាយបញ្ហាហ្នឹង ។ ដោយសារក្រុមការងារទើបបង្កើត
អុីចឹងអាចចាប់ផ្ដើមក្នុងពេលឆាប់ៗខាងមុខហ្នឹងហើយ ប្រហែលជាអាចដើមសប្ដាហ៍ក្រោយមានការកោះប្រជុំ ប៉ុន្តែពេលនេះពុំទាន់មានកំណត់កាលបរិច្ឆេទទេ» ។
ចំណែកអង្គការលីកាដូ បានរកឃើញថា ពន្ធនាគារចំនួន១៨ក្នុងចំណោម២៨កន្លែងនៅទូទាំងប្រទេស មានអ្នកជាប់ពន្ធនាគារច្រើនជាង១ភាគ៣ គឺជាអ្នកដែលត្រូវបានឃុំខ្លួនបណ្ដោះអាសន្នរង់ចាំសវនាការ ។ ចំណែកនៅក្នុងពន្ធនាគារមួយចំនួន អ្នកជាប់ឃុំច្រើនជាងពាក់កណ្តាល មិនទាន់ត្រូវបានតុលាការបើកសវនាការជំនុំជម្រះនៅឡើយ ។ ជាមួយគ្នានេះ មានស្ត្រីមានផ្ទៃពោះចំនួន៣០នាក់ ម្តាយចំនួន១៣៥នាក់ និងកុមារអាយុក្រោម៣ឆ្នាំចំនួន១៣៨នាក់ កំពុងរស់នៅក្នុងពន្ធនាគារចំនួន១៨កន្លែងនៅទូទាំងប្រទេស ។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្មីត បានស្នើឱ្យមានការដោះលែងអ្នកជាប់ឃុំដែលពុំមានភ័ស្តុតាងរឹងមាំ និងស្នើឱ្យតុលាការកម្ពុជាពិចារណាឱ្យបានច្បាស់លាស់ ដោយឈរលើគោលការណ៍ច្បាប់ មុននឹងសម្រេចឃុំខ្លួនបណ្តោះអាសន្នលើជនជាប់ចោទម្នាក់ ៕
ចែករំលែកព័តមាននេះ