រាជធានីភ្នំពេញ៖ ទើបតែត្រឡប់មកពិភពសិល្បៈវិញ ឡាយ លក្ខិណា បង្ហើបឲ្យដឹងថានាងកំពុងមានស្នេហា ដោយបុរសម្នាក់ធ្វើឲ្យនាងលង់ចិត្ត ហើយអាចនឹងចូលរោងជ័យសំពះផ្ទឹមបន្ទាប់ពីបញ្ចប់កិច្ចការសិល្បៈ ។ នេះជាដំណឹងមួយដែលអ្នកនាងឡាយ លក្ខិណា…
រាជធានីភ្នំពេញ៖ ទើបតែត្រឡប់មកពិភពសិល្បៈវិញ ឡាយ លក្ខិណា បង្ហើបឲ្យដឹងថានាងកំពុងមានស្នេហា ដោយបុរសម្នាក់ធ្វើឲ្យនាងលង់ចិត្ត ហើយអាចនឹងចូលរោងជ័យសំពះផ្ទឹមបន្ទាប់ពីបញ្ចប់កិច្ចការសិល្បៈ ។
នេះជាដំណឹងមួយដែលអ្នកនាងឡាយ លក្ខិណា ទម្លាយចេញពីចិត្តមកនាពេល ថ្មីៗកន្លងមក ក្រោយពីរយៈពេលជិត១០ឆ្នាំមកនេះនាងនៅម្នាក់ឯង ។ ពេលវេលាជាយូរកន្លងមកគេគិតថាតារាសាច់ស្អាតរូបនេះប្រហែលជាឆ្អែតនឹងស្នេហាហើយទើបតោះតើយមិនរវល់ ។
អ្នកនាងឡាយ លក្ខិណាបានបង្ហើបថាអំឡុងពេលនាងភ្ជាប់ពាក្យជាមួយបុរសនៅអាមេរិកនោះគឺបាននៅជិតកាយគ្នាប្រមាណ១ឆ្នាំកន្លះក៏ចែកផ្លូវគ្នា ។ ចាប់តាំងពីពេលនោះមកនាងបានរស់នៅជានារីមេម៉ាយខាន់ស្លាជាមួយពាក្យចចាមអារ៉ាមជាច្រើនវាយប្រហារមកលើរូបនាង ។
ឡាយ លក្ខិណា និយាយថាពេលនាងបែកបាក់នោះ មានពាក្យជាច្រើននិយាយមកលើនាងដោយខ្លះថាអតីតគូដណ្តឹងនាងអស់ទ្រព្យឲ្យនាងទើបនាងចែកផ្លូវ ។ មួយទៀតពេលនាងលក់ខោអាវនៅផ្សារអូរឫស្សីគេថាមកពីនាងធ្លាក់កូដសិល្បៈ ។ «នាងខ្ញុំសូមនិយាយថា អ្វីៗជានិស្ស័យយើងអស់និស្ស័យបែកគ្នាតាមសម្រួល ហើយយើងនៅតែរាប់អានគ្នារហូតមកទល់ពេលនេះ ។ អតីតគូដណ្តឹងនាងខ្ញុំគាត់មានគ្រួសារមើលថែទាំដោយនាងខ្ញុំចាត់ទុកគាត់ជាបុរសល្អម្នាក់។ចំណែករឿងលក់ខោអាវនោះមកពីនាងខ្ញុំជាតារាចូលចិត្តដូរម៉ូដទើបមកលក់ខោអាវនៅផ្សារ ហើយក៏មិនគិតថាគេនិយាយពេបជ្រាយអ្វីដែរព្រោះជាការងារសុចរិត ដោយនាងខ្ញុំសប្បាយចិត្តលក់ដាច់ណាស់ ពោលមិនល្អមើលតែល្អស៊ី ។
ពាក់ព័ន្ឋរឿងគេថានាងខ្ញុំស្រឡាញ់ទ្រព្យ គឺមិនគិតរឿងហ្នឹងទេ ។ ពេលនេះនាងខ្ញុំកំពុងពិចារណាបុរសម្នាក់ជាគូអនាគត ដោយបុរសនាងខ្ញុំរើសម្តងទៀតនេះមានជីវភាពមធ្យមទេដោយគេចេះឲ្យតម្លៃស្នេហា ព្រមទាំងជាមនុស្សតស៊ូ ។ ដូច្នេះហើយនាងខ្ញុំកំពុងតែរូតរះបង្ហើយការងារកុងត្រាសិល្បៈឲ្យចប់រួចរាល់អាចដល់វេនគិតគូររឿងអនាគតហើយព្រោះវ័យ៣៥ឆ្នាំ ។ ណាមួយនាងខ្ញុំមិនចង់ឲ្យគេមើលឃើញថានៅយូរពេកតិចគេម៉ៃថាតិចលែងយកប្តី ទៅយកស្រីដូចគ្នា ព្រោះតែបែបហ្នឹងទើបភ្ញាក់ខ្លួនថាដល់ពេលគិតគូរជីវិតម្តងទៀត »។
ពេលវិលមកប្រឡូកសិល្បៈជាថ្មីម្តងទៀតនេះ ឡាយ លក្ខិណា នៅតែទទួលបានការគាំទ្រដោយនាងបានឱកាសថតភាពយន្តជាបន្តបន្ទាប់។ជាក់ស្តែងពេលនេះនាងកំពុងតែសម្តែងនៅប្រទេសកាណាដាជាមួយលោកនៅ ស៊ីនឿន ៕
ចែករំលែកព័តមាននេះ