រាជធានីភ្នំពេញ ៖ កម្លាំងអន្តរាគមន៍ខណ្ឌសែនសុខធ្វើការជិះល្បាតក្នុងមូលដ្ឋាន និងបានធ្វើការឃាត់ខ្លួនជនសង្ស័យពីរក្រុមផ្សេងគ្នាដោយមួយក្រុមបានធ្វើការឃាត់ខ្លួនបន្ទាប់ពីលួចម៉ូតូមួយគ្រឿង និងមួយក្រុមទៀតធ្វើការឃាត់ខ្លួនបន្ទាប់ពីឆែកឆេររកឃើញឧបករណ៍សម្រាប់កាច់សោកម៉ូតូមួយកំផ្លេ ។ ហេតុនេះកើតឡើងកាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី៣០ ខែវិច្ឆិកា ឆ្នាំ២០១៨ត្រង់ចំណុចខាងកើតស្ថានីយប្រេងឥន្ធនៈ LHR ប្រមាណ៥០ម៉ែត្រ តាមបណ្ដោយផ្លូវដីថ្មី ស្ថិតក្នុងភូមិដីថ្មី សង្កាត់គោកឃ្លាង ខណ្ឌសែនសុខ ។
បើតាមសម្តីពីកម្លាំងសមត្ថកិច្ចអន្តរាគមន៍ខណ្ឌសែនសុខបានអោយដឹងថា នៅមុនពេលកើតហេតុកម្លាំងពួកគាត់បានធ្វើការជិះល្បាតក្នុងមូលដ្ឋានដើម្បីកាត់បន្ថយ និងទប់ស្កាត់បទល្មើសដែលកើតឡើងដោយប្រការណាមួយ ។
លុះជិះមកដល់ចំណុចកើតហេតុក៏ស្រាប់តែប្រទះឃើញជនសង្ស័យចំនួនពីរកំពុងបណ្តើរម៉ូតូមួយគ្រឿងម៉ាក MSX ពណ៌ខ្មៅ ពាក់ផ្លាកលេខ ភ្នំពេញ 1FS-3128 តាមដងផ្លូវខាងលើ ដោយមានការសង្ស័យក៏ហៅជនសង្ស័យអោយឈប់ដើម្បីធ្វើការឆែកឆេរ តែខណៈនោះស្រាប់តែជនសង្ស័យទាំងពីរនាក់ខាងលើបានផ្តួលម៉ូតូចោលរួចព្យាយាមរត់គេចខ្លួន តែក៏ត្រូវបានកម្លាំងពួកគាត់ដេញចាប់ឃាត់បានមកវិញ និងដកហូតបានដាវកែច្នៃមួយដើម ។
ក្រោយមកបន្ទាប់ពីកម្លាំងពួកគាត់ធ្វើការសាកនាំទៅលើជនសង្ស័យទាំងពីរនាក់ខាងលើបានឆ្លើយសារភាពថា ម៉ូតូដែលពួកគេបណ្តើរខាងលើគឺជាម៉ូតូដែលពួកគេទើបតែលួចពីខាងមុខបន្ទប់ជួលដែលនៅក្បែរនោះ ។
ប្រភពដដែលបន្តថាភ្លាមៗនេះក៏ស្រាប់តែលេចមុខក្រុមជនសង្ស័យមួយក្រុមមានគ្នាពីរនាក់ផ្សេងទៀតបានជិះម៉ូតូមួយគ្រឿងម៉ាក MSX ពណ៌ខ្មៅ ពាក់ផ្លាកលេខ កំពង់ចាម 1L-2400 ដោយក្នុងលក្ខណៈសង្ស័យ ។
លុះពេលក្រុមជនសង្ស័យខាងលើនោះ ជិះមកដល់ចំណុចកើតហេតុ កម្លាំងពួកគាត់ក៏បានហៅស្ទាក់អោយឈប់ដើម្បីធ្វើការឆែកឆេរ ខណៈពេលដែលកំពុងធ្វើការឆែកឆេរក៏បានប្រទះឧបករណ៍សម្រាប់កាច់សោកម៉ូតូមួយកំផ្លេនៅខាងក្រោមកែបម៉ូតូរបស់ក្រុមជនសង្ស័យទាំងពីរនាក់នោះរួចកម្លាំងពួកគាត់ក៏ធ្វើការឃាត់ខ្លួនភ្លាមៗតែម្តង ៕
ចែករំលែកព័តមាននេះ