ខេត្តកំពង់ស្ពឺ ៖ ម៉ូតូ២គ្រឿងបានបុកគ្នាពេញទំហឹង បណ្តាលឱ្យមនុស្ស៣នាក់រងរបួសធ្ងន់ ត្រូវបានសមត្ថ
កិច្ចបញ្ជូនទៅកាន់មន្ទីរពេទ្យដើម្បីសង្គ្រោះ។ ហេតុការណ៍នេះបានកើតឡើងកាលពីវេលាម៉ោង៤និង៤០នាទីថ្ងៃទី២៩ ខែវិច្ឆិកា ឆ្នាំ២០១៨ នៅចំណុចលើផ្លូវជាតិ៥១ (១៣-១៤) ភូមិស្តុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ។
ភាគីម៉ូតូមួយគ្រឿងម៉ាកហុងដា ធុនC125 ស៊េរីឆ្នាំ២០១៦ ពណ៍ខ្មៅ ពាក់ផ្លាកលេខ ភ្នំពេញ ២FT-១៧៩០ បើកបរដោយឈ្មោះ រស់ ភេទប្រុស អាយុ២៥ឆ្នាំ រស់នៅភូមិព្រៃព្រាល ឃុំភ្នំតូច ស្រុកឧដុង្គ បានរងរបួសធ្ងន់។
ចំណែកភាគីម្ខាងទៀតជិះម៉ូតូមួយគ្រឿងម៉ាកហុងដា ធុនC125 ស៊េរីឆ្នាំ២០១៤ ពណ៍ខ្មៅ ពាក់ស្លាកលេខ ភ្នំពេញ ១FC-៤៨៩៨ បើកបរដោយឈ្មោះ តង់ សុជាតិ ភេទស្រី អាយុ១៩ឆ្នាំ បានរងរបួសធ្ងន់ និងអ្នករួមដំណើរម្នាក់ឈ្មោះ ទុំ អៀម ភេទស្រី អាយុ១៨ឆ្នាំ អ្នកទាំងពីររស់នៅភូមិប៉ាលហាល ឃុំចាន់សែន ស្រុកឧដុង្គ ។
ប្រភពបានអោយដឹងថា មុនពេលកើតហេត គេឃើញភាគីម៉ូតូម៉ាកហុងដា ស៊េរីឆ្នាំ២០១៦ដែលបើកបរដោយបុរសម្នាក់បានដំណើរពីទៅខាងជើងទៅទិសខាងត្បូង លុះមកដល់ចំណុចខាងលើបានវ៉ាជែងរថយន្តមួយគ្រឿងក្នុងទិសដៅស្របទិសគ្នា ហើយបានជ្រុលទៅបុកភាគីម៉ូតូម្ខាងទៀតម៉ាកហុងដា ស៊េរីឆ្នាំ២០១៤ ដែលកំពុងធ្វើដំណើរក្នុងទិសដៅបញ្ច្រាសទិសគ្នានៅលើគន្លងផ្លូវខាងកើត បណ្តាលឱ្យភាគីទាំងសងរងរបួសធ្ងន់ទាំង៣នាក់តែម្តង។
ប្រភពបានបន្តទៀតថា ក្រោយកើតហេតុ សមត្ថកិច្ចបានចុះធ្វើកំណត់ហេតុ និងបញ្ជូនជនរងគ្រោះទៅកាន់មន្ទីរពេទ្យដើម្បីសង្គ្រោះភ្លាមៗផងដែរ ។ គ្រោះថ្នាក់នេះបណ្តាលអោយម៉ូតូទាំង២គ្រឿងខាងលើរងការខូចខាតស្រាល ។
បន្ទាប់ពីធ្វើកំណត់ហេតុវាស់វែងរួចរាល់ សមត្ថកិច្ចបាននាំយកម៉ូតូទាំងពីរគ្រឿងទៅរក្សាទុកនៅប៉ុស្តិ៍នគរបាលរដ្ឋាបាលភ្នំតូច រង់ចាំអោយភាគីទាំង២ចូលខ្លួនមកដោះស្រាយគ្នាតាមនីតិវិធី ៕
ចែករំលែកព័តមាននេះ