រាជធានីភ្នំពេញ ៖ លោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី៣០ វិច្ឆិកា បានសម្រេចចេញដីកាឃុំខ្លួនជនជាតិអង់គ្លេសម្នាក់ ដាក់ពន្ធនាគារជាបណ្តោះអាសន្ន ក្រោមការចោទប្រកាន់ ពីបទ.ទិញពេស្សាចារកុមារក្រោមអាយុ១៥ឆ្នាំ តាមបញ្ញាតមាត្រា៤៣ ច្បាប់ស្តីពីការបង្ក្រាបអំពើជួយដូរមនុស្ស និង ធ្វើអាជីវកម្មផ្លូវភេទ។ ជនសង្ស័យឈ្មោះ LORYMAN STEPHEN JOHN ភេទប្រុស អាយុ៥៧ឆ្នាំ មុខរបរជាគ្រូបង្រៀនភាសារអង់គ្លេស ស្នាក់នៅផ្ទះជួលដីឡូត៍លេខ១៩ ភូមិតាង៉ូវក្រោម សង្កាត់និរោធ ខណ្ឌច្បារអំពៅ។ គួរបញ្ជាក់ថា កាលពីថ្ងៃទី២៥ វិច្ឆិកា កម្លាំងសមត្ថកិច្ចនគរបាលនាយកដ្ឋានប្រឆាំង ការជួញដូរមនុស្ស និងការពារអនីតិជនក្រសួងមហាផ្ទៃ បានធ្វើការឃាត់ខ្លួនជនសង្ស័យពាក់ព័ន្ធលើការចោទ ពីករណីប្រព្រឹត្តអំពើទិញពេស្យាចាកុមារ។
អង្គហេតុពាក់ព័ន្ធសំណុំរឿងនេះ ត្រូវបានសមត្ថកិច្ចបង្ហើបឲ្យដឹងថា ជនសង្ស័យបានធ្វើការលួងលោមឲ្យប្រាក់ទិញទូរស័ព្ទឲ្យ ទិញចំណីអាហារ នាំដើរលេង ទិញសម្លៀកបំពាក់ ទិញសម្ភារសិក្សា ទិញកង់ និងរបស់របរប្រើប្រាស់ផ្សេងទៀត ដើម្បីអូសទាញក្មេងប្រុសចំនួន៤នាក់នោះ នាំចូលទៅផ្ទះជួលរបស់ខ្លួន ក្នុងគោលដៅប្រព្រឹត្តអំពើអាណាចារលើកុមារ។ ដោយការស៊ើបអង្កេតមើល ឃើញសកម្មភាព ជនសង្ស័យធ្វើដូច្នោះ សមត្ថកិច្ចបានសុំគោលការណ៍ទៅព្រះរាជអាជ្ញា សហការជាមួយមូលដ្ឋានដើម្បីចូលត្រួតពិនិត្យ។ លុះពេលចុះឆែកឆេរទៅ បានរកឃើញនៅក្នុងផ្ទះជួលនោះ មានកុមារចំនួន៤នាក់ ដែលជាជនរងគ្រោះ ហើយសមត្ថកិច្ចរំដោះ និងបានធ្វើការឃាត់ខ្លួនជនសង្ស័យតែម្តង។
នៅសមត្ថកិច្ចដើមបណ្តឹងដែលជាអាណាព្យាបាលកុមាររងគ្រោះ រួមទាំងសាក្សី បានបំភ្លឺប្រហាក់ប្រហែលគ្នាថា ជនសង្ស័យបានប្រើមធ្យោបាយ ដើម្បីទាក់ទាញកុមាររងគ្រោះនាំទៅប្រព្រឹត្តអំពើរួមភេទ និង រំលោភបំពានលើផ្លូវភេទកុមារនោះ។ ដោយយោងទៅលើចម្លើយសារភាពជនសង្ស័យ និងការបំភ្លឺពីដើមបណ្តឹង សមត្ថកិច្ចបានពិនិត្យលើអង្គហេតុ និងអង្គច្បាប់ពិតជាគ្រប់គ្រាន់សម្រាប់ដាក់បន្ទុកលើជនសង្ស័យ ទើបបាននគរបាលនាយកដ្នានប្រឆាំងការជួញដូរមនុស្ស និងការពារអនីតិជន កសាងសំណុំរឿងបញ្ជូនជនសង្ស័យទៅកាន់សាលាដំបូងរាជធានីភ្នំពេញតាមនីតិវិធី៕
ចែករំលែកព័តមាននេះ