រាជធានីភ្នំពេញ ៖ បងប្អូននារីក្នុងសមាគមនារីកម្ពុជាដើម្បីសន្តិភាព និងអភិវឌ្ឍន៍រាជធានីភ្នំពេញប្រមាណ២០០នាក់ បានធ្វើដំណើរទៅដល់ទីក្រុងប៉ាកសេ ខេត្តចំប៉ាសាក់ នៃសាធារណរដ្ឋប្រជាធិបតេយ្យប្រជាមានិតឡាវ តាមរថយន្តបឺសចំនួន៣គ្រឿង ក្នុងដំណើរទស្សនកិច្ចរយៈពេល២យប់៣ថ្ងៃនៅទីក្រុងប៉ាកសេ ដើម្បីចូលរួមអបអរសាទរខួបលើកទី១០០ ទិវានារីអន្តរជាតិ៨មីនា ឆ្នាំ២០១១ ក្រោមការជួយឧបត្ថម្ភពីលោកកែប ជុតិមា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអភិបាលរាជធានីភ្នំពេញនិងលោកជំទាវជុំ សាមីន កែប ជុតិមា ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍រាជធានីភ្នំពេញ ព្រមទាំងមានការចូលរួមពីលោកម៉ប់ សារិន ប្រធាន ក្រុមប្រឹក្សារាជធានីភ្នំពេញ និងលោកជំទាវផងដែរ ។
លោកអភិបាលរាជធានី និងលោកជំទាវតែងជួយឧបត្ថម្ភ និងផ្តល់ឱកាសដល់បងប្អូននារីយើងតាមខណ្ឌ សង្កាត់ មន្ទីរ ក៏ដូចជាបងប្អូននារីចំណុះរដ្ឋបាលសាលារាជធានីភ្នំពេញបានទៅធ្វើទស្សនកិច្ចសិក្សា និងកំសាន្តនៅតាមបណ្តាប្រទេសជាមិត្តជារៀងរាល់ឆ្នាំ ដើម្បីផ្លាស់ប្តូរបទពិសោធន៍ ក៏ដូចរឹតចំណងសាមគ្គីភាព មិត្តភាព និងបង្កើនភាពស្និទ្ធស្នាលឱ្យកាន់តែទូលំទូលាយថែមទៀត ក្នុងឱកាសទិវានារីអន្តរជាតិ៨មីនា ។ គណៈប្រតិភូសមាគមនារីរាជធានីភ្នំពេញបានទៅទស្សនកិច្ចនៅរមណីយដ្ឋានទឹកធ្លាក់ផាសូម ព្រមទាំងការរស់នៅរបស់បងប្អូនជនជាតិភាគតិចឡាវចំនួន៨ជនជាតិ ។ ចំណុចដែលគួរឱ្យចាប់អារម្មណ៍ទៀតនោះ គឺបងប្អូនជនជាតិភាគតិចទាំង៨ជនជាតិបានប្រើប្រាស់ភាសាដើមរបស់ខ្លួន គឺភាសាខ្មែរមន ដើម្បីប្រាស្រ័យទាក់ទងគ្នា ។ តាមមគ្គុទេសក៍ទេសចរនៃទីក្រុងប៉ាកសេបានឱ្យដឹងថា ទីក្រុងប៉ាកសេ ខេត្តចំប៉ាសាក់ គឺជាខេត្តលំដាប់ថ្នាក់ទី៣ បន្ទាប់ពីទីក្រុងចំណាស់លួងប្រាសាង និងទីក្រុង វៀងច័ន្ទ ។ សក្តានុពលរបស់ទីក្រុងប៉ាកសេមានរ៉ែមាស អគ្គិសនី ទេសចរណ៍បែបធម្មជាតិ ផលិតផលតែនិងកាហ្វេ រួមនឹងកសិផលផ្សេងៗទៀត។ ប៉ាកសេមានប្រជាពលរដ្ឋរស់នៅប្រមាណ៦សែននាក់ មានស្រុកចំនួន១០ជាចំណុះ ។
លោកជំទាវជុំ សាមីន កែប ជុតិមា មានប្រសាសន៍ថា គោលបំណងសំខាន់នៃដំណើរទស្សនកិច្ចនេះ គឺជាការលើកទឹកចិត្តដល់បងប្អូននារីយើងក្រោយពីបានចូលរួមលះបង់កម្លាំងកាយ-ចិត្ត ដើម្បីបុព្វហេតុបងប្អូននារី ដោយសម្រេចបានស្នាដៃ និងសមិទ្ធផលជាច្រើនលើការងារលើកកម្ពស់តម្លៃ និងតួនាទីស្ត្រី ទប់ស្កាត់ លុបបំបាត់អំពើហិង្សា អំពើរើសអើងចំពោះស្ត្រី និងកុមារ ។ ការលះបង់ខាងលើ បានរួមចំណែកលើកកម្ពស់សីលធម៌តម្លៃស្ត្រី និងគ្រួសារខ្មែរក៏ដូចចូលរួមយ៉ាងសកម្មជាមួយដៃគូបុរសក្នុងបុព្វហេតុអភិវឌ្ឍន៍រាជធានីភ្នំពេញដោយស្មើភាពជាមួយបុរស ក៏ដូចជារួមចំណែកអនុវត្តគោលនយោបាយភូមិ-សង្កាត់មានសុវត្ថិភាព ស្របតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងលោកជំទាវបណ្ឌិតប៊ុន រ៉ានី ហ៊ុន សែន ។
គណៈប្រតិភូក៏បានទៅទស្សនារមណីយដ្ឋានទឹកធ្លាក់ដាវញឿងនៃរមណីយដ្ឋានប៉ាសង ដែលមានផ្សារលក់វត្ថុអនុស្សាវរីយ៍ ចំការកាហ្វេទឹកធ្លាក់ប៉ាសង និងទឹកធ្លាក់កម្ពស់៧០ម៉ែត្រ អមទៅដោយទេសភាពតាមជ្រលងភ្នំ ដើមឈើ និងទឹកជ្រោះធម្មជាតិដ៏ស្រស់ត្រកាល រួមទាំងការរៀបចំឱ្យមានសេវាបម្រើសម្រាប់ភ្ញៀវទេសចរ ធ្វើឱ្យតំបន់នេះក្លាយជាតំបន់ទាក់ទាញភ្ញៀវទេសចរដ៏មានប្រជាប្រិយនៅទីក្រុងប៉ាកសេ ។
មុននឹងបញ្ចប់ដំណើរទស្សនកិច្ចនេះដែរ គណៈប្រតិភូសមាគមនារីកម្ពុជាដើម្បីសន្តិភាព និងអភវិឌ្ឍន៍រាជធានីភ្នំពេញ ក៏បានទៅទស្សនារមណីយដ្ឋានទឹកធ្លាក់ល្បាក់ខោន ស្ថិតនៅចម្ងាយប្រមាណ១០គីឡូម៉ែត្រពីព្រំដែនកម្ពុជា-ឡាវ ជាល្បាក់ដ៏ធំកាត់ទទឹងទន្លេមេគង្គ ឬហៅថា តំបន់កោះ ៤០០០ ។ ភ្ញៀវទេសចរមកពីតំបន់ផ្សេងៗក្នុងនោះក៏មានភ្ញៀវទេសចរមកពីប្រទេសកម្ពុជាផងដែរ ចូលចិត្តទៅទស្សនា ល្បាក់ខោននេះដែលមានទឹកហូរធ្លាក់មកប៉ែកខាងក្រោមប្រទេសកម្ពុជាដ៏ខ្មួលខ្មាញ់ និងទស្សនាដើមឈើ១ដើមបង្កប់ខ្លួនតាមប្របល្បាក់ខោនដែលប្រជាពលរដ្ឋឡាវមានជំនឿថា ជាដើមអាសង្ខៃក្នុងរឿងព្រេងនិទាន ៕
ចែករំលែកព័តមាននេះ