រាជធានីភ្នំពេញ ៖ អភិបាលនៃគណៈអភិបាលខណ្ឌទួលគោកដឹកនាំកម្លាំងចម្រុះចុះធ្វើការបង្ក្រាបទីតាំង កម្សាន្តមួយកន្លែងយីហោ(1618) សាលកម្សាន្ត បុកប៊ីយ៉ា និងបានដកហូតទូហ្គេមបែបល្បែងស៊ីសង ជាច្រើនគ្រឿងទៀតផង ចំណែកម្ចាស់ទីតាំងគឺមិនបានឃាត់ខ្លួនឡើយ។ ប្រតិបត្តិការចុះបង្ក្រាបទីតាំង ខាងលើធ្វើឡើងកាលពីវេលាម៉ោង៥ និង៥០នាទីល្ងាច ថ្ងៃទី២៩ ខែវិចិ្ឆកា ឆ្នាំ២០១៨ ដែលនៅតាម បណ្តោយផ្លូវព្រះមុន្នីរ៉េត ស្ថិតក្នុងសង្កាត់ផ្សារដើមគ ខណ្ឌទួលគោក។
លោក ឯក ឃុនដឿន អភិបាលខណ្ឌទួលគោក បានប្រាប់ឲ្យដឹងថា ដោយមានការបញ្ជាផ្ទាល់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងមានការសម្របសម្រួលពីលោក តុប ឈុនឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ទើបលោកបានដឹកនាំកម្លាំងចម្រុះចុះបង្ក្រាបទីតាំងខាងលើ ហើយព្រមទាំងដកហូតទូហ្គេមបែបល្បែងស៊ីសងជាច្រើនគ្រឿង ក្នុងនោះហ្គេមបាញ់ត្រីផងដែរ។
ចំណែកឯម្ចាស់ទីតាំងខាងលើបានរត់គេចខ្លួនបាត់ស្រមោល ខណៈពេលដែលកម្លាំងចម្រុះចុះប្រតិបត្តិការ គឺនៅសល់តែនារីម្នាក់ដែលជាអ្នកមើលការខុសត្រូវនៅកន្លែងកើតហេតុ រួចក៏ត្រូវកម្លាំងចម្រុះនាំយក ទៅសាកសួរនាំ។ បើតាមប្រភពពីប្រជាពលរដ្ឋដែលនៅក្បែរទីតាំងខាងលើនេះបានឱ្យដឹងថា ទីតាំងល្បែងកម្សាន្តយីហោ «1618 សាលកម្សាន្ត បុកបីយ៉ា» ខាងលើនេះ បើកយូរណាស់មកហើយ តែមិនដឹងថាមានច្បាប់ ឬគ្មាននោះទេ ហើយគេសង្កេតឃើញមានជនជាតិចិនជាច្រើនតែងតែមកលេង យ៉ាងគគ្រើកគ្រេងជារៀងរាល់ថ្ងៃ។
លោក ឯក ឃុនដឿន បានបន្តថា ឧបករណ៍ដែលជាម៉ាស៊ីន សម្រាប់លេងល្បែងស៊ីសងជាច្រើន ត្រូវបានរកឃើញនៅក្នុងទីតាំងនេះ ហើយអាជ្ញាធរបានសម្រេចបិទទ្វារ ទីតាំងខាងលើជាបណ្តោះអាសន្ន ដើម្បីរង់ចាំព្រឹកស្អែកបន្តនីតិវិធីបន្តទៀត៕
ចែករំលែកព័តមាននេះ