រាជធានីភ្នំពេញ៖ លោក កឹម សុខា អតីតប្រធានគណបក្សសង្គ្រោះជាតិដែលកំពុងជាប់នៅក្នុងគេហដ្ឋានបានថ្កោលទោសចំពោះការជុំគ្នាដើម្បីធ្វើសន្នីសីទរួមមួយនៅក្នុងទឹកដីសហរដ្ឋអាមេរិករបស់ថ្នាក់ដឹកនាំគណបក្សសង្គ្រោះជាតិ (CNRP) នៅដើមខែធ្នូនេះ ។ នេះបើតាមកូនស្រីលោក កឹម សុខា ។
កូនស្រីលោក កឹម សុខា គឺកញ្ញា កឹម មនោវិទ្យា បានសរសសេបង្ហោះតាម Twitter យ៉ាងដូច្នេះថា ៖«តាមរយៈមេធាវីរបស់លោក កឹម សុខា លោកថ្កោលទោសនូវអ្វីដែលហៅថា សន្និសីទ CNRP ដែលនឹងប្រព្រឹត្តទៅនៅសហរដ្ឋអាមេរិក នាខែធ្នូខាងមុខ ដោយគ្មានយន្តការត្រឹមត្រូវ» ។
ចំណែកលោក សម រង្ស៊ី ដែលកំពុងនៅក្រៅប្រទេសបានលើកឡើងលើបណ្តាញសង្គមនៅថ្ងៃទី៣០ វិច្ឆិកា យ៉ាងដូច្នេះថា«ខ្ញុំទើបតែមកដល់ទីក្រុងអាត្លង់តា (Atlanta) រដ្ឋ Georgia សហរដ្ឋអមាេរិក ដើម្បីតាមដានសន្និសីទរបស់សាខាគណបក្សសង្គ្រោះជាតិទូទាំងពិភពលោក» ។
លោកបានលើកឡើងថា ប្រតិភូចូលរួមសន្និសីទមានចំនួនជាង៤០០នាក់មកពីសហរដ្ឋអាមេរិក ប្រទេសកាណាដា ទ្វីបអឺរ៉ុប (មានទាំងប្រទេសបារាំង ប្រទេសប៊ែលហ្សិក ប្រទេសស្វីស ប្រទេសអាល្លឺម៉ង់ ប្រទេសអុីតាលី ប្រទេសអូទ្រីស ប្រទេសហូឡង់ ប្រទេសន័រវេ ប្រទេ សស៊ុយអែត និងប្រទេសហ្វាំងឡង់) ទ្វីបអាស៊ី (មានទាំងប្រទេសកម្ពុជា ប្រទេសថៃ ប្រទេ សម៉ា ឡេសុី ប្រទេសជប៉ុន និងប្រទេសកូរ៉េ) និងទ្វីបអូសេីអានី ប៉ាស៊ីហ្វិច (មានទាំងប្រ ទេសអូស្ត្រាលី និងប្រទេសញូវហ្សេឡែន) ។
លោកបានបន្ថែមថា ក្នុងកាលៈទេសៈដ៏ពិសេសនេះដោយសារតែលោកប្រធាន កឹម សុខា ត្រូវបាន ហ៊ុន សែន ចាប់យកធ្វើជាចំណាប់ខ្មាំង ហើយដោយសារតែសកម្មជនគណបក្សសង្គ្រោះជាតិនៅប្រទេសកម្ពុជាត្រូវគេគំរាមកំហែង ហើយមិនអាចបញ្ចេញយោបល់បានឡើយ យើងយល់ឃើញថា មានតែសកម្មជនគណបក្សសង្គ្រោះជាតិនៅក្រៅប្រទេសទេគឺនៅតាមសាខានានារបស់គណបក្សទូទាំងពិភពលោក ដែលអាចជួបជុំគ្នា និងពិភាក្សាគ្នា ដើម្បីកំណត់យុទ្ធសាស្ត្រ និងធ្វើសេចក្តីសម្រេចសមស្របទាន់ពេលវេលា ក្នុងគោលបំណងរកដំណោះស្រាយចំពោះវិបត្តិនយោបាយសព្វថ្ងៃនៅកម្ពុជា ។
លោក ករុណា ពៅ យុវជនគណបក្សសង្គ្រោះជាតិមួយរូបបានលើកឡើងថា ក្នុងនាមខ្ញុំជាយុវជនគណបក្សសង្គ្រោះជាតិ ខ្ញុំសូមគាំទ្រយ៉ាងពេញទំហឹងនូវការធ្វើសន្និសីទរបស់សាខាគណបក្សសង្គ្រោះជាតិទូទាំងពិភពលោក នៅថ្ងៃទី១ ថ្ងៃ២ ខែធ្នូ ឆ្នាំ២០១៨ នៅរដ្ឋ អាត្លង់តា សហរដ្ឋអាមេរិក ដើម្បីប្រមូលផ្តុំកម្លាំងអ្នកស្នេហាជាតិ អ្នកប្រជាធិបតេយ្យពិតប្រាកដរួមគ្នាតស៊ូសង្គ្រោះជាតិឲ្យទាន់ពេលវេលា» ។
ដោយឡែកលោក បូពា សំនៀង ជាអនុប្រធានក្រុមគាំទ្រ គណបក្សសង្គ្រោះជាតិ (CNRP Marseille France) ប្រចាំ Marseille ប្រទេសបារាំង និងជាសមាជិកក្រុមការងារ គណប ក្សសង្គ្រោះជាតិខេត្តព្រៃវែងបានលើកឡើងថា «ខ្ញុំយល់ឃើញថា ការភ្នាល់របស់លោក សម រង្ស៊ី ជាមួយសម្តេច ហ៊ុន សែន លើប្រធានបទ«ដោះលែង ឬមិនដោះលែងលោក កឹម សុខា ប្រធានគណបក្សសង្គ្រោះជាតិ» មិនត្រឹមតែនាំឲ្យប៉ះពាល់ដល់កិត្តិយស និងសេរីភាពលោក កឹម សុខា ប៉ុណ្ណោះទេ លើសពីនេះទៅទៀតគឺនាំឲ្យប៉ះពាល់ដល់សាមគ្គីភាពផ្ទៃក្នុងបក្ស, តម្លៃលទ្ធិប្រជាធិបតេយ្ យនិងសិទ្ធិមនុស្ស, ផលប្រយោជន៍ជាតិ, ឆន្ទៈប្រជាពលរដ្ឋដែលបានគាំទ្រគណបក្សសង្គ្រោះជាតិក្នុងនាមបុគ្គល» ។
លោកគូសបញ្ជាក់ទៀតថា ខ្ញុំសូមទទូចអង្វរលោក សម រង្ស៊ី ឲ្យសុំទោសលោក កឹម សុខា ដើម្បីនាំមកនូវការពង្រឹងការរួបរួម និងសាមគ្គីផ្ទៃក្នុងនៃគណបក្សសង្គ្រោះជាតិ ។ ខ្ញំសង្ឃឹមថា«ពាក្យសុំទោស១ម៉ាត់ដូរនឹងសាមគ្គីផ្ទៃក្នុងបក្ស» លោ កសម រង្ស៊ី ប្រាកដជាអាចធ្វើបាន ព្រោះលោកធ្លាប់សុំទោសសម្តេច ហ៊ុន សែន ២ដងដើម្បីបានវិលត្រឡប់ចូលស្រុកខ្មែរផងដែរ ៕
ចែករំលែកព័តមាននេះ